ଅହମ୍ମଦାବାଦ- ଦୁଷ୍କର୍ମ ମାମଲାରେ ଆଜୀବନ ସଜା କାଟୁଥିବା ଆଶାରାମ ବାପୁଙ୍କ ଠାରୁ ଅହମ୍ମଦାବାଦ ଆଶ୍ରମ ନେଇ ପାରନ୍ତି ଗୁଜରାଟ ସରକାର। ଯେଉଁଠି ଏବେ ଆସାରାମଙ୍କର ଆଶ୍ରମ ରହିଛି ସମ୍ଭବ ଯେ , ସେଠାରେ ୨୦୩୬ରେ ସାରା ବିଶ୍ୱର ଖେଳାଳି ଅଲିମ୍ପିକ ମେଡାଲ ପାଇଁ ପ୍ରତିଯୋଗିତା କରୁଥିବେ। ସାରାବିଶ୍ୱର ସବୁଠୁ ବଡ଼ ଖେଳ ଆୟୋଜକ ଭାବେ ଦାବି କରିବା ପାଇଁ ଗୁଜରାଟର ଅହମ୍ମଦାବାଦରେ ଜୋରସୋରରେ ପ୍ରସ୍ତୁତି ଚଲାଉଛି। ଏଥିପାଇଁ ଯେଉଁ ମାଷ୍ଟର ପ୍ଲାନ୍ କରାଯାଇଛି , ଏହାର ପରିସରରେ ଆଶାରାମଙ୍କ ଆଶ୍ରମ ମଧ୍ୟ ରହିଛି।
ଟାଇମ୍ସ ଅଫ୍ ଇଣ୍ଡିଆ ସୂତ୍ରାନୁସାରେ , ଏକ ରିପୋର୍ଟରେ କୁହାଯାଇଛି ଯେ, ଅହମ୍ମଦାବାଦର ମୋଟେରା ସ୍ଥିତ ଆସାରାମର ଆଶ୍ରମର ସରକାର ଅଧିଗ୍ରହଣ କରିପାରେ। ନରେନ୍ଦ୍ର ମୋଦି ଷ୍ଟାଡିୟମର ନିକଟରେ ୩ଟି ଆଶ୍ରମକୁ ହଟାଇ ସେଠାରେ ସର୍ଦ୍ଦାର ପଟେଲ ସ୍ପୋର୍ଟ୍ସ ଏନକ୍ଲେଭ୍ , ଅଲିମ୍ପିକ ଭିଲେଜ୍ ଓ ଅନ୍ୟ ଖେଳ ସୁବିଧା ଗୁଡ଼ିକର ବିକାଶ କରାଯାଇ ପାରେ।
ରିପୋର୍ଟରେ କୁହାଯାଇଛି ଯେ, ‘ସନ୍ଥ ଶ୍ରୀ ଆସାରାମ ଆଶ୍ରମ’ ବ୍ୟତୀତ ଭାରତୀୟ ସେବା ସମାଜ ଓ ସଦାଶିବ୍ ପ୍ରଜ୍ଞା ମଣ୍ଡଳକୁ ମଧ୍ୟ ସିଫ୍ଚ କରାଯାଇ ପାରେ। ସୂତ୍ରାନୁସାରେ କୁହାଯାଇଛି ଯେ , ଏହି ଆଶ୍ରମ ଗୁଡ଼ିକର ଜମିକୁ ଅଧିଗ୍ରହଣ କରି ଏହି ଟ୍ରଷ୍ଟକୁ ବୈକଳ୍ପିକ ସ୍ଥାନ ଦେବାର ପ୍ରକ୍ରିୟା ଚାଲୁ ରହିଛି। ଅହମ୍ମଦାବାଦ ମ୍ୟୁନିସିପାଲ କମିଶନର , ଅହମ୍ମଦାବାଦ ଡିଷ୍ଟ୍ରିକ୍ଟ କଲେକ୍ଟରଙ୍କ ସମେତ ତିନି ସଦସ୍ୟ ବିଶିଷ୍ଟ କମିଟି ମାଷ୍ଟର ପ୍ଲାନ ପାଇଁ ଜମି ଅଧିଗ୍ରହଣ ପ୍ରକ୍ରିୟାରେ ଲାଗିଛନ୍ତି।
୮୬ ବର୍ଷିୟ ଆସାରାମ ୩୧ ମାର୍ଚ୍ଚ ଯାଏ ଅନ୍ତରୀଣ ଜାମିନରେ ମୁକ୍ତ ହୋଇଛନ୍ତି। ଏହା ପୂର୍ବରୁ ସେ ରାଜସ୍ଥାନର ଯୋଧପୁର ଜେଲ୍ରେ ଥିଲେ। ସୁପ୍ରିମକୋର୍ଟ ଗୁଜରାଟରେ ଦୁଷ୍କର୍ମର ଏକ ମାମଲାରେ ଆସାରାମଙ୍କୁ ଅନ୍ତରୀଣ ଜାମିନ୍ରେ ମୁକ୍ତି କରିଛନ୍ତି। ଏହି ମାମଲାରେ ସେସନ କୋର୍ଟ ଜାନୁଆରୀ ୨୦୨୩ରେ ତାଙ୍କୁ ଦୋଷୀ ସାବ୍ୟସ୍ତ କରିଥିଲେ ଏବଂ ଆଜୀବନ ଜେଲଦଣ୍ଡ ଶୁଣାଇ ଥିଲେ।
