ଖଲ୍ଲିକୋଟ, ୨୩/୦୫: ଆଜି ଅପରାହ୍ନ ୪ଟାରେ ଖଲ୍ଲିକୋଟ ବ୍ଲକ କାର୍ଯ୍ୟାଳୟ ନିକଟରେ ଘଟିଛି ମର୍ମନ୍ତୁଦ ସଡକ ଦୁର୍ଘଟଣା। ଟିଭିଏସ ଏକ୍ସଲ ଗାଡ଼ିକୁ ଗ୍ୟାସ ସିଲିଣ୍ଡର ଵୋଝେଇ ଟ୍ରକ୍ ଧକ୍କା ଦେବାରୁ ସ୍ୱାମୀ ସ୍ତ୍ରୀ ଦୁହିଁଙ୍କ ମୃତ୍ୟୁ ଘଟିଛି। ମିଳିଥିବା ସୂଚନା ଅନୁଯାୟୀ, ଖଲ୍ଲିକୋଟ ଥାନା ଅନ୍ତର୍ଗତ ଖୋଜାପଲ୍ଲୀ ଗ୍ରାମର ଡାକ ତରେଇ (୬୦) ଓ ତାଙ୍କ ସ୍ତ୍ରୀ ଛାଇନ ତରେଇ (୫୨) ମଥୁରାରୁ ଏକ ଭୋଜିରେ ଯୋଗଦେଇ ନିଜ ଟିଭିଏସ ଏକ୍ସଲ ମୋପେଡ ଗାଡି ଯୋଗେ ଆଜି ଅପରାହ୍ନ ୪ଟାରେ ନିଜ ଗାଁ ଅଭିମୁଖେ ଫେରୁଥିଲେ। ଏହି ସମୟରେ ଖଲ୍ଲିକୋଟ ବ୍ଲକ କାର୍ଯ୍ୟାଳୟ ନିକଟରେ ଇଣ୍ଡେନ ଗ୍ୟାସ ସିଲିଣ୍ଡର ବୋଝେଇ ଟ୍ରକ୍ ପଛପଟୁ ଦ୍ରୁତଗତିରେ ଆସି ମୋପେଡକୁ ଧକ୍କା ଦେଇଥିଲା।
ଏହି ଦୁର୍ଘଟଣାରେ ଉଭୟେ ସ୍ୱାମୀ ସ୍ତ୍ରୀ ତଳେ ପଡି ଯାଇଥିବା ବେଳେ ସ୍ତ୍ରୀଙ୍କ ଉପରେ ଟ୍ରକର ପଛ ଚକା ମାଡି ଯାଇଥିଲା। ଫଳରେ ସ୍ତ୍ରୀ ଛାଇନ ତରେଇଙ୍କ ଦୁର୍ଘଟଣା ସ୍ଥଳରେ ହିଁ ଶୋଚନୀୟ ମୃତ୍ୟୁ ଘଟିଥିଲା। ଗୁରୁତର ଆହତ ଅବସ୍ଥାରେ ସ୍ୱାମୀ ଡାକ ତରେଇଙ୍କୁ ଚିକିତ୍ସା ପାଇଁ ଖଲ୍ଲିକୋଟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଅଣାଯାଇଥିଲା। ଏଠାରେ ପ୍ରାଥମିକ ଚିକିତ୍ସା ପରେ ଅବସ୍ଥା ଶଙ୍କଟାପନ୍ନ ହେବାରୁ ତାଙ୍କୁ ବ୍ରହ୍ମପୁର ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। କିନ୍ତୁ ବ୍ରହ୍ମପୁରରେ ପହଞ୍ଚିବା ପୂର୍ବରୁ ରାସ୍ତାରେ ଡାକଙ୍କ ମୃତ୍ୟୁ ଘଟିଥିବା ଜଣାପଡ଼ିଛି। ଦୁର୍ଘଟଣା ସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ଗ୍ୟାସ ବୋଝେଇ ଟ୍ରକକୁ ପୋଲିସ ଥାନାରେ ଅଟକ ରଖିଛି।
