ଭୁବନେଶ୍ୱର,୨୬/୬ : ରଥଯାତ୍ରା ପାଇଁ ସୂକ୍ଷ୍ମକଳାରେ ନୂଆ କାମ କରିଛନ୍ତି ଶିଳ୍ପୀ ଏଲ୍‌. ଈଶ୍ୱର ରାଓ । ଜଟଣୀ ଗୋପୀନାଥପୁର ହାଟବଜାରର ଈଶ୍ୱର ପ୍ରତି ବର୍ଷ ରଥଯାତ୍ରା ପାଇଁ କିଛି ନା କିଛି ସୂକ୍ଷ୍ମ କଳାକୃତି ପ୍ରସ୍ତୁତ କରିଥାନ୍ତି । ଚଳିତବର୍ଷ ୨୦୦ ଏମ୍‌ଏଲ୍‌ ପ୍ଲାଷ୍ଟିକ୍‌ ବୋତଲ ଭିତରେ ଚତୁର୍ଦ୍ଧାମୂର୍ତ୍ତି ନିର୍ମାଣ କରିଛନ୍ତି। ଚକ୍‌ ଖଡ଼ିରେ ନିର୍ମିତ ମୂର୍ତ୍ତି ୧ ଇଞ୍ଚ ଉଚ୍ଚତା ବିଶିଷ୍ଟ ରହିଛି। ମୂର୍ତ୍ତିଗୁଡ଼ିକୁ ବୋତଲ ଭିତରେ ପଥରରେ ପ୍ରସ୍ତୁତ ସିଂହାସନରେ ବସାଇଛନ୍ତି ଯାହାର ଉଚ୍ଚତା ସାଢ଼େ ୨ ଇଞ୍ଚ ଏବଂ ଚଉଡ଼ା ୨ ଇଞ୍ଚ । ଏହା ପଛପଟେ ପେପର୍‌ କ୍ରାଫ୍ଟରେ ୫ ଇଞ୍ଚର ରଥର ଉପରିଭାଗ ପ୍ରସ୍ତୁତ କରିଛନ୍ତି। ଏହି କାମ ପାଇଁ ତାଙ୍କୁ ୫ ଦିନ ସମୟ ଲାଗିଥିଲା । ଏହି କଳା ମାଧ୍ୟମରେ ଈଶ୍ୱର ସମସ୍ତଙ୍କୁ ରଥଯାତ୍ରାର ଶୁଭେଚ୍ଛା ଜଣାଇବା ସହ ଯେଉଁମାନେ ରଥଯାତ୍ରାରେ ପୁରୀ ଯାଉଛନ୍ତି ସେମାନେ ପ୍ଲାଷ୍ଟିକ୍‌ ବ୍ୟବହାର ନକରିବାକୁ ବିଶେଷ ଅନୁରୋଧ କରିଛନ୍ତି ।