ନୂଆଦିଲ୍ଲୀ: ଭାରତୀୟ ବିମାନ ଉଡ଼ାଣ କ୍ଷେତ୍ରରେ ଗୋଟିଏ ପରେ ଗୋଟିଏ ବଡ଼ ରେକର୍ଡ ହେବାରେ ଲାଗିଛି । ବିମାନ ଯାତ୍ରୀଙ୍କ ସଂଖ୍ୟାରେ ଆଶାତୀତ ବୃଦ୍ଧି ଘଟୁଛି । ଇଣ୍ଡିଗୋ, ଏୟାର ଇଣ୍ଡିଆ ଏବଂ ଆକାଶା ଏୟାରରେ ବୁକିଂ ସଂଖ୍ୟା ଖୁବ ଅଧିକ ରହିଛି । ଫଳରେ ଭାରତୀୟ ଏୟାର ଲାଇନ୍ସ ବହୁ ସଂଖ୍ୟକ ବିମାନ କ୍ରୟ କରୁଥିବା ଦେଖିବାକୁ ମିଳୁଛି । ବର୍ତ୍ତମାନ ଏୟାର ଇଣ୍ଡିଆ ଫ୍ରାନ୍ସର ଏୟାରବସ୍ କମ୍ପାନି ପାଖରୁ ୧୦୦ଟି ବିମାନ କ୍ରୟ କରିବା ଲାଗି ଚୁକ୍ତି କରିଛି ।
୨୦୨୩ ପାଖରୁ ଏୟାର ଇଣ୍ଡିଆ ମୋଟ୍ ୫୭୦ଟି ବିମାନ କ୍ରୟ କରିସାରିଛି । ସେଥିମଧ୍ୟରୁ ୩୦୦ଟି ଏ୩୨୦ ନିଓ ଫ୍ୟାମିଲି ଏୟାରକ୍ରାଫ୍ଟ, ୫୦ଟି ଏ୩୫୦, ୧୯୦ ବୋଇଂ ୭୩୭ ମ୍ୟାକ୍ସ, ୧୦ ବୋଇଂ ୭୭୭ଏକ୍ସ ଏବଂ ୨୦ଟି ବୋଇଂ ୭୮୭ ବିମାନ ରହିଛି । ସେହିଭଳି ଇଣ୍ଡିଗୋ ୨୦୧୧ରୁ ୧୨୬୦ଟି ବିମାନ କ୍ରୟ କରିସାରିଛି । ୨୦୨୧ରୁ ଆକାଶା ଏୟାର ୨୨୬ଟି ବିମାନ ଯାତ୍ରୀଙ୍କ ସେବାରେ ସାମିଲ କରିଛି ।
ଏୟାରବସ୍କୁ ୧୦୦ ନୂଆ ବିମାନ ଲାଗି ଅର୍ଡର ଦେବା ପରେ ଟାଟା ସନ୍ସ ଏବଂ ଏୟାର ଇଣ୍ଡିଆର ଅଧ୍ୟକ୍ଷ ଏନ୍.ଚନ୍ଦ୍ରଶେଖରନ କହିଛନ୍ତି, ' ବିଶ୍ବ ତୁଳନାରେ ଭାରତରେ ଯାତ୍ରୀଙ୍କ ସଂଖ୍ୟା ଅଧିକ । ଆଉ ଏଥିପାଇଁ ଉନ୍ନତ ଭିତ୍ତିଭୂମିର ଆବଶ୍ୟକତା ରହିଛି । ଏହାକୁ ନଜରରେ ରଖି ଏୟାର ଇଣ୍ଡିଆ ଅଧିକରୁ ଅଧିକ ବିମାନ କ୍ରୟ କରିବା ଉପରେ ଜୋର ଦେଉଛି ।’ ସେ ଆହୁରି କହିଛନ୍ତି, ଅତିରିକ୍ତ ୧୦୦ ଏୟାରବସ୍ ବିମାନ ଏୟାର ଇଣ୍ଡିଆକୁ ବିକାଶ ରାସ୍ତାରେ ନେବାରେ ସହାୟକ ହେବ । ଏହାସହ ଏୟାର ଇଣ୍ଡିଆକୁ ବିଶ୍ୱସ୍ତରୀୟ ଏୟାରଲାଇନ୍ କରିବାର ଆମ ମିଶନରେ ଯୋଗଦାନ ଦେବ ।
ଏୟାରବସ୍ ସିଇଓ ଗିଲୌମ ଫଉରି କହିଛନ୍ତି, ‘ବିମାନ କ୍ରୟ କରିବା ଲାଗି ଏୟାର ଇଣ୍ଡିଆର ନିବେଶ ପାଇଁ ମୁଁ ଖୁସି । ଭାରତୀୟ ବିମାନ ଉଡ଼ାଣ କ୍ଷେତ୍ରରେ ଆଶାତୀତ ବୃଦ୍ଧିକୁ ବ୍ୟକ୍ତିଗତ ଭାବେ ଦେଖିବା ପରେ ମୋତେ ଖୁସି ଲାଗୁଛି ଯେ, ଏୟାର ଇଣ୍ଡିଆ ପୁଣି ଥରେ ଏୟାରବସ୍ ଉପରେ ବିଶ୍ବାସ କରିଛି ।’
