ଜଳନ୍ଧର,୨୫।୮: ପଞ୍ଜାବର ଜଳନ୍ଧରରେ ବଡ଼ ଧରଣର ଅଘଟଣ। ସୋମବାର ମଧ୍ୟାହ୍ନରେ ଏଠାର ଏକ କ୍ଷୀର ଫ୍ୟାକ୍ଟ୍ରିରେ ଆମୋନିଆ ଗ୍ୟାସ୍ ଲିକ୍ ହେବାପରେ ଆତଙ୍କ ଖେଳିଯାଇଥିଲା। ଭିତରେ ଥିବା ୩୦ରୁ ୪୦ ଜଣ ଶ୍ରମିକ ଅସୁସ୍ଥ ହୋଇପଡିଥିଲେ। ଏହା ପରେ ଫ୍ୟାକ୍ଟ୍ରିର କାନ୍ଥ ଭାଙ୍ଗି କ୍ରେନ୍ ସାହାଯ୍ୟରେ କର୍ମଚାରୀଙ୍କୁ ବାହାର କରାଯାଇଥିଲା। ୩୦ ଜଣଙ୍କୁ ଉଦ୍ଧାର କରାଯାଇ ତାଙ୍କୁ ହସ୍ପିଟାଲକୁ ପଠାଇ ଦିଆଯାଇଛି।
ମିଳିଥିବା ସୂଚନା ଅନୁସାରେ, ଫ୍ୟାକ୍ଟ୍ରି ପରିସରରେ ଆମୋନିଆ ଗ୍ୟାସ ଲିକ୍ ହେବା ଯୋଗୁଁ ଆତଙ୍କ ଖେଳି ଯାଇଥିଲା। କର୍ମଚାରୀମାନେ ଜୀବନ ବିକଳରେ ବାହାରକୁ ଯିବାର ବାଟ ଖୋଜିଥିଲେ। ଦୁର୍ଘଟଣାର ସୂଚନା ମିଳିବା ମାତ୍ରେ ପୋଲିସ ଓ ପ୍ରଶାସନ ଘଟଣା ସ୍ଥଳରେ ପହଁଞ୍ଚିଥିଲା। ସ୍ଥିତିର ଗମ୍ଭୀରତାକୁ ଦେଖି ଅଧିକାରୀମାନେ ଫଶିଥିବା ଶ୍ରମିକଙ୍କୁ ବାହାର କରିବାକୁ ଫ୍ୟାକ୍ଟ୍ରିର କାନ୍ଥ ଭାଙ୍ଗି ଦେଇଥିଲେ। ଏହାପରେ କ୍ରେନ ସାହାର୍ଯ୍ୟରେ ଶ୍ରମିକଙ୍କୁ ସୁରକ୍ଷିତ ବାହାର କରିଥିଲେ।
ଘଟଣାର କାରଣ ଜାଣିବା ପାଇଁ ଏକ ତଦନ୍ତକାରୀ ଗଠନ କରାଯାଇଛି। ଏହି ଘଟଣା ପୁଣିଥରେ ଶିଳ୍ପ ସୁରକ୍ଷା ନିୟମ ଉପରେ ପ୍ରଶ୍ନ ଉଠାଇଛି। ଏହା ଏକ ବଡ଼ ଦୁଃଖଦ ଘଟଣା ହୋଇପାରିଥାନ୍ତା, କିନ୍ତୁ ପ୍ରଶାସନର ତୁରନ୍ତ କାର୍ଯ୍ୟାନୁଷ୍ଠାନ ଶ୍ରମିକଙ୍କ ଜୀବନ ବଞ୍ଚାଇ ପାରିଛି। ବର୍ତ୍ତମାନ ପୁରା ଅଞ୍ଚଳ ପୋଲିସ ନଜରରେ ରହିଛି। ସ୍ଥାନୀୟ ଲେକାଙ୍କୁ ସୁରକ୍ଷିତ ସ୍ଥାନକୁ ଯିବାକୁ ଅପିଲ କରାଯାଇଛି।
