ନୂଆଦିଲ୍ଲୀ,୨୦/୦୧: ଡୋନାଲ୍ଡ ଟ୍ରମ୍ପ ସୋମବାର ଆମେରିକାର ୪୭ତମ ରାଷ୍ଟ୍ରପତି ଭାବରେ ଶପଥ ନେବେ। ଶପଥ ଗ୍ରହଣ ଉତ୍ସବ ପୂର୍ବରୁ ଆନୁଷ୍ଠାନିକ କାର୍ଯ୍ୟକ୍ରମ ଆରମ୍ଭ ହୋଇଯାଇଛି। ଶପଥ ଗ୍ରହଣ କରିବାର କିଛି ଘଣ୍ଟା ପୂର୍ବରୁ ୱାଶିଂଟନରେ ଏକ ମେକ୍ ଆମେରିକା ଗ୍ରେଟ୍ ଏଗେନ୍ ରାଲିରେ ଟ୍ରମ୍ପ କହିଛନ୍ତି ଯେ,' "ଆମେ ଆମ ଦେଶକୁ ପୂର୍ବ ଅପେକ୍ଷା ମହାନ କରିବୁ। ଆମେ ଜାନୁଆରୀ ୨୦ ଅପରାହ୍ନରେ ଆମ ଦେଶକୁ ପୁଣି ଥରେ ଗୌରବ ଫେରାଇ ଆଣିବୁ।" ଟ୍ରମ୍ପ ଆହୁରି କହିଛନ୍ତି ଯେ ଆମେରିକାରେ ଦୀର୍ଘ ଚାରି ବର୍ଷର ଅବନତି ଉପରୁ ପରଦା ଖସିଯାଇଛି। "ଆମେ ଆମେରିକୀୟ ଶକ୍ତି ଏବଂ ସମୃଦ୍ଧି, ସମ୍ମାନ ଏବଂ ଗୌରବର ଏକ ନୂତନ ଦିନ ଆରମ୍ଭ କରୁଛୁ ବୋଲି କହିଛନ୍ତି ଟ୍ରମ୍ପ।
ଟ୍ରମ୍ପ ଡେମୋକ୍ରାଟିକ୍ ଶିବିରର ବାଇଡେନ ପ୍ରଶାସନର କାର୍ଯ୍ୟକାଳ ଉପରେ ଆକ୍ରମଣ କରି କହିଥିଲ ଯେ,,' ଆମେ ଏକ ବିଫଳ, ଦୁର୍ନୀତିଗ୍ରସ୍ତ ରାଜନୈତିକ ପ୍ରତିଷ୍ଠାନର ଶାସନକୁ ସବୁଦିନ ପାଇଁ ଶେଷ କରିବାକୁ ଯାଉଛୁ। ଆମେ ଏହାକୁ ଆଉ ସହ୍ୟ କରିବୁ ନାହିଁ।' ଟେସଲା ମାଲିକ ଏଲୋନ ମସ୍କ ମଧ୍ୟ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ। ଅଭିନେତା ଜନ୍ ଭୋଇଟ୍ ଏବଂ ସଂଗୀତଜ୍ଞ କିଡ୍ ରକ୍ ସମେତ ଅନେକ ସେଲିବ୍ରିଟି ଏଥିରେ ଯୋଗ ଦେଇଥିଲେ। ଟ୍ରମ୍ପ୍ ରୁଷ-ୟୁକ୍ରେନ ଯୁଦ୍ଧ ବିଷୟରେ ମଧ୍ୟ ଉଲ୍ଲେଖ କରିଥିଲେ। ସେ କହିଥିଲେ "ମୁଁ ୟୁକ୍ରେନରେ ଯୁଦ୍ଧ ଶେଷ କରିବି, ମୁଁ ମଧ୍ୟପ୍ରାଚ୍ୟରେ ବିଶୃଙ୍ଖଳା ବନ୍ଦ କରିବି ଏବଂ ମୁଁ ତୃତୀୟ ବିଶ୍ୱଯୁଦ୍ଧ ଘଟିବାରୁ ରୋକିବି ଏବଂ ଆପଣମାନେ ଜାଣିନାହାନ୍ତି ଯେ, ଆମେ ତୃତୀୟ ବିଶ୍ୱଯୁଦ୍ଧର କେତେ ନିକଟତର?"
ଟ୍ରମ୍ପ ଆମେରିକାର ପିଲାମାନଙ୍କ ମଧ୍ୟରେ ଦେଶପ୍ରେମର ଭାବନା ବୃଦ୍ଧି କରିବାକୁ ମଧ୍ୟ ଚେଷ୍ଟା କରିବାକୁ ଯାଉଛନ୍ତି। ରାଲିରେ ସେ କହିଥିଲେ ଯେ ଆମେ ଆମ ସ୍କୁଲଗୁଡ଼ିକରେ ଦେଶପ୍ରେମ ଫେରାଇ ଆଣିବୁ, ଏବଂ ଆମର ସେନା ଏବଂ ସରକାରରୁ ମୌଳବାଦୀ ବାମପନ୍ଥୀ ଚିନ୍ତାଧାରାରୁ ବାହାର କରିଦେବୁ। ଆମେ ଆମେରିକାକୁ ପୁଣି ଥରେ ମହାନ କରିବୁ।"
ସୂଚନା ମୁତାବକ, ଦାୟିତ୍ୱ ଗ୍ରହଣ କରିବା ପରେ ହିଁ ସେ କାର୍ଯ୍ୟରେ ନଜର ଆସିବେ। ହ୍ୱାଇଟ୍ ହାଉସରେ ପ୍ରବେଶ କରିବା ପରେ ସେ ଖୁବ୍ ଶୀଘ୍ର ୧୦୦ ରୁ ଅଧିକ କାର୍ଯ୍ୟନିର୍ବାହୀ ଅର୍ଡରରେ ସ୍ୱାକ୍ଷର କରିବାର କାର୍ଯ୍ୟକ୍ରମ ରହିଛି। କହିରଖୁଛୁ ଯେ, ସୋମବାର ଶପଥ ଗ୍ରହଣ ଉତ୍ସବରେ ଭାରତ ପକ୍ଷରୁ ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର ଭାରତ ସରକାରଙ୍କ ପ୍ରତିନିଧିତ୍ୱ କରିବେ।
