ନୂଆଦିଲ୍ଲୀ, ୧୪/୦୮ : ସରିଲା ନିର୍ବନ୍ଧ... ପଡ଼ିବ ହାତଗଣ୍ଠି। ଖୁବ୍ଶୀଘ୍ର ହାତକୁ ଦିହାତ ହେବେ ଅର୍ଜୁନ ତେନ୍ଦୁଲକର। ନିଜର ଲଙ୍ଗ୍ ଟାଇମ୍ ପ୍ରେମିକା ସାନିଆ ଚାଣ୍ଡୋକଙ୍କ ସହ ଏନଗେଜ୍ମେଣ୍ଟ କରିଛନ୍ତି ୨୫ ବର୍ଷୀୟ ଅର୍ଜୁନ। ପରିବାର ଉପସ୍ଥିତିରେ ପ୍ରେମିକାଙ୍କୁ ପିନ୍ଧାଇଛନ୍ତି ନିର୍ବନ୍ଧ ମୁଦି। ଖୁବ୍ କମ୍ ଲୋକଙ୍କ ଉପସ୍ଥିତିରେ ପ୍ରାଇଭେଟ୍ ଇଭେଣ୍ଟରେ ନିର୍ବନ୍ଧ ସରିଛି। ତେବେ ଅର୍ଜୁନ ଓ ସାନିଆଙ୍କ ନିର୍ବନ୍ଧ ପରେ ଦୁଇ ପ୍ରଭାବଶାଳୀ ପରିବାର ମଧ୍ୟରେ ସମ୍ପର୍କ ଯୋଡ଼ି ହୋଇଛି। ଏନେଇ ସଚ୍ଚିନଙ୍କ ପରିବାର ପକ୍ଷରୁ କୌଣସି ସୂଚନା ଦିଆଯାଇ ନାହିଁ।
ଅଗଷ୍ଟ ୧୩ ତାରିଖରେ ଲୁଚି ଲୁଚି ନିର୍ବନ୍ଧ କରିଛନ୍ତି ଅର୍ଜୁନ। ତେବେ କିଏ ଏହି ସାନିଆ ଚାଣ୍ଡୋକ ? ଯିଏ ହେବେ ସଚ୍ଚିନ ଓ ଅଞ୍ଜଳି ତେନ୍ଦୁଲକରଙ୍କ ଏକମାତ୍ର ପୁତ୍ରବଧୂ। ମୁମ୍ଵାଇର ଜଣାଶୁଣା ବ୍ୟବସାୟୀ ରବି ଘଈଙ୍କ ନାତୁଣୀ ହେଉଛନ୍ତି ସାନିଆ ଚାଣ୍ଡୋକ। ଅରବପତି ପରିବାରର ଝିଅ ହୋଇଥିଲେ ସୁଦ୍ଧା ନିଜ ରାସ୍ତା ନିଜେ ତିଆରି କରିଛନ୍ତି ସାନିଆ। ସେ ନିଜେ ଜଣେ ବିଜନେସ୍ ୱିମେନ୍। ସେ ଲଣ୍ଡନ ସ୍କୁଲ୍ ଅଫ୍ ଇକୋନୋମିକ୍ସରେ ଗ୍ରାଜୁଏସନ ଶେଷ କରିଛନ୍ତି। ମୁମ୍ଵାଇର ଏକ ପ୍ରିମିୟମ୍ ପେଟ୍ ସାଲନ୍, ସ୍ପା ଓ ଷ୍ଟୋର ଖୋଲିଛନ୍ତି। ସେ ସୋସିଆଲ ମିଡିଆରେ ନିଜର ଆକାଉଣ୍ଟକୁ ବ୍ୟକ୍ତିଗତ ରଖନ୍ତି।
ଦୀର୍ଘ ଦିନ ହେଲା ଷ୍ଟ୍ରଗଲ୍ କରୁଥିବା ଅର୍ଜୁନଙ୍କୁ କ୍ରିକେଟ୍ କ୍ୟାରିଅର୍ରେ ସଫଳତା ମିଳିନି। ସଚ୍ଚିନ ଯେଉଁ ଶିଖର ଛୁଇଁଛନ୍ତି ଅର୍ଜୁନ ସେପର୍ଯ୍ୟନ୍ତ ପହଞ୍ଚିବାକୁ ସଙ୍ଘର୍ଷ ଜାରି ରଖିଛନ୍ତି। ଅର୍ଜୁନ ଘରୋଇ କ୍ରିକେଟରେ ଗୋଆ ଓ ଆଇପିଏଲ୍ରେ ମୁମ୍ଵାଇ ଇଣ୍ଡିଆନ୍ସ ତରଫରୁ ଖେଳନ୍ତି। ସେ ଜଣେ ବାମହାତୀ ଦ୍ରୁତ ବୋଲର ଅଲରାଉଣ୍ଡର। ସେ ବାମ ହାତରେ ବଡ଼ ସଟ୍ ମାରିବାରେ ମାହିର। ତେବେ ସାନିଆଙ୍କ ବିଜନେସ୍ ଆଇଡିଆ ଓ ଅର୍ଜୁନଙ୍କ କ୍ରିକେଟ୍ ପ୍ରତି ତପସ୍ୟା ଯୋଗୁଁ ଦୁହିଁଙ୍କୁ ଏକ ପାୱାର କପୁଲ୍ ଭାବେ ଗଢି ତୋଳିବ ବୋଲି ଫ୍ୟାନ୍ସ କହୁଛନ୍ତି।
