ଭୋଗରାଇ,୨୧।୫(ଆ.ପ୍ର): ଘରେ କେହି ନଥିବା ବେଳେ ଜଣେ ନାବାଳିକା କଲେଜ ଛାତ୍ରୀଙ୍କୁ କିଛି ଦୁର୍ବୃତ୍ତ ଗଣଦୁଷ୍କର୍ମ କରି ପରେ ପ୍ରମାଣ ନଷ୍ଟ ଉଦ୍ଦେଶ୍ୟରେ ତାକୁ ଜୀବନରୁ ମାରି ଆତ୍ମହତ୍ୟାର ରୂପ ଦେଇଥିବା ଅଭିଯୋଗ ହୋଇଛି । ଭୋଗରାଇ ଥାନା ପୁଲିସ୍ ଘଟଣାର ତଦନ୍ତ କରିବା ସହିତ ଜଣଙ୍କୁ ଅଟକ ରଖି ପଚରାଉଚରା କରୁଛି । ଭୋଗରାଇ ଥାନା ଅଧୀନ ଏକ ଗ୍ରାମରେ ଏଭଳି ଏକ ଘଟଣା ଘଟିଛି ।
ଅଭିଯୋଗ ଅନୁଯାୟୀ, ଭୋଗରାଇ ଥାନା ଅଧୀନ ଏକ ଗ୍ରାମର ପରିବାର ଲୋକେ ଆଜକୁ ପ୍ରାୟ ୧୫ ବର୍ଷ ହେବ ଗୁଜରାଟରେ ଦାଦନ ଶ୍ରମିକ ଭାବରେ ରହି ନିଜ ପରିବାର ପ୍ରତିପୋଷଣ କରନ୍ତି । ପରିବାରର ବାପା- ମାଆ ଦାଦନ ଶ୍ରମିକ ଭାବେ କାମ କରୁଥିବା ବେଳେ ଏକ ମାତ୍ର ପୁଅ ଓ ବଡ ଝିଅ ବାହାରେ ରହି ପାଠ ପଢନ୍ତି। ସାନ ଝିଅ ସ୍ଥାନୀୟ ଏକ ମହାବିଦ୍ୟାଳୟରେ ଯୁକ୍ତ ୨ ୨ୟ ବର୍ଷରେ ପାଠ ପଢୁଥିଲେ। ଛାତ୍ରୀ ଜଣକ ଏକ ମେସରେ ରହି ପାଠ ପଢୁଥିଲେ । ରବିବାର ଛୁଟି ଥିବାରୁ ଛାତ୍ରୀ ଜଣକ ଘରକୁ ଯାଇଥିଲେ। ପାଖ ଗାଁରେ ମହୋତ୍ସବ ଥିବାରୁ ୨ ଦିନ ଘରେ ରହିଯାଇଥିଲେ । ମଙ୍ଗଳବାର ଦ୍ବିପହରରେ ଖାଇପିଇ ମେସକୁ ଯାଇଥାନ୍ତେ । ମାତ୍ର ମଧ୍ୟାହ୍ନ ପ୍ରାୟ ୧୨ଟା ସମୟରେ ଛାତ୍ରୀ ଜଣକ ନିଜ ଭାଇର ଫୋନ୍ ଉଠାଇ ନ ଥିଲେ। ଛାତ୍ରୀଙ୍କ ଭାଇ ସନ୍ଦେହରେ ନିଜ ସମ୍ପର୍କୀୟମାନଙ୍କୁ ଏ ନେଇ ଜଣାଇଥିଲେ । ସମ୍ପର୍କୀୟମାନେ ପହଞ୍ଚି ଛାତ୍ରୀ ଜଣକ ବେକରେ ଓଢ଼ଣୀ ଗୁଡ଼ାଇ ନିଜ ଘର ବାରଣ୍ଡାରେ ଥିବା ଓରାରେ ଝୁଲୁଥିବା ଦେଖିବାକୁ ପାଇଥିଲେ । ସଙ୍ଗେ ସଙ୍ଗେ ସମ୍ପର୍କୀୟମାନେ ତାଙ୍କୁ ସ୍ଥାନୀୟ ଜଳେଶ୍ଵରପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଯାଇଥିଲେ । ସେଠାରେ ଡ଼ାକ୍ତର ଛାତ୍ରୀଙ୍କୁ ମୃତ ବୋଲି ଘୋଷଣା କରିଥିଲେ ।
ତୁରନ୍ତ ଛାତ୍ରୀଙ୍କ ଭାଇ ପହଞ୍ଚି ଥାନାରେ ଅଭିଯୋଗ କରିଥିଲେ। ସେହି ଗ୍ରାମର ବସନ୍ତ ମାଝୀ ଓ ଅନ୍ୟକିଛି ଯୁବକ ଗଣଦୁଷ୍କର୍ମ କରି ହତ୍ୟା କରିଛନ୍ତି। ପ୍ରମାଣ ନଷ୍ଟ ପାଇଁ ଏଭଳି ଆତ୍ମହତ୍ୟାର ରୂପ ଦେଇଥିବା ଭୋଗରାଇ ଥାନାରେ ଛାତ୍ରୀଙ୍କ ଭାଇ ଲିଖିତ ଅଭିଯୋଗ କରିଥିଲେ । ମୃତଦେହକୁ ବାଲେଶ୍ଵର ଜିଲ୍ଲା ମୁଖ୍ୟ ଚିକିତ୍ସାଳୟକୁ ବ୍ୟବଛେଦ ପାଇଁ ପୁଲିସ ପଠାଇଛି। ଗୁରୁବାର ମୃତଦେହ ବ୍ୟବଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବ। ଅଭିଯୋଗକୁ ଭିତ୍ତିକରି ଭୋଗରାଇ ଥାନା ପକ୍ଷରୁ ଏକ ମାମଲା ରୁଜ୍ଜୁ କରାଯାଇଛି। ବସନ୍ତ ମାଝୀଙ୍କୁ ଥାନାରେ ଅଟକ ରଖି ପୋଲିସ ପଚରାଉଚରା କରୁଛି।
