ଡେରାଡୁନ,୩୦/୦୫: ୩ ବର୍ଷ ୩୨ ମାସ । ନ୍ୟାୟିକ ପ୍ରକ୍ରିୟା ପରେ ଝିଅକୁ ନ୍ୟାୟ ମିଳିବା ନେଇ ପରିବାରର ଅପେକ୍ଷା । ଝିଅକୁ ହରାଇବା ଦୁଃଖ ଭିତରେ ବି ନ୍ୟାୟ ମିଳିବା ନେଇ ଥିଲା ବିଶ୍ୱାସ । ଶେଷରେ ସତ୍ୟର ଜୟ ହୋଇଛି । ଉତ୍ତରାଖଣ୍ଡରେ ୩ ବର୍ଷ ତଳେ ହୋଇଥିବା ହତ୍ୟାକାଣ୍ଡର ରାୟ ଶୁଣାଇଛନ୍ତି ଉତ୍ତରାଖଣ୍ଡ କୋର୍ଟ । ହତ୍ୟା ଘଟଣାରେ ୩ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିବା ସହ ଆଜୀବନ ସଜା ଶୁଣାଇଛନ୍ତି କୋର୍ଟ ।
ଆଜୀବନ ଦଣ୍ଡାଦେଶ- ତିନି ଅଭିଯୁକ୍ତ ଆର୍ଯ୍ୟ ସୌରଭ ଭାସ୍କର, ଅଙ୍କିତ ଗୁପ୍ତା ଓ ପୁଲକିତ ଆର୍ଯ୍ୟ ଦୋଷୀ ସାବ୍ୟସ୍ତ ହୋଇଛନ୍ତି । ୮ ମାସ ଧରି ଚାଲିଥିବା ଶୁଣାଣିରେ ୪୭ ଜଣ ବୟାନ ଦେଇଥିଲେ । ପୁରା ମାମଲାରେ ଏସଆଇଟି ୯୭ ପ୍ରମାଣ ରଖିଥିଲେ । ସେଥିରୁ ୪୭ଟି ଗୁରୁତ୍ୱପୂର୍ଣ୍ଣ ପ୍ରମାଣ କୋର୍ଟରେ ଉପସ୍ଥାପିତ ହୋଇଥିଲା । ଉକ୍ତ ପ୍ରମାମ ଆଧାରରେ ଦୋଷୀଙ୍କୁ ଆଜୀବନ ଦଣ୍ଡା ଶୁଣାଇଛନ୍ତି ଅଦାଲତ ।
ଅଙ୍କିତା ଭଣ୍ଡାରୀ ହତ୍ୟା ମାମଲା- ଉତ୍ତରାଖଣ୍ଡ ଋଷିକେଶର ପୌଡି ଜିଲ୍ଲା ଭୋଗପୁର ଅଞ୍ଚଳର ଏକ ରିଜର୍ଟରେ ରିସେପସନିଷ୍ଟ ଭାବେ କାମ କରୁଥିଲେ ଅଙ୍କିତା । ୨୦୨୨ ୧୮ ଡ଼ିସେମ୍ବରରେ ୧୯ ବର୍ଷୀୟ ଅଙ୍କିତାଙ୍କୁ ହତ୍ୟା କରାଯାଇଥିଲା । ଘଟଣାର ସପ୍ତାହେ ପରେ ଚିନ ନଦୀରୁ ଅଙ୍କିତାଙ୍କ ମୃତଦେହ ମିଳିଥିଲା । ଘଟଣାରେ ପୋଲିସ ରିଜର୍ଟ ମାଲିକ ପୁଲକିତ ଆର୍ୟଙ୍କ ସହିତ ତାଙ୍କର ଦୁଇ କର୍ମଚାରୀ ସୌରଭ ଭାସ୍କର ଓ ଅଙ୍କିତ ଗୁପ୍ତାଙ୍କୁ ଗିରଫ କରିଥିଲା । ରିଜର୍ଟରେ ଭିଆଇପିଙ୍କୁ ଅତିରିକ୍ତ ସେବା ଦେବାକୁ ଅଙ୍କିତା ମନା କରିବାରୁ ତାଙ୍କୁ ହତ୍ୟା କରାଯାଇଥିବା କୁହାଯାଉଛି ।
୩୨ ମାସରେ କ'ଣ କ'ଣ ହେଲା ? ଉତ୍ତରାଖଣ୍ଡରେ ଚହଳ ପକାଇଥିଲା ଅଙ୍କିତା ଭଣ୍ଡାରୀଙ୍କ ହତ୍ୟା ଘଟଣା । ୨୪ ଘଣ୍ଟା ମଧ୍ୟରେ ଅଭିଯୁକ୍ତଙ୍କୁ ଗିରଫ କରି ଜେଲ ପଠାଯାଇଥିଲା । ଏବେ ବି ଜେଲ୍ ଚାରିକାନ୍ଥ ଭିତରେ ରହିଛନ୍ତି । ହତ୍ୟା ଘଟଣାର ତଦନ୍ତ ନେଇ ଏସଆଇଟି ଟିମ୍ ଗଠନ ହୋଇଥିଲା । ଏହାଛଡ଼ା ଅଭିଯୁକ୍ତ ଉପରେ ଗ୍ୟାଙ୍ଗଷ୍ଟାର ଅଧିନିୟମ ଅଧୀନରେ ମାମଲା ରୁଜ୍ଜୁ ହୋଇଥିଲା । ଧାମି ସରକାରଙ୍କ ପକ୍ଷରୁ ଅଙ୍କିତା ଭଣ୍ଡାରୀଙ୍କ ପକ୍ଷରୁ ୨୫ ଲକ୍ଷ ଟଙ୍କାର ଆର୍ଥିକ ସହାୟତା ପ୍ରଦାନ କରାଯାଇଥିଲା । ମାମଲାରେ ୫୦୦ ଫର୍ଦ୍ଦର ଚାର୍ଜସିଟ୍ ଦାଖଲ ହୋଇଥିଲା । ପରିବାର ଦାବିରେ ୩ ଥର ସରକାରୀ ଓକିଲ ବଦଳିଥିଲେ । ଏହା ସହିତ ଅଙ୍କିତାଙ୍କ ଭାଇ ଓ ବାପାଙ୍କୁ ସରକାରୀ ଚାକିରି ପ୍ରଦାନ କରାଯାଇଥିଲା । ମାମଲା ପରିବାର ସପକ୍ଷରେ ରହିଥିଲା । ବାରମ୍ବାର ଅଭିଯୁକ୍ତଙ୍କ ଜାମିନ୍ ଆବେଦନ୍ ଖାରଜ ହୋଇଥିଲା ।
