କୋଲକାତା,୧୭।୫: ତିନିଥର ତୃଣମୂଳ କଂଗ୍ରେସ ବିଧାୟକ ଏବଂ ମମତା ବାନାର୍ଜୀଙ୍କ ନେତୃତ୍ୱାଧୀନ କ୍ୟାବିନେଟର ପୂର୍ବତନ ସଦସ୍ୟ ଗିଆସୁଦ୍ଦିନ ମୋଲ୍ଲା ଏବେ ପାଲଟିଛନ୍ତି ବିଦ୍ରୋହୀ। ସେ ଟିଏମସି ମହାସଚିବ ଏବଂ ଲୋକସଭା ସାଂସଦ ଅଭିଷେକ ବାନାର୍ଜୀ ଏବଂ ଜଣେ ପୋଲିସ ଅଧିକାରୀ ମିଥୁନ କୁମାର ଦେଙ୍କ ବିରୋଧରେ ଏଫଆଇଆର ରୁଜୁ କରିଛନ୍ତି। ଦକ୍ଷିଣ ୨୪ ପ୍ରଗଣ ଜିଲ୍ଲାର ମଗରାହାଟ ବିଧାନସଭା ନିର୍ବାଚନମଣ୍ଡଳୀର ଏକ ସ୍ଥାନୀୟ ପୋଲିସ ଷ୍ଟେସନରେ ଏହି ମାମଲା ରୁଜୁ ହୋଇଛି। ରବିବାର ନିଜର ପୋଲିସ ଅଭିଯୋଗ ଦାଖଲକୁ ସୁନିଶ୍ଚିତ କରି ଗିଆସୁଦ୍ଦିନ ମୋଲ୍ଲା କହିଛନ୍ତି, ସେ ପୋଲିସ କାର୍ଯ୍ୟାନୁଷ୍ଠାନ ଏବଂ ନିଜ ପାର୍ଟି ଦ୍ବାରା ପ୍ରତାଡିତ ହେବା ଭୟରେ ଚୁପ୍ ଥିଲେ।
ଗିଆସୁଦ୍ଦିନ ମୋଲ୍ଲା ହେଉଛନ୍ତି ମଗରାହାଟ (ପଶ୍ଚିମ)ର ପୂର୍ବତନ ତୃଣମୂଳ କଂଗ୍ରେସ ବିଧାୟକ ଏବଂ ପଶ୍ଚିମବଙ୍ଗର ପୂର୍ବତନ ସଂଖ୍ୟାଲଘୁ ବ୍ୟାପାର ଏବଂ ମଦ୍ରାସା ଶିକ୍ଷାର ପୂର୍ବତନ ମନ୍ତ୍ରୀ ରହିସାରିଛନ୍ତି। ମୋଲ୍ଲା କହିଛନ୍ତି ‘ମୁଁ ଭୟରେ ବଞ୍ଚୁଥିଲି, ତେଣୁ ମୁଁ କଥା ହେବାକୁ ସାହସ କରିନଥିଲି। ମୋତେ ଭୟ ଥିଲା ମୋ ନିଜ ଦଳର କର୍ମୀମାନେ ମୋତେ ଆକ୍ରମଣ କରି ପାରନ୍ତି। ତଥାପି, ମୁଁ ବର୍ତ୍ତମାନ ପୋଲିସ ନିକଟରେ ଅଭିଯୋଗ ଦାଖଳ କରୁଛି କାରଣ ମୁଁ ନୂତନ ମୁଖ୍ୟମନ୍ତ୍ରୀ ସୁଭେନ୍ଦୁ ଅଧିକାରୀଙ୍କ ନେତୃତ୍ୱାଧୀନ ପ୍ରଶାସନ ଉପରେ ଭରସା କରେ।’
