ଅହମ୍ମଦାବାଦ,୧୨/୦୭: ଗତ ଜୁନ୍ ୧୨ରେ ହୋଇଥିବା ଭୟଙ୍କର ଅହମ୍ମଦାବାଦ ପ୍ଲେନ୍ କ୍ରାସ୍ର ଚକିତ କଲା ପରି ତଦନ୍ତ ରିପୋର୍ଟ ସାମ୍ନାକୁ ଆସିଛି । ଭାରତୀୟ ବିମାନ ଯାଞ୍ଚ ବ୍ୟୁରୋ ତାର ପ୍ରାରମ୍ଭିକ ରିପୋର୍ଟ ଜାରି କରିଛି । ଏଏଆଇବି ପକ୍ଷରୁ ୧୫ ପୃଷ୍ଠାର ପ୍ରଥାମିକ ରିର୍ପୋଟରେ ଚକିତ କରିବା ପରି ତଥ୍ୟ ରହିଛି । ଏୟାର ଇଣ୍ଡିଆର ବୋଇଂ ୭୮୭-୮ ଡ୍ରିମ୍ଲାଇନର ବିମାନ-୧୭୧ ଟେକ୍ଅଫ୍ର କିଛି ସେକେଣ୍ଡ ମଧ୍ୟରେ ଦୁଇଟି ଇଞ୍ଜିନ ଅଚାନକ୍ ବନ୍ଦ ହୋଇଯାଇଥିଲା । ଫଳରେ ବିମାନକୁ ପାୱର ମିଳି ନଥିଲା ଏବଂ ତାହା କ୍ରାସ୍ ହୋଇଥିଲା । ସେହି ସମୟରେ ଦୁଇ ପାଇଲଟଙ୍କ ମଧ୍ୟରେ ହୋଇଥିବା କଥାବାର୍ତ୍ତା ମଧ୍ୟ ସାମ୍ନାକୁ ଆସିଛି । ଯାହା ଆଶ୍ଚର୍ଯ୍ୟଜନକ ।
ତଦନ୍ତ ରିପୋର୍ଟ- ଏୟାରକ୍ରାଫ୍ଟ ଆକ୍ସିଡେଣ୍ଟ ଇନ୍ଭେଷ୍ଟିଗେସନ ବ୍ୟୁରୋର ତଦନ୍ତ ରିପୋର୍ଟ ଅନୁସାରେ, ବିମାନର ଦୁଇଟି ଯାକ ଇଞ୍ଜିନରେ ଇନ୍ଧନ ଯୋଗାଣକୁ ନିୟନ୍ତ୍ରଣ କରୁଥିବା ସୁଇଚ ବନ୍ଦ ଥିଲା । ଏଥିଯୋଗୁ ବିମାନ ଉଡ଼ାଣ ଭରିବା କ୍ଷଣି ଇଞ୍ଜିନରେ ଥ୍ରଷ୍ଟ (ଶକ୍ତି) ଶେଷ ହୋଇଯାଇଥିଲା । ପାଇଲଟ ସାଧାରଣତଃ ଏହି ସୁଇଚ ଇଞ୍ଜିନ ଚାଲୁ କରିବା, ବନ୍ଦ କରିବା କିମ୍ବା କୌଣସି ଜରୁରିକାଳୀନ ସ୍ଥିତିରେ ଇଞ୍ଜିନ ରିସେଟ୍ କରିବା ଲାଗି ବ୍ୟବହାର କରିଥାନ୍ତି । ଦୁର୍ଘଟଣାରେ ପ୍ରାରମ୍ଭିକ ଯାଞ୍ଚ ରିପୋର୍ଟ ଖୁବ୍ଶୀଘ୍ର ସାର୍ବଜନିନ କରାଯାଇପାରେ ।
