ନୂୂଆଦିଲ୍ଲୀ,୧୭/୧୨: ଦେଶର ସବୁଠାରୁ ଧନୀ ବ୍ୟକ୍ତି ମୁକେଶ ଅମ୍ବାନି ଏବଂ ଗୌତମ ଆଦାନି ବ୍ଲୁମବର୍ଗର ୧୦୦ ବିଲିୟନ ଡଲାର ସୂଚୀରୁ ବାଦ୍ ପଡିଛନ୍ତି । ଏହା ସହ ୨ ଅରବପତି ଏଲିଟ୍ ସେଣ୍ଟି ବିଲିୟନେୟାର କ୍ଲବରୁ ବାହାରେ ରହିଛନ୍ତି । ଏହି କ୍ଲବ ୧୦୦ ବିଲିୟନ ଡଲାରରୁ ଉଦ୍ଧ୍ୱର୍ ନେଟୱର୍ଥ ଥିବା ବ୍ୟକ୍ତି ବିଶେଷଙ୍କ ପାଇଁ ରହିଛି । ଚଳିତ ବର୍ଷ ଅଦ୍ୟାବଧି ଦେଶର ଟପ୍ ୨୦ ଧନୀଙ୍କ ସମ୍ପତ୍ତି ୬୭.୨ ବିଲିୟନ ଡଲାର ବୃଦ୍ଧି ହୋଇଛି ।
ସବୁଠାରୁ ଅଧିକ ସମ୍ପତ୍ତି ବୃଦ୍ଧି ହୋଇଥିବା ବ୍ୟକ୍ତି ବିଶେଷଙ୍କ ମଧ୍ୟରେ ଆଇଟି ଟାଇକୁନ ଶିବ ନାଦାର ୧୦.୮ ବିଲିୟନ ଡଲାର ଏବଂ ସାବିତ୍ରୀ ଜିନ୍ଦଲ ୧୦.୧ ବିଲିୟନ ଡଲାର ରହିଛି । ରିଲାଏନ୍ସର ରିଟେଲ ଏବଂ ଏନର୍ଜି ଡିଭିଜନର କାରବାର ପ୍ରଭାବିତ ରହିବା ଯୋଗୁ ଅମ୍ବାନିଙ୍କ ସମ୍ପତ୍ତିରେ ହ୍ରାସ ହୋଇଛି । ଜୁଲାଇରେ ଅମ୍ବାନିଙ୍କର ନେଟୱର୍ଥ ୧୨୦.୮ ବିଲିୟନ ଡଲାର ରହିଥିଲା । ୧୩ ଡିସେମ୍ବରରେ ଏହା ୯୬.୭ ବିଲିୟନ ଡଲାରକୁ ଖସି ଆସିଛି । ସେହିଭଳି ଜୁନରେ ଆଦାନିଙ୍କ ମୋଟ ସମ୍ପତ୍ତି ୧୨୨.୩ ବିଲିୟନ ଡଲାର ସ୍ତରରେ ଥିଲା। ଯାହା ଏବେ ୮୨.୩ ବିଲିୟନ ଡଲାରକୁ ଖସିଛି । ଆମେରିକାର ଜଷ୍ଟିସ ବିଭାଗ ପକ୍ଷରୁ ଆଦାନି ଉପରେ ହୋଇଥିବା ମାମଲା ଯୋଗୁ ତାଙ୍କ ନେଟୱର୍ଥ ହ୍ରାସ ହୋଇଥିବା କୁହାଯାଉଛି ।
