ବ୍ରହ୍ମପୁର, ୧୮/୧୦: ଆଇନଜୀବୀ ତଥା ବିଜେପି ନେତା ପୀତବାସ ପଣ୍ଡା ହତ୍ୟା ମାମଲାକୁ ୧୨ ଦିନ ପୂରିଛି । ଏହି ଘଟଣାର ରହସ୍ୟ ଖୁବ୍ଶୀଘ୍ର ଲୋକଲୋଚନକୁ ଆସିବ ବୋଲି ଆଶା କରାଯାଉଛି । ବିହାର ଅପରାଧୀଙ୍କୁ ଜେରା କରିବା ପରେ ବ୍ରହ୍ମପୁର ମହାନଗର ନିଗମର ଜଣେ କର୍ପୋରେଟରଙ୍କୁ ପୁଲିସ ଉଠାଇ ନେଇଥିବା କୁହାଯାଉଛି । କର୍ପୋରେଟରଙ୍କ ସହ ବିହାରୀ ଅପରାଧୀଙ୍କ କ’ଣ ଲିଙ୍କ୍ ରହିଛି ତାହା ଖୋଳତାଡ଼ ଚାଲିଛି । ପୀତବାସଙ୍କୁ ହତ୍ୟା ପଛରେ ବାଲିଘାଟ ବିବାଦ, କୋର୍ଟ ବାହାରେ ଜମିଜମା ବିବାଦର ସମାଧାନ କିମ୍ବା ପୂର୍ବ ଶତ୍ରୁତା ବୋଲି ସନ୍ଦେହ କରାଯାଉଥିଲା । ଏବେ କର୍ପୋରେଟରଙ୍କୁ ପୁଲିସ ଉଠାଇନେବା ପରେ ହତ୍ୟା ଘଟଣା ଅଲଗା ଦିଗରେ ଯାଉଥିବା ଚର୍ଚ୍ଚା ହେଉଛି । କର୍ପୋରେଟରଙ୍କ ସହ ଅନ୍ୟ କାହାର ସମ୍ପର୍କ ରହିଛି ତାହାର ମଧ୍ୟ ତଥ୍ୟ ଖୋଜୁଛି ପୁଲିସ ।
ପୀତବାସଙ୍କ ହତ୍ୟାକୁ ନେଇ ଗତକାଲି ପୁଲିସ ଡିଜି ଯୋଗେଶ ବାହାଦୁର ଖୁରାନିଆ ଖୁବ୍ଶୀଘ୍ର ଖୁଲାସା ହେବ ବୋଲି କଟକରେ ଗଣମାଧ୍ୟମକୁ ସୂଚନା ଦେଇଥିବାବେଳେ ପୁଲିସ ବିଭିନ୍ନ ତଥ୍ୟକୁ ଆଧାର କରି ଆଉ କିଛି ଲୋକଙ୍କୁ ତଦନ୍ତ ପରିସର କରିଥିବା ସୂଚନା ମିଳିଛି । କର୍ପୋରେଟର ଓ ଅନ୍ୟ ସନ୍ଦିଗ୍ଧମାନଙ୍କୁ ଅଜ୍ଞାତ ଜାଗାରେ ରଖି ପୁଲିସ ଜେରା କରୁଥିବାବେଳେ ଶନିବାର ଏହାର ଖୁଲାସା ହେବ ବୋଲି ଆଶା କରାଯାଉଛି । ପୁଲିସ କିଛି ଗାଡ଼ି ମଧ୍ୟ ଜବତ କରିଥିବା ସୁରାକ୍ ମିଳିଛି । ଅନ୍ୟପକ୍ଷରେ ବିହାର, ପଶ୍ଚିମବଙ୍ଗ ଓ ଦିଲ୍ଲୀରେ ଥିବା ପୁଲିସ ଟିମ୍ ସନ୍ଦିଗ୍ଧମାନଙ୍କୁ ନେଇ ବ୍ରହ୍ମପୁରରେ ପହଞ୍ଚିଥିବା ଜଣାପଡ଼ିଛି । ଗୋଟିଏ ରିଚାର୍ଜ ଦୋକାନରୁ ଜଣେ ଅପରାଧୀ ୟୁପିଆଇ ଜରିଆରେ ବିହାର ଟଙ୍କା