ଭୁବନେଶ୍ୱର, ୨୫/୦୧: କଟକ ନଗର ଜିଲ୍ଲା ବିଜେପି ସଂଗଠନକୁ ମିଳିଛି ନୂଆ ମଙ୍ଗୁଆଳ । ଯୁବନେତା ସୁକାନ୍ତ କୁମାର ବିଶ୍ୱାଳ ନୂଆ ସଭାପତି ଭାବେ ଶନିବାର ଦାୟିତ୍ୱ ଗ୍ରହଣ କରିଛନ୍ତି । ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କ ଉପସ୍ଥିତିରେ ଆଜି ନୂଆ ସଭାପତି ଏବଂ ପ୍ରମୁଖ କାର୍ଯ୍ୟକର୍ତ୍ତାଙ୍କ ନାଁ ଘୋଷଣା କରାଯାଇଛି ।
ବାରବାଟୀ କଟକ, ଚୌଦ୍ୱାର କଟକ, କଟକ ସଦର, ନିଆଳୀ ଏବଂ ବାଙ୍କୀ ନିର୍ବାଚନ ମଣ୍ଡଳୀକୁ ନେଇ ବିଜେପି ନୂଆ ସାଙ୍ଗଠନିକ ଜିଲ୍ଲା ରୂପେ ଘୋଷଣା କରିଛି । ଗତ ସାଧାରଣ ନିର୍ବାଚନରେ ଏହି ୫ଟି ନିର୍ବାଚନ ମଣ୍ଡଳୀ ମଧ୍ୟରୁ ଗୋଟିଏ କଂଗ୍ରେସ, ୨ଟି ବିଜେଡି ଏବଂ ଅନ୍ୟ ୨ଟି ନିର୍ବାଚନ ମଣ୍ଡଳୀରେ ବିଜେପିର ବାଜିମାତ ହୋଇଛି । ତେଣୁ ନୂଆ ସଭାପତି ଓ ତାଙ୍କ ଟିମ୍ ପାଇଁ ଅନେକ ଆହ୍ୱାନ ରହିଛି ବୋଲି କୁହାଯାଇପାରେ। ତେବେ ସେସବୁର ମୁକାବିଲା କରିବାରେ ତାଙ୍କ ସଂଗଠନ ପ୍ରସ୍ତୁତ ରହିଛି । ଆଗକୁ ବିଜେପି ତାର ଅଭିଯାନରେ ସଫଳ ହେବ ବୋଲି କହିଛନ୍ତି ପୃଥ୍ୱୀରାଜ।
ଅନ୍ୟପଟେ କେନ୍ଦ୍ରାପଡ଼ା ଜିଲ୍ଲା ବିଜେପି ନୂତନ ସଭାପତି ଭାବେ ଶଶାଙ୍କ ଶେଖର ସେଠି ନିର୍ବାଚିତ ହୋଇଛନ୍ତି । ଜିଲା ସଂସ୍କୃତି ଭବନ ଠାରେ ଆୟୋଜିତ ସଂଗଠନ ପର୍ବରେ ନିର୍ବାଚନ ଅଧିକାରୀ ବିନୋଦ ଦାଶ ଏହି ଘୋଷଣା କରଛନ୍ତି । ସଭାପତି ପଦ ପାଇଁ ୫ ଜଣ ପ୍ରାର୍ଥୀ ପତ୍ର ଦାଖଲ କରିଥିବା ବେଳେ ସେମାନଙ୍କ ମଧ୍ୟରୁ ଜଣଙ୍କର ନାକଚ ହୋଇଥିଲା । ରାଜ୍ୟ ପରଷଦକୁ ୮ ଜଣ ନିର୍ବାଚିତ ହୋଇଛନ୍ତି । ଢେଙ୍କାନାଳ ଜିଲ୍ଲା ବିଜେପି ସଭାପତିଙ୍କ ନାମ ମଧ୍ୟ ଘୋଷଣା କରାଯାଇଛି । ନୂତନ ସଭାପତି ଭାବେ ନିର୍ବାଚିତ ହେଲେ ରାସ ବିହାରୀ ବେହେରା । ବଲାଙ୍ଗିର ଜିଲ୍ଲା ନୂତନ ବିଜେପି ସଭାପତିଙ୍କ ନାଁ ଆଜି ଘୋଷଣା କରାଯାଇଛି । ଶ୍ରୀବତ୍ସ ବେହେରା ବଲାଙ୍ଗିର ଜିଲ୍ଲା ନୂତନ ବିଜେପି ସଭାପତି ହୋଇଛନ୍ତି ।
