ନୂଆଦିଲ୍ଲୀ,୪।୬: ‘ଅପରେସନ୍ ସିନ୍ଦୂର’ ର ଝଟକା ପରେ ପାକିସ୍ତାନ ଏବେ ଭାରତ ସହ ଆଲୋଚନା କରିବାକୁ ଚାହେଁ। ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ଶରିଫ୍ଙ୍କ ପରେ ଏବେ ପୂର୍ବତନ ବୈଦେଶିକ ମନ୍ତ୍ରୀ ବିଲାଓ୍ବଲ ଭୁଟ୍ଟୋ ଜର୍ଦ୍ଦାରୀ ଏଭଳି ଇଛା ପ୍ରକାଶ କରିଛନ୍ତି। ସେ ଦୁଇ ଦେଶର ଗୁଇନ୍ଦା ଏଜେନ୍ସି ଅର୍ଥାତ ଆଇଏସଆଇ ଓ ର’ ଅଧିକାରୀଙ୍କ ଭିତରେ ଆଲୋଚନା କରିବାକୁ ପରାମର୍ଶ ଦେଇଛନ୍ତି। ଖାସ୍ କଥା ଏହା ଯେ, ଭାରତ ଭଳି ହିଁ ପାକିସ୍ତାନ ମଧ୍ୟ ନିଜର ପ୍ରତିନିଧି ମଣ୍ଡଳୀ ଆମେରିକା ପଠାଇଛି।
ୟୁଏନ୍ ବ୍ରିଫିଙ୍ଗରେ ସାମିଲ ହୋଇଥିବା ଭୁଟ୍ଟୋ ଭାରତ ସହ ସମାଧାନର କଥା କହିଛନ୍ତି। ଭୁଟ୍ଟୋ କହିଛନ୍ତି, ପାକିସ୍ତାନ ଏବେ ବି ଆତଙ୍କବାଦ ବିରୋଧ ଯୁଦ୍ଧରେ ଭାରତର ସହଯୋଗ କରିବାକୁ ଚାହେଁ। ଆମେ କୋଟି କୋଟି ଲୋକଙ୍କ ଭବିଷ୍ୟତର ନନ୍ ଷ୍ଟେଟ୍ ଆକ୍ଟର୍ସ ଓ ଆତଙ୍କବାଦୀଙ୍କୁ ହାତରେ ଛାଡି ପାରିବାନି। ମୋତେ ସମ୍ପୂର୍ଣ୍ଣ ଭରସା ରହିଛି ଯଦି ଆଇଏସଆଇ ଓ ‘ର’ ଯଦି ଏକାଠି ଲଢନ୍ତି ତେବେ ଆତଙ୍କବାଦ ଦୂର ହେବ ।
କୁହାଯାଉଛି ଯେ, ବିଲାଓ୍ବଲଙ୍କ ଏହି ନରମ ଆଭିମୁଖ୍ୟ ‘ଅପରେସନ୍ ସିନ୍ଦୂର’ ରୁ ପାକିସ୍ତାନ କେତେ ଦୂର ପ୍ରଭାବିତ ହୋଇଛି ଓ ଶାନ୍ତି ଚାହୁଁଛି ତାହା ଦର୍ଶାଉଛି । ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ଶରିଫ୍ ଅଜରବୈଜାନର ଲଚିନରେ ପାକିସ୍ତାନ-ତୁର୍କୀ-ଅଜରବୈଜାନ ତ୍ରିପାକ୍ଷୀୟ ଶିଖର ସମ୍ମିଳନୀରେ ଭାରତ ସହ ଆଲୋଚନା କରିବାକୁ ଇଛା ପ୍ରକାଶ କରିଥିଲେ। ସେ କହିଥିଲେ, ଦୁଇ ପକ୍ଷ ସହ ବସି କାଶ୍ମୀର, ପାଣି ଓ ଆତଙ୍କବାଦ ସହିତ ସବୁ ପ୍ରସଙ୍ଗର ସମାଧାନ କରିବା ଦରକାର। ଭାରତ ଓ ପାକିସ୍ତାନ ଭିତରେ ଆଲୋଚନା ଉପରେ ଜୋର ଦେବାର ଶେହବାଜଙ୍କ ଏହା ସେହି ସପ୍ତାହର ଦ୍ବିତୀୟ ବୟାନ ଥିଲା। ଶରିଫ୍ ତେହରାନରେ ସୋମବାର କହିଥିଲେ ସେ ସବୁ ବିବାଦର ସମାଧାନ କରିବା ପାଇଁ ଭାରତ ସହ ଆଲୋଚନା କରିବାକୁ ପ୍ରସ୍ତୁତ।
