କୁତ୍ରା୧୫/୬: ସୁନ୍ଦରଗଡ଼ ଜିଲ୍ଲା କୁତ୍ରା ଥାନା ଅର୍ନ୍ତଗତ ରାଞ୍ଚି ରୋଡ ଠାରେ ଏକ କାର ଧକ୍କାରେ ବାଇକ ଯୋଗେ ଯାଉଥିବା ଯୁବକ ରମେଶ ଟପୋ (୨୮) ଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ସମିର ମିଞ୍ଜ (୨୪) ଓ ରାଜେଶ କୁଜୁର (୨୬) ଆହତ ହୋଇଛନ୍ତି। ଘଟଣାରୁ ଜଣାପଡ଼ିଛି ଯେ କୁତ୍ରା ଥାନା ଅର୍ନ୍ତଗତ ନକଟି ଗ୍ରାମର ରମେଶ   ଟପୋ, ରାଜେଶ କୁଜୁର ଓ ତେଲିଘନା ଗ୍ରାମର ସମିର ମିଞ୍ଜ ଏକ ବାଇକ ଯୋଗେ ରାତି ୮ ଟା ସମୟରେ ରାଞ୍ଚି ରୋଡ ଛକରୁ କୁତ୍ରା ଆଡକୁ ଆସିବା ପାଇଁ ବାଇକକୁ ବୁଲାଉଥିବା ବେଳେ ବାଇକ( ଓଆର୧୪ଭି ୨୧୬୭ )କୁ ଏକ କାର (ଓଡି ୧୪ ଜେଡ ୯୬୭୦ ) ଧକ୍କା ଦେଇଥିଲା। ଘଟଣା ସ୍ଥଳରେ ରମେଶଙ୍କ ମୃତ୍ୟ ଘଟିଥିବା ବେଳେ ରାଜେଶ ଓ ସମିର ଆହତ ହୋଇଥିଲେ। ଉଭୟ ଆହତଙ୍କୁ କୁତ୍ରା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଚିକିତ୍ସା ପାଇଁ ଅଣାଯାଇଛି। ଅନ୍ୟ ପକ୍ଷରେ ବିଭିନ୍ନ ଦାବି ନେଇ ସ୍ଥାନୀୟ ଲୋକ ମାନେ ଘଟଣାସ୍ଥଳରେ ଶବ ରଖି ବିଜୁ ଏକ୍ସପ୍ରେସୱେ କୁ ଅବରୋଧ କରିଛନ୍ତି । ପୋଲିସ ଘଟଣା ସ୍ଥଳରେ ଉପସ୍ଥିତ ରହି ଶବକୁ ଉଠାଇବା ସହିତ ରାସ୍ତା ଅବରୋଧ ହଟାଇବା ପାଇଁ ଲୋକଙ୍କ ସହ ଆଲୋଚନା କରୁଛନ୍ତି ।ଖବର ଲେଖା ହେବା ପର୍ଯ୍ୟନ୍ତ ରାସ୍ତା ଅବରୋଧ ଅବ୍ୟାହତ ରହିଥିଲା।