ନୀଳଗିରି,୦୭/୧୨: ବାଲେଶ୍ବର ଜିଲ୍ଲା କୁଳଡିହା ଅଭୟାରଣ୍ୟ ସୀମାନ୍ତରେ ଘୁରି ବୁଲୁଛି କି ବାଘ ? ଏକ ବିରାଟ ପାଦ ଚିହ୍ନ ଜଙ୍ଗଲ ଓ ସୀମାନ୍ତରେ ପଡିବା ନେଇ ଆତଙ୍କିତ ହୋଇ ପଡିଛନ୍ତି ଅଞ୍ଚଳବାସୀ ।
ସୂଚନା ମୁତାବକ, ବାଲେଶ୍ଵର ଜିଲ୍ଲା ନୀଳଗିରି ଅଞ୍ଚଳରେ ଘଞ୍ଚ ଜଙ୍ଗଲ ଭରା କୁଳଡିହା ଅଭୟାରଣ୍ୟ ରହିଛି ।୨୭୨.୭୫ ବର୍ଗ କିଲୋମିଟର ପରିଧି ବିଶିଷ୍ଟ ଏହି ଅଭୟାରଣ୍ୟରେ ହରିଣ, ସମ୍ବର, ଗୟଳ, କୁଟାରୀ, ଝିଙ୍କ, ଭାଲୁ, ହାତୀ, ବାଘ ଅଛନ୍ତି । ତେବେ ଅଭୟାରଣ୍ୟ ଭିତରେ ଜଡ଼ାଚୁଆ ବିଟ ନିକଟରେ ପୂର୍ବରୁ ବାଘ ଏବଂ ହରିଣ ଶିକାର କରିବାର ଖବର ରହିଛି । ଅଭୟାରଣ୍ୟଟି ଶିମିଳିପାଳକୁ ଲାଗିଥିବା ବେଳେ ଦୁଇ ବର୍ଷ ତଳେ ବିରାଟ ପାଦଚିହ୍ନ ପଡିଥିବା ଦେଖି ସମସ୍ତଙ୍କ ନିଦ ହଜିଯାଇଥିଲା । କେହିକେହି ଶିମିଳିପାଳରୁ ମହାବଳ ବାଘ ବୋଲି କହି ସମସ୍ତଙ୍କ ଆଖିରୁ ନିଦ ହଜାଇ ଦେଇଥିଲେ । ବନବିଭାଗ ତରଫରୁ ପ୍ଲାଷ୍ଟର ପ୍ୟାରିସ ଓ ଟ୍ରାପ କ୍ୟାମେରା ବସାଇ ଯାଇଥିଲେ ମଧ୍ୟ ବାଘକୁ ନେଇ ବନବିଭାଗ ସ୍ପଷ୍ଟ କରି ନଥିଲା । ତେବେ ପୁଣି କୁଳଡିହା ଅଭୟାରଣ୍ୟ ସୀମାନ୍ତର ଅନେକ ବନ୍ଧ ଓ ଡ୍ୟାମ ନିକଟରେ ବିଭିନ୍ନ ପାଦ ଚିହ୍ନ ପଡିଥିବା ଦେଖିବାକୁ ମିଳିଛି । ଜୀବଜନ୍ତୁ ଆସି ପାଣି ପିଇବା ସମସ୍ତେ ଜାଣିଥିବା ବେଳେ ଏକ ବିରାଟ ପାଦଚିହ୍ନ ପଡିବା ଗ୍ରାମବାସୀଙ୍କୁ ଭୟଭୀତ କରିଛି । ଏହା କୌଣସି ବାଘର ପାଦ ଚିହ୍ନ ବୋଲି ବନାଞ୍ଚଳବାସୀ କହିଛନ୍ତି । ତେବେ ବନ ବିଭାଗ ଏହାର ତଦନ୍ତ କରି ସ୍ପଷ୍ଟ କରିବାକୁ ଦାବି ହୋଇଛି ।
