ନରସିଂହପୁର,୦୯/୦୧: ଅପପୃଷ୍ଟି ରୋକିବା ସହ ଶିଶୁଙ୍କ ଶାରୀରିକ ଓ ବୌଦ୍ଧିକ ବିକାଶ ନିମନ୍ତେ ସରକାର ୬ ମାସରୁ ୩ ବର୍ଷ ପର୍ଯ୍ୟନ୍ତ କୋମଳମତି ଶିଶୁ ଓ ଗର୍ଭବତୀ ମହିଳାଙ୍କୁ ଅଣ୍ଡା, ଛତୁଆ ସହ ବିଭିନ୍ନ ପୃଷ୍ଟିକର ଖାଦ୍ୟ ଯୋଗାଇ ଦେଉଛନ୍ତି । ଶିଶୁମାନଙ୍କୁ ଅଙ୍ଗନବାଡ଼ି କେନ୍ଦ୍ରରେ ରନ୍ଧା ଖାଦ୍ୟର ବ୍ୟବସ୍ଥା କରିଛନ୍ତି । ହେଲେ ଏବେ ମହଙ୍ଗା ମାଡ଼ ଯୋଗୁଁ ସରକାରଙ୍କ ଏହି ଯୋଜନା ଅଙ୍ଗନବାଡ଼ି କର୍ମୀଙ୍କ ପାଇଁ କାଳ ପାଲଟିଛି । କାରଣ ସରକାର ଅଙ୍ଗନବାଡ଼ି କେନ୍ଦ୍ରରେ ଶୁଖିଲା ଏବଂ ରନ୍ଧା ଖାଦ୍ୟ ପାଇଁ ଯେଉଁ ଅର୍ଥ ପ୍ରଦାନ କରୁଛନ୍ତି । ତାହା ସମୁଦ୍ରକୁ ଖଙ୍ଖେ ସଦ୍ରୃଶ । ଏଥିପାଇଁ ଅଙ୍ଗନବାଡ଼ି କର୍ମୀ ହଟହଟା ହେଉଛନ୍ତି । ଗୋଟିଏ ଅଣ୍ଡାର ମୂଲ୍ୟ ଆସି ୮ଟଙ୍କାରେ ପହଞ୍ଚିଲାଣି ଏପଟେ ସରକାର ପ୍ରତି ଶିଶୁ ପିଛା ଜଳଖିଆ ଓ ରନ୍ଧା ଖାଦ୍ୟ ପାଇଁ ୮ଟଙ୍କା ଦେଉଛନ୍ତି । ଏପରିସ୍ଥିତିରେ ଅଙ୍ଗନବାଡ଼ି କେନ୍ଦ୍ରରେ ପୃଷ୍ଟିକର ଯୋଜନା କିପରି ଚାଲିବ ବୋଲି ଅଙ୍ଗନବାଡ଼ି କର୍ମୀ ପ୍ରଶ୍ନ କରୁଛନ୍ତି ।
ସୂଚନା ମୁତାବକ, ଅଙ୍ଗନବାଡ଼ି କେନ୍ଦ୍ରରେ ପଢୁଥିବା ପ୍ରତି ଶିଶୁଙ୍କ ପାଇଁ ସରକାର ଅଣ୍ଡା ବାବଦକୁ ୫ ଟଙ୍କା, ପରିବା, ଡାଲି ତରକାରୀ ପାଇଁ ମାତ୍ର ୬୪ ପଇସା, ଚାଉଳ ପାଇଁ ୩୬ ପଇସା, ଜାଳେଣି ପାଇଁ ୫୦ ପଇସା ଏବଂ ଜଳଖିଆ ବାବଦକୁ ମାତ୍ର ୧ ଟଙ୍କା ୫୦ ପଇସା ପ୍ରଦାନ କରୁଛନ୍ତି । ଅର୍ଥାତ୍ ପ୍ରତି ଶିଶୁ ପିଛା ସରକାର ଜଳଖିଆ ଓ ଖାଦ୍ୟ ପାଇଁ ମୋଟ ୮ ଟଙ୍କା ପ୍ରଦାନ କରୁଛନ୍ତି । ସରକାର ଅଣ୍ଡା ପାଇଁ ମାତ୍ର ୫ଟଙ୍କା ଦେଉଥିବା ବେଳେ ବଜାରରେ ଅଣ୍ଡା ଦର ୮ ଟଙ୍କା ଛୁଇଁଲାଣି । ସେହିପରି ହରଡ଼ ଡାଲି କେଜି ୧୬୦ ଟଙ୍କା ହୋଇଥିବା ବେଳେ ତେଲ ଲିଟର ୧୪୦ରୁ ଅଧିକ ହେଲାଣି । ଆଳୁ କେଜି ୪୦ ଟଙ୍କା ହୋଇଥିବା ବେଳେ ଅନ୍ୟ ପନିପରିବା ଦର ଆକାଶ ଛୁଇଁଲାଣି। ଏପଟେ ଜଳଖିଆ ବାବଦକୁ ପ୍ରତି ଶିଶୁଙ୍କୁ ୧ ଟଙ୍କା ୫୦ ପଇସା ମିଳୁଛି । ଏଥିରେ ପିଲାଙ୍କୁ କ’ଣ ଜଳଖିଆ ଦେବୁ ବୋଲି ଅଙ୍ଗନବାଡ଼ି କର୍ମା କହିଛନ୍ତି ।
ରବିବାରକୁ ଛାଡ଼ି ସପ୍ତାହର ଅନ୍ୟ ୬ ଦିନ ମଧ୍ୟରୁ ଦୁଇଦିନ ଗଜା ମୁଗ, ଦୁଇ ଦିନ ଚୁଡ଼ା ମୁଆଁ, ଦୁଇ ଦିନ ବେସନ ଲଡୁ ପ୍ରଦାନ କରୁଛୁ । ଜଣେ ପିଲା ପିଛା ଦେଢ଼ ଟଙ୍କା ଜଳଖିଆ ପାଇଁ ଆସୁଥିବା ବେଳେ ଗୋଟିଏ ବେସନ ଲଡୁର ଦାମ ୫ ଟଙ୍କା ହେଲାଣି । ସରକାର ଜଣ ପିଛା ୮ ଟଙ୍କା ଦେଉଥିବା ବେଳେ ସେଥିରୁ କେବଳ ଅଣ୍ଡା ଦାମ ପାଖାପାଖି ୮ଟଙ୍କା ହେଲାଣି । ଦରଦାମ ଆଶାତୀତ ବୃଦ୍ଧି ପାଉଥିବା ବେଳେ ପିଲାଙ୍କୁ ପୃଷ୍ଟିକର ଖାଦ୍ୟ କିପରି ଯୋଗାଇବୁ ଏହି ଚିନ୍ତାରେ ଅଙ୍ଗନବାଡ଼ି କର୍ମୀ । ଏଥିପ୍ରତି ସରକାର ତୁରନ୍ତ ଧ୍ୟାନ ଦେବା ସହ ଅନୁଦାନ ଅର୍ଥ ବୃଦ୍ଧି କରିବାକୁ ସେମାନେ ଦାବି କରିଛନ୍ତି ।
