ମୁମ୍ବାଇ: ଏୟାର ଇଣ୍ଡିଆର ଜଣେ ୨୫ ବର୍ଷୀୟା ପାଇଲଟ୍ ମୁମ୍ବାଇର ନିଜ ଫ୍ଳାଟରେ ଆତ୍ମହତ୍ୟା କରିଥିବା ଜଣାପଡ଼ିଛି । ଏହି ଘଟଣାରେ ଯୁବତୀଙ୍କ ପ୍ରେମିକଙ୍କୁ ପୋଲିସ ଗିରଫ କରିଛି । ପୋଲିସ ପାଖରୁ ମିଳିଥିବା ସୂଚନା ଅନୁସାରେ, ଅନ୍ଧେରିରେ ଥିବା ଏକ ଫ୍ଲାଟରୁ ପାଇଲଟ୍ ସୃଷ୍ଟି ତୁଲିଙ୍କ ମୃତଦେହ ଜବତ ହୋଇଥିଲ । ବେକରେ ଡାଟା କେବୁଲ ଲଗାଇ ସେ ଆତ୍ମହତ୍ୟା କରିଥିବା ପୋଲିସ କହିଛି । ଘଟଣାସ୍ଥଳରୁ କୌଣସି ସୁଇସାଇଡ୍ ନୋଟ ମିଳିନାହିଁ । ମୃତ ଯୁବତୀଙ୍କ ପରିବାର ଲୋକଙ୍କ ଅଭିଯୋଗ କ୍ରମେ ତାଙ୍କ ପ୍ରେମିକ ୨୭ ବର୍ଷୀୟ ଆଦିତ୍ୟ ପଣ୍ଡିତଙ୍କୁ ମଙ୍ଗଳବାର ପୋଲିସ ଗିରଫ କରିଛି ।
ମୃତ ଯୁବତୀଙ୍କ ଦାଦାଙ୍କ ଅଭିଯୋଗ ଅନୁଯାୟୀ, ଆଦିତ୍ୟ ଅନେକ ସମୟରେ ସୃଷ୍ଟିଙ୍କୁ ସାର୍ବଜନୀନ ସ୍ଥାନରେ ଅପମାନିତ କରିଥିଲେ । ଏପରିକି ଖାଦ୍ୟ ଅଭ୍ୟାସ ପରିବର୍ତ୍ତନ କରିବାକୁ ଆଦ୍ୟତ ଚାପ ପକାଇବା ସହ ସୃଷ୍ଟିଙ୍କୁ ଆମିଷ ଖାଇବାକୁ ବାଧ୍ୟ କରୁଥିଲେ । ଘଟଣା ଦିନ ସୃଷ୍ଟି, ଆଦିତ୍ୟଙ୍କୁ ଫୋନ୍ କରି ଆତ୍ମହତ୍ୟା କରିବେ ବୋଲି କହିଥିଲେ । ଏହି ସମୟରେ ପଣ୍ଡିତ ଦିଲ୍ଲୀ ଯାଉଥିଲେ । ସୃଷ୍ଟିଙ୍କ ପାଖରୁ ଫୋନ୍ ପାଇ ସେ ତୁରନ୍ତ ମୁମ୍ବାଇ ଫେରିଆସିଥିଲେ ।
ସେ ସୃଷ୍ଟି ରହୁଥିବା ଫ୍ଲାଟର କବାଟ ଖୋଲି ଦେଖିଲା ବେଳକୁ ସୁବ କିଛି ଶେଷ ହୋଇଯାଇଛି । ତାଙ୍କ ପ୍ରେମିକା ବେକରେ ଡାଟା କେବୁଲ ଲଗାଇ ଝୁଲିପଡ଼ିଛନ୍ତି । ତାଙ୍କୁ ସଙ୍ଗେସଙ୍ଗେ ପାଖରେ ଥିବା ହସ୍ପିଟାଲକୁ ନିଆଯାଇଥିଲା ଏବଂ ସେଠରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ସୃଷ୍ଟି ଉତ୍ତର ପ୍ରଦେଶର ବାସିନ୍ଦା ହୋଇଥିବା ବେଳେ ଗତବର୍ଷ ଜୁନ୍ ମାସରୁ ମୁମ୍ବାଇରେ ରହୁଥିଲେ । ଦୁଇ ବର୍ଷ ପୂର୍ବରୁ ପାଇଲଟ୍ କୋର୍ସ କରୁଥିବା ବେଳେ ସୃଷ୍ଟି ଏବଂ ଆଦିତ୍ୟଙ୍କ ମଧ୍ୟ ସାକ୍ଷାତ ହୋଇଥିଲା ଏବଂ ପରେ ପ୍ରେମ ସଂପର୍କ ଗଢ଼ି ଉଠିଥିଲା । ସେପଟେ ସୃଷ୍ଟିଙ୍କୁ ଆତ୍ମହତ୍ୟା କରିବାକୁ ଉସୁକାଇବା ଅଭିଯୋଗରେ ଆଦିତ୍ୟଙ୍କ ବିରୋଧରେ ମାମଲା ରୁଜୁ କରିଛି ପୋଲିସ ।
