ଭୁବନେଶ୍ୱର,୧୮/୦୪ (ପ୍ରଜ୍ଞା ଚୌଧୁରୀ): ପାଠ ଠକଙ୍କ ଦୁଃଖ । ଆଉ ସେମାନେ ସହପାଠୀଙ୍କୁ କହି ମିଛ ଉପସ୍ଥାନ (ପ୍ରକ୍ସି) ପକାଇ ପାରୁନାହାନ୍ତି ବା କ୍ଲାସ ବଙ୍କ୍ ମାରିପାରୁ ନାହାନ୍ତି । କେବଳ ଏତିକି ନୁହେଁ, ଅଧ୍ୟାପକ ଅଧ୍ୟାପିକାଙ୍କୁ ମଧ୍ୟ ଆଉ ନାଁ ଡାକି ଡାକି ପିଲାଙ୍କ ଉପସ୍ଥାନ ନେବାକୁ ପଡୁନାହିଁ । ଗୁଣାତ୍ମକ ଶିକ୍ଷାଦାନ ଦିଗରେ ସମୟ ନଷ୍ଟ ମଧ୍ୟ ହେଉନି । କାରଣ ଏଇ ଦାୟିତ୍ୱ ମୁଣ୍ଡାଇଲାଣି କୃତ୍ରିମ ବୁଦ୍ଧିମତ୍ତା ବା ଏଆଇ (ଆର୍ଟିଫିସିଆଲ ଇଣ୍ଟେଲିଜେନ୍ସ) । ମାତ୍ର ୨-୩ ମିନିଟ୍ରେ ପୂରା କ୍ସାସରେ ଉପସ୍ଥିତ ଛାତ୍ରଛାତ୍ରୀଙ୍କ ଉପସ୍ଥାନ ସଂଗ୍ରହ କରିବା ସହ ମାସିକ, ବାର୍ଷିକ ରେକର୍ଡ ମଧ୍ୟ ପ୍ରସ୍ତୁତ କରିହେଉଛି । ରାଜ୍ୟରେ ପ୍ରଥମ କରି ଶ୍ରେଣୀଗୃହରେ ଏଆଇ ଟେକ୍ନୋଲୋଜି ଆପଣାଇଛି ଓଡ଼ିଶା ବୈଷୟିକ ଓ ଗବେଷଣା ବିଶ୍ୱବିଦ୍ୟାଳୟ(ଓୟୁଟିଆର) ।
ବିଶ୍ୱବିଦ୍ୟାଳୟ ନିଜର ଟେକ୍ନୋଲୋଜି ବିଜନେସ ଇନକ୍ୟୁବେଟର୍ ଓୟୁଟିଆର୍- ଫାଇନ୍ (ଏଫଆଇଏନଇ) ଜରିଆରେ ‘ଜାଜି’(ଜେଏଜେଡ୍ଜେଡ୍ଇଇ) ନାମକ ଏକ ଷ୍ଟାର୍ଟଅପ୍ କମ୍ପାନୀ ସହାୟତାରେ ଏହି ନବସୃଜନ ପଦ୍ଧତି ସୃଷ୍ଟି କରିଛି । କମ୍ପାନୀ ପ୍ରତିଷ୍ଠାତା ସୁଚିତ୍ ମିଶ୍ରଙ୍କ କହିବା ହେଲା, କ୍ୟାବ୍ ଟେକ୍ନୋଲୋଜିରୁ ଅନୁପ୍ରାଣିତ ହୋଇ ଏହି ଆପ୍ ତିଆରି କରାଯାଇଛି । ପରୀକ୍ଷାମୂଳକ ଭାବରେ କମ୍ପ୍ୟୁଟର ସାଇନ୍ସ, ମେକାନିକାଲ୍ ଏବଂ ବାୟୋଟେକ୍ନୋଲୋଜି ବିଭାଗର ଦ୍ୱିତୀୟ ଏବଂ ତୃତୀୟ ବର୍ଷ କ୍ଲାସରେ ଏହାକୁ ପ୍ରୟୋଗ କରାଯାଇଛି ।
