ମୁମ୍ବାଇ ୦୭/୦୬: ସାଉଥ୍ ସୁପରଷ୍ଟାର୍ ନାଗାର୍ଜୁନଙ୍କ ପୁଅ ଏବଂ ଟଲିଉଡ୍ ଅଭିନେତା ଅଖିଲ ଅକ୍କିନେନୀ ବିବାହ ବନ୍ଧନରେ ବାନ୍ଧି ହୋଇଛନ୍ତି । ହାଇଦ୍ରାବାଦର ଅନ୍ନପୂର୍ଣ୍ଣା ଷ୍ଟୁଡିଓରେ ନିଜର ଦୀର୍ଘ ଦିନର ପ୍ରେମିକା ଜୈନାବ ରାଭଦ୍ଜିଙ୍କୁ ସେ ବିବାହ କରିଛନ୍ତି । ବିବାହର ଅନେକ ଫଟୋ ସୋସିଆଲ ମିଡିଆରେ ଭାଇରାଲ ହେଉଛି । ଗୋଟିଏ ଫଟୋରେ ନବବିବାହିତ ଯୋଡ଼ି ଧଳା ପୋଷାକରେ ନଜର ଆସିଛନ୍ତି । ଅଖିଲ ଧଳା କୁର୍ତ୍ତା ଓ ଧୋତି ପିନ୍ଧିଛନ୍ତି । ଜୈନାବ ଧଳା ସିଲ୍କ ଶାଢ଼ି ଓ ଗୋଲ୍ଡେନ୍ ବ୍ଲାଉଜ୍ ପିନ୍ଧିଛନ୍ତି ।
ତେଲୁଗୁ ଇଣ୍ଡଷ୍ଟ୍ରିର ଅନେକ ଜଣାଶୁଣା ସେଲିବ୍ରିଟି ଏହି ବିବାହ ଉତ୍ସବରେ ଯୋଗ ଦେଇ ନବଦମ୍ପତିଙ୍କୁ ଆଶୀର୍ବାଦ ଦେଇଥିଲେ । ଚିରଞ୍ଜୀବୀ, ରାମଚରଣ ଓ ପତ୍ନୀ ଉପାସନା, ଶୋଭିତା ଧୂଲିପାଲା ଓ ନାଗା ଚୈତନ୍ୟଙ୍କ ସମେତ ନିର୍ଦ୍ଦେଶକ ପ୍ରଶାନ୍ତ ନୀଲ, ଦଗୁବତି ଭେଙ୍କଟେଶ ପ୍ରମୁଖ ଉପସ୍ଥିତ ଥିଲେ । ବିବାହ ପୂର୍ବର କାର୍ଯ୍ୟକ୍ରମରେ ଚୈତନ୍ୟଙ୍କ ନୃତ୍ୟ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା ।
ଗତ ଦୁଇ ବର୍ଷ ହେଲା ଡେଟିଂ କରୁଥିବା ଅଖିଲ ଓ ଜୈନାବଙ୍କର ନିର୍ବନ୍ଧ ଗତ ନଭେମ୍ବରରେ ହୋଇଥିଲା । ଅଖିଲ ନାଗାର୍ଜୁନଙ୍କ ୨ୟ ପତ୍ନୀ ଆମଲା ଅକ୍କିନେନୀଙ୍କ ପୁଅ । ୧୯୯୫ରେ ବାପାଙ୍କ ଫିଲ୍ମ ‘ସିସିନ୍ଦ୍ରି’ରୁ ସେ ସିନେ କ୍ୟାରିଅର ଆରମ୍ଭ କରିଥିଲେ । ‘ଅଖିଲ’, ‘ହେଲୋ!’, ‘ମିଷ୍ଟର ମଜ୍ନୁ’ ଓ ‘ଏଜେଣ୍ଟ୍’ ଭଳି ଫିଲ୍ମରେ ସେ କାମ କରିଛନ୍ତି । ଅନ୍ୟପକ୍ଷେ, ଜୈନାବ ପେସାରେ ଜଣେ କଳାକାର । ନିକଟରେ ସେ ହାଇଦ୍ରାବାଦଠାରେ ନିଜର କଳା ସଂଗ୍ରହ ‘ରିଫ୍ଲେକ୍ସନ୍ସ’ ପାଇଁ ଏକ ପ୍ରଦର୍ଶନୀର ଆୟୋଜନ କରିଥିଲେ ।
