ନୂଆଦିଲ୍ଲୀ ୧୩/୧୧: ବିପଦପୂର୍ଣ୍ଣ ରୋମାଞ୍ଚକର ଯାତ୍ରା ଓ ମାନବ ଧୈର୍ଯ୍ୟର ସଦ୍ୟ ଉଦାହରଣ ହେଉଛନ୍ତି ଡେୟାରଡେଭିଲ୍ ଅକ୍ଷୟ ନାନାବତୀ । ଭାରତ-ଆମେରିକୀୟ ପୂର୍ବତନ ନୌ କର୍ମଚାରୀ, ଧାବକ ଓ ଲେଖକ ଅକ୍ଷୟ ନିଜ ଜୀବନର ସବୁଠୁ ଦୁଃସାହସିକ ଚ୍ୟାଲେଞ୍ଜ୍ ହାତକୁ ନେଇଛନ୍ତି । ଆଣ୍ଟାର୍କଟିକାର ବରଫ ଭୂଖଣ୍ଡରେ ସେ ଏକାକୀ ୧୧୦ ଦିନର ସ୍କି ଅଭିଯାନର ଲକ୍ଷ୍ୟ ଧାର୍ଯ୍ୟ କରିଛନ୍ତି । ଏ ଅଞ୍ଚଳର ଭୟାନକ ଚଟାଣ ଓ ବିଯୁକ୍ତ ୪୦ ଡିଗ୍ରୀ ସେଲ୍ସିୟସରେ ପହଞ୍ଚୁଥିବା ବିପଦପୂର୍ଣ୍ଣ ତାପମାତ୍ରାକୁ ଖାତିର ନ କରି ଅକ୍ଷୟ ଏକାକୀ ଏହି ଦୁଃସାହସିକ ଯାତ୍ରା ପୂରଣ କରିଥିବା ପ୍ରଥମ ବ୍ୟକ୍ତି ହେବାର ଲକ୍ଷ୍ୟ ଉପରେ ଦୃଢ଼ ଫୋକସ୍ କରିଛନ୍ତି ।
ସବୁଠୁ ଥଣ୍ଡା, ଶୁଷ୍କ ଓ ପୃଥିବୀର ସବୁଠୁ ତୀବ୍ର ପବନ ପ୍ରବାହିତ ହେଉଥିବା ମହାଦେଶର ଗୋଟିଏ ତଟରୁ ଅନ୍ୟ ତଟକୁ ସ୍କି ମାଧ୍ୟମରେ ୨୭୦୦ କିମି ଦୂରତା ଅତିକ୍ରମ କରିବା ତାଙ୍କର ଲକ୍ଷ୍ୟ । ତେବେ, ଏହା ଅକ୍ଷୟଙ୍କର ପ୍ରଥମ ଚ୍ୟାଲେଞ୍ଜ୍ ନୁହେଁ । ଆଣ୍ଟାର୍କଟିକାର ବିପଦପୂର୍ଣ୍ଣ ଆକ୍ସେଲ ହେଇବର୍ଗ ଗ୍ଲେସିଅର ଉପରେ ସ୍କି କରିଥିବା ୫୦ରୁ କମ୍ ସଫଳ ବ୍ୟକ୍ତିଙ୍କ ମଧ୍ୟରେ ସେ ସାମିଲ । ବର୍ତ୍ତମାନ ଏହି ବରଫ ମହାଦେଶରେ ୧୧୦ ଦିନର ବିପଦପୂର୍ଣ୍ଣ ଯାତ୍ରା ପାଇଁ ସେ ଖବରର ଶିରୋନାମା ହୋଇଛନ୍ତି । ଆଣ୍ଟାର୍କଟିକା ମିଶନ୍ରେ ତାଙ୍କୁ ସର୍ବନିମ୍ନ ତାପମାତ୍ରାରେ ଦିନକୁ ୧୨ ଘଣ୍ଟା ସ୍କିଂ କରିବାକୁ ପଡ଼ିବ । ଏହା ତାଙ୍କ ଧୈର୍ଯ୍ୟ, ସାହାସ ଓ ମାନସିକ ସାମର୍ଥ୍ୟର ପରୀକ୍ଷା ନେବ ।