୨୦୧୧ ରୁ ୨୦୨୬ ପର୍ଯ୍ୟନ୍ତ ମଗରାହାଟ (ପଶ୍ଚିମ) ନିର୍ବାଚନମଣ୍ଡଳୀରୁ ତିନିଥର ବିଧାୟକ ଥିବା ଗିଆସୁଦ୍ଦିନ ମୋଲ୍ଲାଙ୍କୁ ନିକଟରେ ସରିଥିବା ପଶ୍ଚିମବଙ୍ଗ ବିଧାନସଭା ନିର୍ବାଚନରେ ଦଳ ପୁନଃ ପ୍ରାର୍ଥୀ କରିନଥିଲା। ଏହାବଦଳରେ ଦଳ ବର୍ତ୍ତମାନର ବିଧାନସଭାର ୮୦ ଜଣ ତୃଣମୂଳ କଂଗ୍ରେସ ବିଧାୟକଙ୍କ ମଧ୍ୟରୁ ଜଣେ ଶାମିମ ଅହମ୍ମଦ ମୋଲ୍ଲାଙ୍କୁ ପ୍ରାର୍ଥୀ କରିଥିଲା। ଗିଆସୁଦ୍ଦିନ କହିଛନ୍ତି ଯେ ଦକ୍ଷିଣ ୨୪ ପ୍ରଗଣା ଜିଲ୍ଲାର ଡାଇମଣ୍ଡ ହାର୍ବର ଉପଖଣ୍ଡର ପୂର୍ବତନ ସବ-ଡିଭିଜନାଲ ପୋଲିସ ଅଧିକାରୀ (SDPO) ମିଥୁନ କୁମାର ଦେ ସ୍ଥାନୀୟ ତୃଣମୂଳ କଂଗ୍ରେସ ନେତା ଏବଂ କର୍ମୀଙ୍କ ଏକ ଦଳ ଏକ ବର୍ଗ ବିରୋଧରେ ଅନାବଶ୍ୟକ ଦଣ୍ଡାତ୍ମକ କାର୍ଯ୍ୟାନୁଷ୍ଠାନ ନେଉଥିଲେ, ଯେଉଁମାନେ କି ଅଭିଷେକ ବାନାର୍ଜୀଙ୍କ ଦଳ ପରିଚାଳନାର ଏକଛତ୍ରବାଦୀ ଶୈଳୀକୁ ଗ୍ରହଣ କରିବାକୁ ଇଚ୍ଛୁକ ନଥିଲେ।
ଜଣେ ତୃଣମୂଳ କଂଗ୍ରେସ କର୍ମୀଙ୍କୁ ମିଥୁନ କୁମାର ଦେ ପ୍ରବଳ ମାଡ଼ ମାରିଥିଲେ। ସେ ପୋଲିସ ଷ୍ଟେସନ ଭିତରେ ଦଳୀୟ କର୍ମୀଙ୍କୁ ଶାରୀରିକ ଏବଂ ମାନସିକ ନିର୍ଯାତନା ଦେଇଥିଲେ। ସେତେବେଳେ ଦଳୀୟ ବିଧାୟକ ଭାବରେ ମୁଁ ପ୍ରତିବାଦ କରିଥିଲି, କିନ୍ତୁ କୌଣସି ଲାଭ ହୋଇନଥିଲା। ବରଂ, ମିଥୁନ କୁମାର ଦେ ମୋତେ ଗାଳି ଦେଇଥିଲେ ଏବଂ ମୋତେ ମାଡ଼ ମାରିବା ପାଇଁ ତାଙ୍କ ବାଡ଼ି ଧରି ମୋ ଉପରେ ଆକ୍ରମଣ କରିଥିଲେ। ମୁଁ ଏହା ମମତା ବାନାର୍ଜୀ ଏବଂ ଅଭିଷେକ ବାନାର୍ଜୀ ଉଭୟଙ୍କୁ ଜଣାଇଥିଲି, କିନ୍ତୁ କୌଣସି ସମାଧାନ ମିଳିଲା ନାହିଁ। ସେ କହିଚନ୍ତି, ଏସବୁ ଅଭିଷେକ ବାନାର୍ଜୀଙ୍କୁ ସବୁ ଜଣାଥିଲା ଓ ମିଥୁନ କୁମାର ଦେ ଏସବୁ ଅଭିଷେକଙ୍କ ନିର୍ଦେଶରେ କରିଥିଲେ।
ଆହୁରି ପଢନ୍ତୁ : ଦିଲ୍ଲୀର ମହିଳାଙ୍କୁ ବିନା ଗ୍ୟାରେଣ୍ଟିରେ ମହିଳା ୧୦ କୋଟିର ଋଣ, ରେଖା ଗୁପ୍ତା ସରକାରଙ୍କ ବଡ଼ ଘୋଷଣା
