ନୂଆଦିଲ୍ଲୀ,୨୧/୦୫: ଜମ୍ମୁ-କାଶ୍ମୀରର ପହଲଗାମରେ ଆତଙ୍କବାଦୀ ଆକ୍ରମଣ ପରେ ଲୋକଙ୍କ ମଧ୍ୟରେ ଭୟର ବାତାବରଣ ଥିଲା, କିନ୍ତୁ ସେନାର ଅପରେସନ ସିନ୍ଦୂର ପରେ ଲୋକଙ୍କ ଉତ୍ସାହ ପୁଣି ଥରେ ବୃଦ୍ଧି ପାଇଛି। କିଛି ଦିନ ପୂର୍ବରୁ ଖବର ଆସୁଥିଲା ଯେ ଅମରନାଥ ଯାତ୍ରାରେ ଯାଉଥିବା ଭକ୍ତମାନଙ୍କର ମନୋବଳ ଭାଙ୍ଗିଯାଇଛି ଏବଂ ହୁଏତ ସେମାନେ ଯାତ୍ରା କରିପାରନ୍ତି। କିନ୍ତୁ ଏବେ ପଞ୍ଜୀକରଣ ସଂଖ୍ୟା ଯେଉଁଭଳି ଆଗରେ ବଢ଼ିବାରେ ଲାଗିଛି, ତାହା ଦେଖି ଅନ୍ୟ ଭକ୍ତମାନଙ୍କ ମଧ୍ୟରେ ମଧ୍ୟ ଉତ୍ସାହ ଦେଖାଯାଉଛି। ତେବେ ଏହି ପଞ୍ଜିକୃତ ଶ୍ରଦ୍ଧାଳୁଙ୍କ ସଂଖ୍ୟା ହିଁ ପାକିସ୍ତାନକୁ ଉତ୍ତର ଦେବା ପାଇଁ ଯଥେଷ୍ଟ। କହିରଖୁଛୁ ଯେ, ଭାରତୀୟ ଜନତା ପାର୍ଟି ଏହାର ଏକ୍ସ ହ୍ୟାଣ୍ଡେଲରେ ପୋଷ୍ଟ କରି ଲେଖିଛି ଯେ 'ଭାରତର ଆଧ୍ୟାତ୍ମିକ ଶକ୍ତି ଆତଙ୍କବାଦ ଆଗରେ ମୁଣ୍ଡ ନୁଆଁଇବ ନାହିଁ। ଏପର୍ଯ୍ୟନ୍ତ, ୩.୫ ଲକ୍ଷରୁ ଅଧିକ ଭକ୍ତ ଅମରନାଥ ଯାତ୍ରା ପାଇଁ ପଞ୍ଜିକରଣ କରି ରେକର୍ଡ ଭାଙ୍ଗିଛନ୍ତି।'
ଏହାରି ଭିତରେ, ପ୍ରଶାସନ ସମସ୍ତ ଦର୍ଶନାର୍ଥୀ ଭକ୍ତ ଏବଂ ସେବା ପ୍ରଦାନକାରୀ ବ୍ୟକ୍ତିଙ୍କୁ ସର୍ବୋତ୍ତମ ସ୍ୱାସ୍ଥ୍ୟସେବା ଏବଂ ଅନ୍ୟାନ୍ୟ ଆବଶ୍ୟକୀୟ ସୁବିଧା ଯୋଗାଇ ଦେବେ। ଯାତ୍ରାର ସୁଗମ ପରିଚାଳନା ପାଇଁ ରହିବା, ବିଦ୍ୟୁତ୍, ପାଣି, ସୁରକ୍ଷା ଏବଂ ଅନ୍ୟାନ୍ୟ ବ୍ୟବସ୍ଥା ସୁନିଶ୍ଚିତ କରିବା ପାଇଁ ସମସ୍ତ ବିଭାଗ ସମନ୍ୱୟ ରକ୍ଷା କରି କାର୍ଯ୍ୟ କରୁଛନ୍ତି।
ଉଲ୍ଲେଖଯୋଗ୍ୟ ଯେ, ପ୍ରତ୍ୟେକ ବର୍ଷ ଅମରନାଥ ଯାତ୍ରା କରିବାକୁ ଲକ୍ଷାଧିକ ଶ୍ରଦ୍ଧାଳୁ ପଞ୍ଜିକରଣ କରିଥାଆନ୍ତି। କିନ୍ତୁ ପ୍ରତ୍ୟେକ ଥର ଆତଙ୍କବାଦୀ ଗତିବିଧିକୁ ନଜରରେ ରଖି ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଥାଏ। ତେବେ ଚଳିତ ବର୍ଷ ଯାତ୍ରା ପୂର୍ବରୁ ଜମ୍ମୁ କାଶ୍ମୀରର ପହଲଗାମ୍ରେ ଏପ୍ରିଲ ୨୨ ତାରିଖରେ ପର୍ଯ୍ୟଟକମାନଙ୍କ ଉପରେ ହୋଇଥିବା ଆତଙ୍କବାଦୀ ଆକ୍ରମଣକୁ ନେଇ କେତେ ଶ୍ରଦ୍ଧାଳୁ ପଞ୍ଜିକରଣ କରିବେ ତାକୁ ନେଇ ଚିନ୍ତା ବଢ଼ିଥିଲା। ତେବେ ଅପରେସନ୍ ସିନ୍ଦୁର ମାଧ୍ୟମରେ ଭାରତୀୟ ସେନା ପାକିସ୍ତାନକୁ ମୁହଁତୋଡ଼ ଜବାବ ଦେଇଥିଲା। ବର୍ତ୍ତମାନ ଭାରତୀୟ ଶ୍ରଦ୍ଧାଳୁଙ୍କ ଅମରନାଥ ଯାତ୍ରା ପାଇଁ ରେକର୍ଡସଂଖ୍ୟକ ପଞ୍ଜିକରଣ ପାକିସ୍ତାନକୁ ଆହୁରି ଚିନ୍ତିତ କରିବ। ଆତଙ୍କବାଦ ଆଗରେ ଭାରତୀୟ ଶ୍ରଦ୍ଧାଳୁଙ୍କ ଆସ୍ଥା, ବିଶ୍ବାସ, ଭକ୍ତି କେବେ ବି ମୁଣ୍ଡ ନୂଆଁଇବ ନାହିଁ।