ଆସନ୍ତା ଜୁଲାଇ ମାସରୁ ସମସ୍ତ ବିଭାଗରେ ଏହାକୁ ବ୍ୟବହାର କରାଯିବ । ଏହି ଅଟୋମେଟେଡ୍ ଆଟେଣ୍ଡାନ୍ସ ପଦ୍ଧତି ଦ୍ୱାରା ଅଧ୍ୟାପକ ଏବଂ ଛାତ୍ରଛାତ୍ରୀ ଉଭୟେ ଉପକୃତ ହେଉଛନ୍ତି । ସାଧାରଣତଃ ବିଟେକ୍ ପାଠ୍ୟକ୍ରମରେ ଗୋଟିଏ ଗୋଟିଏ କ୍ସାସରେ ଛାତ୍ରଛାତ୍ରୀଙ୍କ ସଂଖ୍ୟା ପ୍ରାୟ ୧୦୦ କିମ୍ବା ତା’ଠାରୁ ଅଧିକ ଥାଏ । ଗୋଟିଏ ପିରିୟଡ୍ ୬୦ ମିନିଟ୍ର ହୋଇଥାଏ । ଏତେ ସଂଖ୍ୟକ ଛାତ୍ରଛାତ୍ରୀଙ୍କ ଉପସ୍ଥାନ ନେବାକୁ ଜଣେ ଅଧ୍ୟାପକଙ୍କୁ ପ୍ରାୟ ୩୦ ମିନିଟ୍ ସମୟ ଲାଗିଯାଏ । ଏହାବାଦ୍ ପାଠ ଠକମାନେ ସାଙ୍ଗସାଥୀଙ୍କୁ କହି ପ୍ରକ୍ସି ମଧ୍ୟ ଲଗାଇଥାନ୍ତି । ପ୍ରତି କ୍ସାସରେ ୩୦ ମିନିଟ୍ ସମୟ ନଷ୍ଟ ଦ୍ୱାରା ପିଲାଙ୍କୁ ଫଳପ୍ରଦ ଶିକ୍ଷା ପ୍ରଦାନ କ୍ଷେତ୍ରରେ ବାଧା ସୃଷ୍ଟି ହୋଇଥାଏ। ତେବେ ଏଆଇ ଉପସ୍ଥାନ ପଦ୍ଧତି ଦ୍ୱାରା ଏ ସବୁ ମୁଣ୍ଡବ୍ୟଥା ଦୂର ହୋଇଛି ।
ଏଆଇ ଉପସ୍ଥାନ ଲାଗି ଉଭୟ ଅଧ୍ୟାପକ ଏବଂ ଛାତ୍ରଛାତ୍ରୀଙ୍କୁ ଗୋଟିଏ ଗୋଟିଏ ମୋବାଇଲ୍ ଆପ୍ ଦିଆଯାଇଛି । ଅଧ୍ୟାପକ କ୍ସାସରୁମକୁ ଆସିବା ପରେ ନିଜ ମୋବାଇଲରେ ଆପ୍ଟିକୁ ଓଟିପି ଦ୍ୱାରା ଲଗ୍ ଇନ୍ କରିବାକୁ ପଡିବ । ଏହାପରେ ଏକ କ୍ୟୁଆର୍ କୋର୍ଡ ଜେନେରେଟ୍ ହେବ, ଯାହାର ଅବଧି କେବଳ ୧୦ ମିନିଟ୍ ପାଇଁ । ଏହି କ୍ୟୁଆର୍ ସ୍କାନର୍ ଶ୍ରେଣୀଗୃହରେ ପିଲାଙ୍କୁ ସ୍କାନ କରିବା ସହ ଉପସ୍ଥିତ ସବୁ ଛାତ୍ରଛାତ୍ରୀଙ୍କ ମୋବାଇଲକୁ ଏକ ନୋଟିଫିକେସ୍ ଛାଡିବ । ଛାତ୍ରଛାତ୍ରୀମାନେ ନିଜ ଫୋନରେ ଇନଷ୍ଟାଲ୍ ଥିବା ଆପ୍ ଖୋଲି ନୋଟିଫିକେସନ୍ରେ କ୍ଲିକ୍ କରି ନିଜ ଉପସ୍ଥିର୍ର ପ୍ରମାଣ ଦେବେ । ତେବେ କ୍ଲାସରୁମର ନିର୍ଦ୍ଦିଷ୍ଟ ପରିଧି ଭିତରେ ହିଁ ଏହି ଆପ୍ କାମ କରିବ, କ୍ସାସ୍ ବାହାରେ ଥିବା ପିଲା ଏହାକୁ ବ୍ୟବହାର କରିପାରିବେ ନାହିଁ