ପଠାଇଥିଲା । ୟୁପିଆଇ ଟ୍ରାଞ୍ଜାକସନ୍ ବିହାର ଲିଙ୍କ୍ ଧରାପକାଇଥିବାବେଳେ ଜଣକ ପରେ ଜଣେ ଅଭିଯୁକ୍ତ ପଦାକୁ ଆସୁଥିବା ସୂଚନା ମିଳିଛି । ସେପଟେ ହତ୍ୟା ଘଟଣା ଉପରୁ ପରଦା ହଟି ନ ଥିବାରୁ ଆଜି ତାଙ୍କ ଦ୍ୱାଦଶାହ କାର୍ଯ୍ୟକ୍ରମରେ ତାଙ୍କ ଆତ୍ମୀୟମାନେ ଅସନ୍ତୋଷ ପ୍ରକାଶ କରିଛନ୍ତି ।
ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ପ୍ରକାରେ, ପୀତବାସଙ୍କୁ ହତ୍ୟା କରିବାକୁ କିଛି ହାଇପ୍ରୋଫାଇଲ୍ ବ୍ୟକ୍ତି ଯୋଜନା କରିଥିଲେ । ଦିଗପହଣ୍ଡି ଥାନା ଅଞ୍ଚଳରେ ହତ୍ୟା, ହତ୍ୟା ଉଦ୍ୟମ ଓ ଅନ୍ୟାନ୍ୟ ଅପରାଧିକ ମାମଲା ସହ ଜଡ଼ିତ ଅପରାଧୀ ଏଥିରେ ସମ୍ପୃକ୍ତ ଥିବା କୁହାଯାଉଥିବାବେଳେ ବର୍ତ୍ତମାନ ପର୍ଯ୍ୟନ୍ତ ସେହି ସନ୍ଦିଗ୍ଧ ଧରାପଡ଼ି ନ ଥିବା ସୂଚନା ମିଳିଛି ।
ସୂଚନାଯୋଗ୍ୟ, ୨୦୨୫ ଅକ୍ଟୋବର ୬ ତାରିଖ କୁମାର ପୂର୍ଣ୍ଣିମା ରାତିରେ ଆଇନଜୀବୀ ପୀତବାସ ପଣ୍ଡା ଏସ୍ଏନ୍ଟି ରୋଡ଼ରେ ଥିବା ତାଙ୍କ ବ୍ୟକ୍ତିଗତ ଚାମ୍ବରରୁ ଫେରି ନୂଆ ବସ୍ଷ୍ଟାଣ୍ଡ୍ରେ ଥିବା ଭୂପତି ହୋଟେଲକୁ ଯାଇଥିଲେ । ସେଠାରୁ ଖାଦ୍ୟ ପାର୍ସଲ ନେଇ ଘରକୁ ଯାଉଥିବା ବେଳେ ରାତି ୯ଟା ୫୮ରେ ବୈକୁଣ୍ଠନଗର ବୁଲାଣିରେ ତାଙ୍କୁ ଗୁଳି କରି ହତ୍ୟା କରିଥିଲେ ଦୁର୍ବୃତ୍ତ । ଅପରାଧୀମାନେ ଘଟଣାର ପୂର୍ବରୁ ମଧ୍ୟ ସେହି ସ୍ଥାନକୁ ଆସି ତାଙ୍କ କ୍ରାଇମ୍ ପ୍ଲାନ୍ ପ୍ରସ୍ତୁତ କରି ରଖିଥିଲେ । କୁମାରପୂର୍ଣ୍ଣିମାରେ ସେମାନେ ସୁବିଧା ଦେଖି ପୀତବାସଙ୍କୁ ହତ୍ୟା କରିଥିଲେ । ଏହି ହତ୍ୟାକାଣ୍ଡର ତଦନ୍ତ ପାଇଁ ବ୍ରହ୍ମପୁର ଓ ଗଞ୍ଜାମ ପୁଲିସ ଜିଲ୍ଲାର ବଛା ବଛା ପୁଲିସ ଅଧିକାରୀ ନିୟୋଜିତ ହୋଇଛନ୍ତି । ଖୁବ୍ଶୀଘ୍ର ଘଟଣାର ଖୁଲାସା ହେବା ଆଶା କରାଯାଉଛି ।
