ଜମ୍ମୁ,୦୬/୦୩ ଆସନ୍ତା ଜୁଲାଇ ୩ ତାରିଖରୁ ପ୍ରସିଦ୍ଧ ଅମରନାଥ ଯାତ୍ରା ଆରମ୍ଭ ହେବ । ଏହା ଅଗଷ୍ଟ ୯ ତାରିଖ ରକ୍ଷାବନ୍ଧନ ପର୍ଯ୍ୟନ୍ତ ଚାଲିବ । ୩୯ ଦିନ ଚାଲିବ ବାବା ବରଫାନୀଙ୍କ ଯାତ୍ରା। ବୁଧବାର ଜମ୍ମୁ-କାଶ୍ମୀରର ରାଜଭବନରେ ଅନୁଷ୍ଠିତ ଶ୍ରୀ ଅମରନାଥ ମନ୍ଦିର ବୋର୍ଡ ବୈଠକରେ ଏହି ଘୋଷଣା କରାଯାଇଛି । ଉଭୟ ଅନନ୍ତନାଗ ଜିଲ୍ଲାର ପହଲଗାମ୍ ଓ ଗାନ୍ଦରବଲ ଜିଲ୍ଲାର ବାଲ୍ତାଲ ରୁଟ୍ରେ ଯାତ୍ରା ଆରମ୍ଭ ହେବ । ଯାତ୍ରୀଙ୍କ ସୁରକ୍ଷାକୁ ସର୍ବାଧିକ ଗୁରୁତ୍ୱ ଦିଆଯିବ। ଅଧିକ ସଂଖ୍ୟକ ଯାତ୍ରୀଙ୍କ ଆଗମନ ହେବାକୁ ଥିବାରୁ ତାକୁ ଦୃଷ୍ଟିରେ ରଖି ଜମ୍ମୁ, ଶ୍ରୀନଗର,ପହଲଗାମ ଓ ବାଲ୍ତାଲ ଠାରେ ଟ୍ରାନ୍ଜିଟ କ୍ୟାମ୍ପ ପ୍ରତିଷ୍ଠା କରାଯିବ । ବୈଠକରେ ଉପରାଜ୍ୟପାଳ ମନୋଜ ସିହ୍ନା ଯାତ୍ରା ଯେଭଳି ସୁରୁଖୁରୁରେ ସମ୍ପାଦିତ ହେବ ଓ ଶ୍ରଦ୍ଧାଳୁଙ୍କ ସୁରକ୍ଷା ବ୍ୟବସ୍ଥାକୁ ସୁନିଶ୍ଚିତ କରାଯିବ ତାହା ଉପରେ ସମୀକ୍ଷା କରିଥିଲେ ।