ପାଇଲଟଙ୍କ ମଧ୍ୟରେ ହୋଇଥିବା କାଥାବାର୍ତ୍ତା- ରିପୋର୍ଟରେ ଫ୍ଲାଇଟ୍ର ଦୁଇ ପାଇଲଟ ସୁମିତ ସବରୱାଲ ଏବଂ କୋ-ପାଇଲଟ କ୍ଲାଇବ କୁନ୍ଦରଙ୍କ ମଧ୍ୟରେ ହୋଇଥିଲା କଥାବାର୍ତ୍ତା ବି ସାମ୍ନାକୁ ଆସିଛି । ଅଚାନକ ଇଞ୍ଜିନ ବନ୍ଦ ହେବା ପରେ ଦୁଇ ପାଇଲଟ ଦ୍ବନ୍ଦରେ ପଡିଥିଲେ । ଇଞ୍ଜିନ୍ କାହିଁକି ବନ୍ଦ ହେଲା ଏହା ସବୁଠୁ ବଡ଼ ପ୍ରଶ୍ନ ଥିଲା । ବ୍ଲାକବକ୍ସ କାକ୍ପିଟ୍ ରେକର୍ଡିଂରୁ ପାଇଲଟଙ୍କ ମଧ୍ୟରେ ହୋଇଥିବା କଥାବାର୍ତ୍ତା ସାମ୍ନାକୁ ଆସିଛି । କୋ-ପାଇଲଟଙ୍କ ହାତରେ କଣ୍ଟ୍ରୋଲ ଥିଲା କ୍ୟାପ୍ଟେନ୍ ମନିଟରିଂ କରୁଥିଲେ ।
.ପ୍ରଥମ ପାଇଟଲ : ''ତୁମେ ସୁଇଚ୍ ବନ୍ଦ କରିଛ ?''
.ଦ୍ୱିତୀୟ : '' ମୁଁ କରିନାହିଁ ''
ତେବେ ପାଇଲଟ ଦୁହେଁ ଜାଣିଶୁଣି ଇଞ୍ଜିନ୍ ବନ୍ଦ କରିନାହାନ୍ତି । ରିପୋର୍ଟରୁ ଜଣାପଡିଛି କି ଯାନ୍ତ୍ରିକ ତ୍ରୁଟି ପାଇଁ ଏମିତି ହୋଇଥିବା ଅନୁମାନ କରାଯାଉଛି । ମନୁଷ୍ୟକୃତ ତ୍ରୁଟି ଥିବା ବି ହୋଇଥାଇପାରେ । ବିମାନ ଦୁର୍ଘଟଣାର ବିସ୍ତୃତ ଯାଞ୍ଚ ଏବେ ବି ଚାଲିଛି । ତେବେ ଦୁଇ ଇଞ୍ଜିନ୍ ଅଚାନକ୍ କେମିତି ବନ୍ଦ ହେଲା ତାର ତଦନ୍ତ ଚାଲିଛି ।
କହି ରଖୁଛୁ କି, ଜୁନ୍ ୧୨ ତାରିଖରେ ହୋଇଥିବା ଅହମ୍ମଦାବାଦ ବିମାନ ଦୁର୍ଘଟଣା ଦେଶକୁ ଦୋହଲାଇ ଦେଇଥିଲା । ଲଣ୍ଡନ ଯାଉଥିବା ବିମାନ ଏଆଇ ୧୭୧ ଉଡ଼ାଣ ଭରିବାର ମାତ୍ର ୩୦ ସେକେଣ୍ଡ ଭିତରେ ଏକ ମେଡିକାଲ ହଷ୍ଟେଲ ଛାତକୁ ଧକ୍କା ଦେଇ ଦୁର୍ଘଟଣାଗ୍ରସ୍ତ ହୋଇଥିଲା । ଏଥିରେ ୨୪୧ ଜଣ ଯାତ୍ରୀ, କ୍ରୁ ସଦସ୍ୟଙ୍କ ସମେତ ମୋଟ୍ ୨୭୦ ଜଣଙ୍କର ମୃତ୍ୟୁ ହୋଇଥିଲା । ସୌଭାବ୍ୟବଶତଃ ଜଣେ ଯାତ୍ରୀ ଦୁର୍ଘଟଣାରୁ ବର୍ତ୍ତି ଯାଇଥିଲେ ।
