ଦଶରଥପୁର ୨୩।୬ : ଘରକୁ ଫେରୁଥିବା ବେଳେ ୨ ଯୁବତୀଙ୍କୁ ରାସ୍ତାରେ ଏକୁଟିଆ ପାଇ ଅସଦାଚାରଣ ଉଦ୍ୟମ। ଖାଲି ସେତିକି ନୁହେଁ ଯୁବତୀଙ୍କୁ ଉଦ୍ଧାର କରିବାକୁ ଘଟଣା ସ୍ଥଳରେ ପହଂଚିଥିବା ଯୁବତୀଙ୍କ ୨ ସମ୍ପର୍କୀୟ ମଧ୍ୟ ଦୁର୍ବୃତ୍ତଙ୍କ ଆକ୍ରମଣର ଶିକାର ହୋଇଛନ୍ତି। ଏ ନେଇ ଦଶରଥପୁର ଥାନାରେ ଯୁବତୀଙ୍କ ପକ୍ଷରୁ ଲିଖିତ ଅଭିଯୋଗ ହୋଇଛି।
ଦଶରଥପୁର ଥାନା ଅଞ୍ଚଳର ଜଣେ ଯୁବତୀ ଏବଂ ତାଙ୍କ ଦିଲ୍ଲୀ ବାସିନ୍ଦା ସାଙ୍ଗ ରବିବାର ଯାଜପୁର ସହରରୁ ପ୍ରୀତିପୁର ଯାଉଥିବା ଏକ ବସରେ ଘରକୁ ଫେରୁଥିଲେ। ରାତି ପ୍ରାୟ ୯. ୩୦ ସମୟରେ ୨ ଯୁବତୀ ନନ୍ଦିପୁର ବଜାର ନିକଟ ଭଦ୍ରକ ପଡିଆ ବସ ଷ୍ଟପେଜରେ ବସରୁ ଓହ୍ଲାଇ ନିଜ ସମ୍ପର୍କୀୟଙ୍କୁ ଅପେକ୍ଷା କରିଥିଲେ। ନିକଟସ୍ଥ ପାଟଣାସାହି ଅଞ୍ଚଳର ଅନିଲ ଜେନା ଓ ନୀତେଶ ଜେନା ଯୁବତୀ ୨ଜଣଙ୍କୁ ଏକୁଟିଆ ଦେଖି ପ୍ରଥମେ ବିଭିନ୍ନ ପ୍ରକାରର ଅଶ୍ଳୀଳ କଥା କହିଥିଲେ। ଏଥି ସହ ୨ ଯୁବତୀଙ୍କୁ ଟଣାଓଟରା କରିଥିଲେ। ଏହି ସମୟରେ ସେମାନଙ୍କୁ ଘରକୁ ନେବାକୁ ଆସିଥିବା ୨ ସମ୍ପର୍କୀୟ ଯୁବକ ସେଠାରେ ପହଂଚି ଘଟଣାର ପ୍ରତିବାଦ କରିଥିଲେ। ୨ ଯୁବକ ସେମାନଙ୍କୁ ଆକ୍ରମଣ କରିବା ସହିତ ତାଙ୍କ ବାଇକକୁ ପିଟି ଭାଙ୍ଗି ଦେଇଥିଲେ। ଆକ୍ରମଣରେ ଜଣେ ସମ୍ପର୍କୀୟ ଯୁବକଙ୍କ ନାକ ଫାଟିଥିବା ବେଳେ ଆଉ ଜଣେ ଗୁରୁତର ଆହତ ହୋଇ କଟକରେ ଚିକିତ୍ସାଧୀନ ଅଛନ୍ତି। ଏହି ସମୟରେ ଯୁବତୀ ୨ ଜଣ ବଡ଼ ପାଟିରେ ସାହାଯ୍ୟ ପାଇଁ ଡାକ ପକାଇବାରୁ ୨ ଯୁବକ ଘଟଣା ସ୍ଥଳରୁ ଦୌଡ଼ି ପଳାଇଥିଲେ। ଏ ନେଇ ରବିବାର ରାତିରେ ଯୁବତୀଙ୍କ ପକ୍ଷରୁ ଦଶରଥପୁର ଥାନାରେ ଲିଖିତ ଅଭିଯୋଗ କରିଥିଲେ। ପୁଲିସ ପକ୍ଷରୁ କୌଣସି ପଦକ୍ଷେପ ନିଆଯାଇ ନଥିବାରୁ ସୋମବାର ୨ ଯୁବତୀ ଓ ତାଙ୍କ ପରିବାର ଲୋକେ ପୁଣି ଥରେ ଦଶରଥପୁର ଥାନାରେ ପହଂଚି ୨ ଯୁବକଙ୍କ ଉପରେ ଦୃଢ଼ କାର୍ଯାନୁଷ୍ଠାନ ନେବାକୁ ଦାବି କରିଥିଲେ।
