ନୂଆଦିଲ୍ଲୀ: ଜୁନ୍ ୧୨ ରେ ଅହମ୍ମଦାବାଦରେ ହୋଇଥିବା ଏୟାର ଇଣ୍ଡିଆ ବିମାନ ଦୁର୍ଘଟଣା କେବଳ ଯାତ୍ରୀ ମାନଙ୍କୁ ପ୍ରଭାବିତ କରିନି, ବରଂ ଏୟାରଲାଇନ୍ କର୍ମଚାରୀ,ବିଶେଷ କରି ପାଇଲଟ୍ ମାନଙ୍କୁ ଗଭୀର ଭାବରେ ପ୍ରଭାବିତ କରିଥିଲା। ଏହି ଦୁର୍ଘଟଣା ପରେ ଏୟାର ଇଣ୍ଡିଆ ପାଇଲଟ ମାନଙ୍କ ମଧ୍ୟରେ ମାନସିକ ଚାପ ବୃଦ୍ଧି ପାଇଛି, ଯେଉଁ କାରଣରୁ ଅସୁସ୍ଥତା ଯୋଗୁଁ ଛୁଟି ନେବାର ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଇଛି।
ଜୁନ୍ ୧୬ ତାରିଖରେ ଅର୍ଥାତ ଦୁର୍ଘଟଣାର ମାତ୍ର ଚାରି ଦିନ ପରେ, ୧୧୨ ଜଣ ପାଇଲଟ ଅସୁସ୍ଥ ଥିବା ରିପୋର୍ଟ କରିଥିଲେ। ଏଥିରେ ୬୧ ଜଣ ପ୍ରଥମ ଅଧିକାରୀ (ସହ-ପାଇଲଟ୍) ଏବଂ ୫୧ ଜଣ କମାଣ୍ଡର (ମୁଖ୍ୟ ପାଇଲଟ୍) ସାମିଲ ଥିଲେ। ଏହି ପରିସ୍ଥିତି କେବଳ ଏୟାର ଇଣ୍ଡିଆ ପାଇଁ ଚିନ୍ତାର ବିଷୟ ନୁହେଁ, ବରଂ ସମଗ୍ର ବିମାନ ଶିଳ୍ପ ପାଇଁ ଏକ ଗମ୍ଭୀର ସମସ୍ୟା ପାଲଟିଛି।
ପାଇଲଟ ମାନଙ୍କ ମଧ୍ୟରେ ବଢ଼ୁଥିବା ମାନସିକ ଚାପକୁ ଦୃଷ୍ଟିରେ ରଖି, ସିଭିଲ ଏଭିଏସନ୍ ମହାନିର୍ଦ୍ଦେଶାଳୟ (ଡିଜିସିଏ) ସମସ୍ତ ଏୟାର ଲାଇନ୍ସକୁ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଜାରି କରିଛି। ଡିଜିସିଏ ପରାମର୍ଶ ଦେଇଛି ଯେ,ଏୟାରଲାଇନ୍ସ ସେମାନଙ୍କର ବିମାନ କର୍ମଚାରୀ, ଯଥା ପାଇଲଟ୍ ଏବଂ ସହ-ପାଇଲଟ୍ ଏବଂ ଏୟାର ଟ୍ରାଫିକ୍ ନିୟନ୍ତ୍ରକ (ଏଟିସିଓ) ପାଇଁ ମାନସିକ ସ୍ୱାସ୍ଥ୍ୟ ସମ୍ବନ୍ଧୀୟ ସ୍ୱତନ୍ତ୍ର ତାଲିମ ଆରମ୍ଭ କରିବା ଉଚିତ।
ଏହି ତାଲିମର ଉଦ୍ଦେଶ୍ୟ ହେଉଛି ମାନସିକ ସ୍ୱାସ୍ଥ୍ୟ ସମସ୍ୟା ଚିହ୍ନଟ କରିବା ଏବଂ ସମାଧାନ କରିବା। ଏହା ସହିତ, ଡିଜିସିଏ ବିମାନ କମ୍ପାନୀ ଗୁଡ଼ିକୁ ଏପରି ଏକ ବ୍ୟବସ୍ଥା ସୃଷ୍ଟି କରିବାକୁ ପରାମର୍ଶ ଦେଇଛନ୍ତି ଯେଉଁଥିରେ କର୍ମଚାରୀ ମାନେ ପାରସ୍ପରିକ ସହଯୋଗ ବୃଦ୍ଧି କରିପାରିବେ।
ସଂସଦରେ ଏହି ପ୍ରସଙ୍ଗର ଉତ୍ତର ଦେଇ ବେସାମରିକ ବିମାନ ଚଳାଚଳ ମନ୍ତ୍ରୀ ରାମ ମୋହନ ନାଇଡୁ କହିଛନ୍ତି ଯେ, ମାନସିକ ସ୍ୱାସ୍ଥ୍ୟ ବିମାନ ଶିଳ୍ପରେ ସୁରକ୍ଷାର ଏକ ଗୁରୁତ୍ୱପୂର୍ଣ୍ଣ ଅଂଶ। ସେ କହିଛନ୍ତି ଯେ, ଡିଜିସିଏ ସମସ୍ତ ଏୟାରଲାଇନ୍ସକୁ ସେମାନଙ୍କର କର୍ମଚାରୀଙ୍କ ପାଇଁ ମାନସିକ ସ୍ୱାସ୍ଥ୍ୟ ସଚେତନତା ପ୍ରୋତ୍ସାହିତ କରିବାକୁ ନିର୍ଦ୍ଦେଶ ଦେଇଛି। ଏଥିରେ କର୍ମଚାରୀ ମାନଙ୍କୁ ଚାପ ମୁକାବିଲା କରିବା, ମାନସିକ ସ୍ୱାସ୍ଥ୍ୟ ସମସ୍ୟା ବୁଝିବା ଏବଂ ଉଚିତ ସମୟରେ ସାହାଯ୍ୟ ପାଇବାକୁ ଉତ୍ସାହିତ କରିବା ଉପରେ ଗୁରୁତ୍ୱ ଦିଆଯିବ।
ସୂଚନାଥାଉକି, ଅହମ୍ମଦାବାଦରୁ ଲଣ୍ଡନ ଯାଉଥିବା ଏୟାର ଇଣ୍ଡିଆ ବିମାନ ଦୁର୍ଘଟଣାଗ୍ରସ୍ତ ହୋଇଥିଲା, ଯେଉଁଥିରେ ୨୬୦ ରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା। ଉଡ଼ାଣ ଆରମ୍ଭ ହେବାର ୩୨ ସେକେଣ୍ଡ ପରେ ବିମାନଟି ଏକ ମେଡିକାଲ କଲେଜ କ୍ୟାମ୍ପସରେ ଦୁର୍ଘଟଣାଗ୍ରସ୍ତ ହୋଇଥିଲା।
