ନୂଆଦିଲ୍ଲୀ, ୨୯/୦୮ : ଦିଲ୍ଲୀ ପ୍ରଦୂଷଣକୁ ନେଇ ଆସିଲା ଚିନ୍ତାଜନକ ରିପୋର୍ଟ। ଦିଲ୍ଲୀବାସୀଙ୍କ ଆୟୂଷ କମାଉଛି ବାୟୁ ପ୍ରଦୂଷଣ। ଚିକାଗୋ ବିଶ୍ଵବିଦ୍ୟାଳୟର ବାୟୁ ଗୁଣବତ୍ତା ଜୀବନ ସୂଚକାଙ୍କ ରିପୋର୍ଟରୁ ଖୁଲାସା । ପ୍ରଦୂଷଣ ଯୋଗୁଁ ଦିଲ୍ଲୀବାସୀଙ୍କ ଆୟୂଷ ୮ ବର୍ଷ ୨ ମାସ କମିଯିବ। ସ୍ଵାସ୍ଥ୍ୟଗତ ସମସ୍ୟା ବଢିବ। ବିଶେଷ କରି ବୃଦ୍ଧ ଓ ଶ୍ଵାସରୋଗୀଙ୍କ ସ୍ଵାସ୍ଥ୍ୟ ପ୍ରତି ଅଧିକ ବିପଦ ରହିଛି। ତେଣୁ ପ୍ରଦୂଷଣର ମୁକାବିଲା କରିବା ଲାଗି ଯାନବାହନରୁ ନିର୍ଗତ ହେଉଥିବା ପ୍ରଦୂଷଣକୁ ନିୟନ୍ତ୍ରଣ କରିବାକୁ ପଡ଼ିବ। ପଡୋଶୀ ରାଜ୍ୟରେ ପରାଲି ଜଳାଇବା ଉପରେ ପ୍ରତିବନ୍ଧକ ଲଗାଇବାକୁ ପଡ଼ିବ ବୋଲି ବିଶେଷଜ୍ଞ କହୁଛନ୍ତି।  

ଦିଲ୍ଲୀରେ ଅତି ଉଚ୍ଚ ୨.୫ ପିଏମ୍ ସ୍ତରର ବାୟୁ ପ୍ରଦୂଷଣ ଯୋଗୁଁ ଲୋକଙ୍କ ବୟସ ୮ ବର୍ଷ ୨ ମାସ କମିଯାଉଛି । ପ୍ରଦୂଷଣ ସ୍ତରକୁ ବିଶ୍ଵ ସ୍ଵାସ୍ଥ୍ୟ ସଂଗଠନ ପରମାର୍ଶ ଅନୁଯାୟୀ, ଏହାର ମାନକ ପ୍ରତି କ୍ୟୁବିକ୍ ମିଟର ପିଛା ୫ ମାଇକ୍ରୋଗ୍ରାମ୍ ପର୍ଯ୍ୟନ୍ତ ହ୍ରାସ କରି ଏହି କ୍ଷତିକୁ କମ୍ କରାଯାଇପାରିବ। ରିପୋର୍ଟରେ ୨୦୨୩ ମସିହାରେ ସାଟେଲାଇଟ୍ ପ୍ରାପ୍ତ ପିଏମ୍ ୨.୫ ଆକଳନକୁ ଉଦ୍ଧୃତ କରାଯାଇଛି। ଏଥିରେ କୁହାଯାଇଛି ଯେ, ଭାରତରେ କଣିକା ଘନତା ୨୦୨୨ ତୁଳନାରେ ଅଧିକ ଥିଲା। ଏହି ସ୍ତରଗୁଡ଼ିକ ବିଶ୍ଵ ସ୍ଵାସ୍ଥ୍ୟ ସଙ୍ଗଠନ ନିର୍ଦ୍ଦେଶାବଳୀ ଅପେକ୍ଷା ୮ ଗୁଣା ଅଧିକ। ଏହାକୁ ହ୍ରାସ କରିବାକୁ ଡବ୍ଲ୍ୟୁଏଚଓ ନିର୍ଦ୍ଦେଶାବଳୀକୁ ସ୍ଥାୟୀ ଭାବେ ପୂରଣ କରିବା ଦ୍ଵାରା ଭାରତୀୟଙ୍କ ହାରାହାରି ଜୀବନ କାଳ ୩.୫ ବର୍ଷ ବୃଦ୍ଧି କରାଯାଇପାରିବ। ଦିଲ୍ଲୀ ସମେତ ସିନ୍ଧୁ-ଗଙ୍ଗା ସମତଳ ଅଞ୍ଚଳ ବି ସବୁଠୁ ଅଧିକ ପ୍ରଦୂଷିତ । ଏଠାକାର ଲୋକମାନଙ୍କର ବାୟୁ ପ୍ରଦୂଷଣ ସମ୍ପର୍କିତ ସ୍ଵାସ୍ଥ୍ୟଗତ ସମସ୍ୟା ଅଧିକ। 

ଚିକାଗୋ ବିଶ୍ୱବିଦ୍ୟାଳୟର ଶକ୍ତି ନୀତି ପ୍ରତିଷ୍ଠାନ (EPIC) ଦ୍ୱାରା ୨୦୨୫ AQLI ରିପୋର୍ଟ ପ୍ରସ୍ତୁତ କରାଯାଇଛି । ସାଟେଲାଇଟ୍-ପ୍ରାପ୍ତ ୨.୫ ପିଏମ୍ ତଥ୍ୟକୁ ଆଧାର କରି, ଏହା ବିଶ୍ୱ ଏବଂ ଆଞ୍ଚଳିକ ପ୍ରଦୂଷଣ ସ୍ତର ଏବଂ ମାନବ ସ୍ୱାସ୍ଥ୍ୟ ଉପରେ ଏହାର ପ୍ରଭାବ ନେଇ ମୂଲ୍ୟାଙ୍କନ କରିଛି। ରିପୋର୍ଟରେ ଆହୁରି ମଧ୍ୟ କୁହାଯାଇଛି ଯେ, ପ୍ରଦୂଷଣ ଯୋଗୁଁ ଦିଲ୍ଲୀ ଅଧିକ ପ୍ରଭାବିତ। ଦିଲ୍ଲୀ ପରେ ଜୀବନହାରରେ ବିହାରରେ (୫.୪ ବର୍ଷ) ହ୍ରାସ ହେଉଛି। ହରିୟାଣାରେ (୫.୩ ବର୍ଷ), ଉତ୍ତରପ୍ରଦେଶରେ (୫ ବର୍ଷ) ହ୍ରାସ ଘଟୁଛି।