ଅମୃତସର: ପଞ୍ଜାବର ଅମୃତସରରେ ପୁଲିସ ଏକ ବଡ଼ ଗୁପ୍ତଚର ଷଡ଼ଯନ୍ତ୍ରର ପର୍ଦାଫାସ କରିଛି। ଭାରତୀୟ ସେନାର ଜଣେ ଯବାନ ଗୁରପ୍ରୀତ ସିଂ ଓ ତାଙ୍କ ସହଯୋଗୀ ସାହିଲ ମସିହଙ୍କୁ ପାକିସ୍ତାନର ଗୁପ୍ତଚର ସଂସ୍ଥା ଇଣ୍ଟର-ସର୍ଭିସେସ ଇଣ୍ଟେଲିଜେନ୍ସ (ISI) ପାଇଁ ଗୁଇନ୍ଦାଗିରି କରିବା ଅଭିଯୋଗରେ ଗିରଫ କରାଯାଇଛି। ଏହି ଘଟଣା ଭାରତ ଓ ପାକିସ୍ତାନ ମଧ୍ୟରେ ଚାଲିଥିବା ଉତ୍ତେଜନା ମଧ୍ୟରେ ଆହୁରି ଜଟିଳତା ସୃଷ୍ଟି କରିଛି।

ଅମୃତସର ଗ୍ରାମାଞ୍ଚଳ ପୁଲିସର ବରିଷ୍ଠ ଅଧିକାରୀ ମନିନ୍ଦର ସିଂ କହିଛନ୍ତି ଯେ, ସାହିଲ ମସିହଙ ସନ୍ଦିଗ୍ଧ ଆର୍ଥିକ କାରବାର ସମ୍ପର୍କରେ ଗୁଇନ୍ଦା ସୂଚନା ମିଳିବା ପରେ ତଦନ୍ତ ଆରମ୍ଭ ହୋଇଥିଲା। ତଦନ୍ତରୁ ଜଣାପଡ଼ିଛି ଯେ ଗୁରପ୍ରୀତ ସିଂ ବର୍ତ୍ତମାନ ସେନାରେ ସିପାହି ଭାବେ କାର୍ଯ୍ୟ କରୁଛନ୍ତି। ସେ ISI ସହିତ ସମ୍ପର୍କ ରଖି ସମ୍ବେଦନଶୀଳ ସେନା ସୂଚନା ଲିକ୍ କରୁଥିଲେ। ଉଭୟ ଅଭିଯୁକ୍ତ ମୋବାଇଲ ଫୋନ ଓ ସୋସିଆଲ ମିଡିଆ ମାଧ୍ୟମରେ ପାକିସ୍ତାନୀ ଏଜେଣ୍ଟମାନଙ୍କ ସହ ଯୋଗାଯୋଗ କରୁଥିଲେ ଏବଂ ସେନା ଅଞ୍ଚଳ ଓ ଏୟାର ବେସ୍‍ର ଫଟୋ ଓ ତଥ୍ୟ ପଠାଉଥିଲେ।

ପୁଲିସ ସୂତ୍ରରୁ ଜଣାପଡ଼ିଛି ଯେ ଅଭିଯୁକ୍ତମାନେ ପ୍ରତି ସୂଚନା ବଦଳରେ ଅର୍ଥ ପାଉଥିଲେ। ଯାହା ଅନଲାଇନ ମାଧ୍ୟମରେ ସ୍ଥାନାନ୍ତରିତ ହେଉଥିଲା। ଏହି ଘଟଣା ଏପ୍ରିଲ ୨୨ରେ ଜାମ୍ମୁ-କାଶ୍ମୀରର ପାହାଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଆହୁରି ଗମ୍ଭୀର ହୋଇଛି। ଏହି ଆତଙ୍କୀ ଆକ୍ରମଣରେ ୨୬ ଜଣ ନାଗରିକ ନିହତ ହୋଇଥିଲେ। ଏହା ପରେ ପଞ୍ଜାବ ପୁଲିସ ଗୁପ୍ତଚର କାର୍ଯ୍ୟ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିଛି।

ପୁଲିସ ଅଧିକାରୀମାନେ କହିଛନ୍ତି ଯେ ଅଭିଯୁକ୍ତଙ୍କ ମୋବାଇଲରୁ ପାକିସ୍ତାନୀ ନମ୍ବର ସହ ଯୋଗାଯୋଗର ପ୍ରମାଣ ମିଳିଛି। ଏହି ମାମଲାରେ ଅଫିସିଆଲ ସିକ୍ରେଟ୍ସ ଆକ୍ଟ ଅନୁଯାୟୀ ଏଫଆଇଆର ମଧ୍ୟ ଦାୟାର କରାଯାଇଛି ଏବଂ ଅଧିକ ତଦନ୍ତ ଜାରି ରହିଛି। ଗୁପ୍ତଚର ନେଟୱାର୍କର ଅନ୍ୟ ସମ୍ଭାବ୍ୟ ସଂଯୋଗ ଚିହ୍ନଟ କରିବା ପାଇଁ ପୁଲିସ ଗୁଇନ୍ଦା ଏଜେନ୍ସିଗୁଡ଼ିକ ସହ ମିଳିମିଶି କାର୍ଯ୍ୟ କରୁଛି।

ଏହି ଗିରଫଦାରୀ ଦେଶର ସୁରକ୍ଷା ବ୍ୟବସ୍ଥାରେ ଆଭ୍ୟନ୍ତରୀଣ ବିଶ୍ୱାସଘାତକତାର ଏକ ଗମ୍ଭୀର ସମସ୍ୟାକୁ ଉଜାଗର କରିଛି। ସରକାର ଓ ସେନା ଏହାକୁ ଗୁରୁତର ଭାବେ ନେଇ ଆଗକୁ ଏଭଳି ଘଟଣା ରୋକିବା ପାଇଁ କଡ଼ା ପଦକ୍ଷେପ ଗ୍ରହଣ କରିବେ ବୋଲି ଆଶା କରାଯାଉଛି।