ୱାଶିଂଟନ,୨୮/୧୦: ଆମେରିକାରେ ନଭେମ୍ବର ୫ରେ ରାଷ୍ଟ୍ରପତି ନିର୍ବାଚନ ହେବାକୁ ଥିବାରୁ ପ୍ରଚାର ମଇଦାନ ସରଗରମ ହୋଇଛି । ରିପବ୍ଲିକାନ ପ୍ରାର୍ଥୀ ଡୋନାଲ୍ଡ ଟ୍ରମ୍ପ ଓ ଡେମୋକ୍ରାଟିକ ପ୍ରାର୍ଥୀ କମଳା ହାରିସ ମତଦାତାଙ୍କୁ ନିଜ ପକ୍ଷକୁ ନେବା ପାଇଁ ସବୁ ବଳ ଲଗାଇ ଦେଇଛନ୍ତି । ଏମିତି କି ଭୋଟରଙ୍କ ମନ ଜିଣିବା ଲାଗି ସେମାନେ ନିଜ ନିର୍ବାଚନ ପ୍ରଚାରରେ ସେଲିବ୍ରିଟିଙ୍କୁ ସାମିଲ କରିଥିବା ଦେଖିବାକୁ ମିଳିଛି । ପ୍ରଚାର ମଇଦାନରେ ଜମିଛି ହଲିଉଡ ତାରକାଙ୍କ ଭିଡ଼ । ତାରକାମାନେ ସୋସିଆଲ ମିଡିଆରେ ବି ନିଜ ପସନ୍ଦର ପ୍ରାର୍ଥୀଙ୍କୁ ସମର୍ଥନ କରୁଛନ୍ତି ।
ଟେଲର ସ୍ୱିଫ୍ଟ, ଲିଓନାର୍ଡୋ ଡିକାପ୍ରିୟୋ, ଓପେରା ୱିନ୍ଫ୍ରେ, ବିୟୋନ୍ସେ ଓ କ୍ରିସ୍ ରକ୍ଙ୍କ ଭଳି କିମ୍ବଦନ୍ତୀ ହଲିଉଡ ତାରକା କମଳା ହାରିସଙ୍କ ସମର୍ଥନରେ ପ୍ରଚାର ଅଭିଯାନ ଚଳାଇଛନ୍ତି । ସେହିଭଳି ଟ୍ରମ୍ପ୍ଙ୍କ ନିମନ୍ତେ ଜେସନ ଏଲ୍ଡିୟନ୍, ଲି ଗ୍ରିନଉଡ, ଏଲନ ମସ୍କ, କିଡ୍ ରକ୍ ଏବଂ ରୋଜେନ ବାର୍ଙ୍କ ଭଳି ସେଲିବ୍ରିଟି ଓ ଶିଳ୍ପପତି ପ୍ରଚାର କରୁଥିବା ଦେଖିବାକୁ ମିଳିଛି । ନିର୍ବାଚନକୁ ଆଉ ମାତ୍ର ୯ ଦିନ ବାକି ରହିଛି । ଏଭଳି ସ୍ଥିତିରେ ଭାରତୀୟ ବଂଶୋଦ୍ଭବ କମଳାଙ୍କ ପଲା ଭାରୀ ରହିଥିବା କୁହାଯାଉଛି । ଇତିମଧ୍ୟରେ ଆମେରିକାର ପୂର୍ବତନ ରାଷ୍ଟ୍ରପତି ବାରାକ ଓବାମାଙ୍କ ପତ୍ନୀ ମିସେଲ ଓବାମା ମିସିଗାନ୍ରେ କମଳାଙ୍କ ସମର୍ଥନରେ ଏକ ଜନସଭା କରିଛନ୍ତି । ଜନସଭାରେ ମିସେଲ ବିପୁଳ ଭୋଟରେ କମଳାଙ୍କୁ ଜିତାଇବା ପାଇଁ ଜନତାଙ୍କୁ ଅପିଲ କରିଛନ୍ତି । ଦେଶର ପ୍ରଥମ ମହିଳା ରାଷ୍ଟ୍ରପତି ବାଛିବା ପାଇଁ ପୁରୁଷମାନଙ୍କୁ ସେ ଚ୍ୟାଲେଞ୍ଜ ଦେଇଛନ୍ତି ।
ମିସେଲ ଆହୁରି କହିଛନ୍ତି, ଯଦି ଆପଣମାନେ ଏଥର ଉଚିତ ମତଦାନ ନ କରନ୍ତି, ତେବେ ଆପଣଙ୍କ ପତ୍ନୀ, ଝିଅ ଏବଂ ମାଆଙ୍କୁ ଏହାର ପରିଣତି ସାମ୍ନା କରିବାକୁ ପଡ଼ିପାରେ । ରିପୋର୍ଟ ମୁତାବକ, କୃଷ୍ଣକାୟ ଭୋଟରଙ୍କ ମଧ୍ୟରେ ମିସେଲଙ୍କର ବେଶ୍ ପ୍ରଭାବ ରହିଛି । ଏଭଳି ସ୍ଥିତିରେ ତାଙ୍କର ସମର୍ଥନ କମଳାଙ୍କ ପାଇଁ ବେଶ୍ ମହତ୍ତ୍ୱପୂର୍ଣ୍ଣ ହେବ । ମିସେଲ ନିଜ ସମ୍ବୋଧନରେ ଆହୁରି କହିଛନ୍ତି, କମଳା ପ୍ରତ୍ୟେକ ଦିଗରୁ ପ୍ରମାଣ କରିଦେଇଛନ୍ତି ଯେ ସେ ଜଣେ ଉପଯୁକ୍ତ ରାଷ୍ଟ୍ରପତି ପ୍ରାର୍ଥୀ । ଏବେ ପ୍ରଶ୍ନ ଉଠୁଛି ଦେଶ ଏଥିପାଇଁ ପ୍ରସ୍ତୁତ ଅଛି କି ନାହିଁ? ଉଲ୍ଲେଖଯୋଗ୍ୟ, ମିସେଲଙ୍କ ପୂର୍ବରୁ ବାରାକ ଓବାମା କମଳାଙ୍କୁ ନିଜ ସମର୍ଥନ ଜଣାଇଥିଲେ । ମଞ୍ଚରେ ତାଙ୍କ ହାତ ଧରି ଜନତାଙ୍କୁ ଭୋଟ ଦେବା ଲାଗି ଅପିଲ୍ କରିଥିଲେ।
