କଟକ, ୦୬/୦୩: ଲୋକପ୍ରିୟ ଯୋଡ଼ି ଅନୁଭବ-ଜାଗ୍ରତିଙ୍କ ବାହାଘରକୁ ନେଇ ସୋସିଆଲ୍ ମିଡିଆରେ ଚର୍ଚ୍ଚା ଜୋର୍ ଧରିଛି । ବିଶେଷକରି ବାହାଘର ତାରିଖକୁ ନେଇ ଅନେକ ଦ୍ୱନ୍ଦ୍ୱ ସାମ୍ନାକୁ ଆସିଛି । କିଏ ଆସନ୍ତା ୧୧ ତାରିଖରେ ବାହାଘର ହେବ ବୋଲି କହୁଥିଲାବେଳେ ଆଉ କିଏ ଆସନ୍ତା ଏପ୍ରିଲ୍ ୧ ତାରିଖରେ ହେବ ବୋଲି ସୋସିଆଲ୍ ମିଡିଆରେ ପୋଷ୍ଟ୍ କରିଛନ୍ତି । ଏମିତିକି ଆସନ୍ତା କାଲି ଉଭୟଙ୍କ ନିର୍ବନ୍ଧ ବୋଲି ମଧ୍ୟ କୁହାଯାଉଛି । ଯଦିଓ ଉଭୟଙ୍କ ପକ୍ଷରୁ କୌଣସି ସ୍ପଷ୍ଟ ସୂଚନା ଦିଆଯାଇ ନାହିଁ ତଥାପି ଫ୍ୟାନ୍ମାନଙ୍କ ମଧ୍ୟରେ ଏହାକୁ ନେଇ ଉତ୍ସାହ ବଢିଛି । କେଉଁଦିନ ଓ କେଉଁଠି ସେମାନେ ବିବାହ ବନ୍ଧନରେ ବାନ୍ଧିହେବେ ତାହା ଉପରେ ସମସ୍ତଙ୍କର ନଜର ରହିଛି ।
ସିନେ ଅଭିନେତା ତଥା ପୂର୍ବତନ ସାଂସଦ ଅନୁଭବ ମହାନ୍ତିଙ୍କ ସହିତ ଅଭିନେତ୍ରୀ ବର୍ଷା ପ୍ରିୟଦର୍ଶିନୀଙ୍କ ବିବାହ ବିଚ୍ଛେଦ ପରେ ଅନୁଭବଙ୍କ ପରବର୍ତ୍ତୀ ପଦକ୍ଷେପକୁ ନେଇ ଚର୍ଚ୍ଚା ଲାଗି ରହିଛି । କାରଣ ଦୀର୍ଘବର୍ଷ ହେବ ଅନୁଭବ ତାଙ୍କର ବାନ୍ଧବୀ ଜାଗ୍ରତି ଶୁକ୍ଳାଙ୍କ ସହିତ ବିଭିନ୍ନ ଫଟୋ ଅପ୍ଲୋଡ୍ କରିବା ଚର୍ଚ୍ଚାକୁ ଖୋରାକ୍ ଜଗାଉଛି । ଏମିତିକି ଅନେକ ସମୟରେ ଉଭୟଙ୍କ ସୋସିଆଲ୍ ମିଡିଆ ପୋଷ୍ଟ୍ ଓ ଜାଗୃତିଙ୍କ ଦ୍ୱାରା ଅନୁଭବଙ୍କ ଉପରେ ପୁସ୍ତକ ଲେଖିବା ଘଟଣା ମଧ୍ୟ ଚର୍ଚ୍ଚାରେ ବିଷୟବସ୍ତୁ ପାଲଟିଛି । ଏହାସହ କିଛି ଦିନ ତଳେ ଜାଗ୍ରତି ଏକ ଗଣମାଧ୍ୟମରେ ଉଭୟଙ୍କୁ ନେଇ ବିଭିନ୍ନ ମତ ଦେବା ପରେ ଦ୍ୱନ୍ଦ୍ୱ ଅଧିକ ବଢିଥିଲା । ଏବେ ଉଭୟଙ୍କ ବିବାହକୁ ନେଇ ଅନେକ ଆଲୋଚନା କରାଯାଉଛି । କାରଣ କେତେକ ବ୍ୟକ୍ତି ଆସନ୍ତା କାଲି ନିର୍ବନ୍ଧ ଓ ମାର୍ଚ୍ଚ ୧୧ ରେ ବାହାଘର ହେବ ବୋଲି କହୁଛନ୍ତି । ଅନ୍ୟପକ୍ଷରେ ଆଉ କିଛି ଫ୍ୟାନ୍ ଏପ୍ରିଲ୍ ୧ ରେ ବାହାଘର ଓ ୪ ରେ ଭୋଜି ହେବ ବୋଲି ସୋସିଆଲ୍ ମିଡିଆରେ ପୋଷ୍ଟ୍ କରୁଛନ୍ତି । ଏମିତିକି ଏସବୁ କିଛି କାର୍ଯ୍ୟକ୍ରମ ଓଡିଶା ବାହାରେ ହେବ ବୋଲି ବି କୁହାଯାଉଛି । କିନ୍ତୁ ଏ ସମ୍ପର୍କରେ ଉଭୟଙ୍କ ପ୍ରତିକ୍ରିୟା ମିଳିପାରିନାହିଁ।
