ପାଟନା,୧୭/୧୧: ବିହାରର ରାଜଗିରିରେ ଚାଲିଥିବା ମହିଳା ଏସିଆନ ଚମ୍ପିଆନ୍ସ ଟ୍ରଫିରେ ଭାରତୀୟ ଦଳ ଦମଦାର ପ୍ରଦର୍ଶନ କରିଛି । ଏସିଆନ ଚମ୍ପିଆନ୍ସ ଟ୍ରଫିରେ ଡିପେଣ୍ଡି ଚମ୍ପିଅନ ଭାରତ ଲଗାତାର ଚତୁର୍ଥ ବିଜୟ ସହ ସେମିଫାଇନାଲରେ ପ୍ରବେଶ କରିଛି । ଆଜି ତାର ଶେଷ ଲିଗ ମ୍ୟାଚରେ ଜାପାନକୁ ଭେଟିବ ।
ଚୀନ ବିପକ୍ଷ ମୁକାବିଲାରେ ଭାରତ ଦମଦାର ବିଜୟ ହାସଲ କରିଥିଲା । ଅଲମ୍ପିକ୍ସ ରୌପ୍ୟ ପଦକ ବିଜେତା ଚୀନକୁ ୩-୦ ଗୋଲରେ ପରାସ୍ତ କରି ସେମି ଫାଇନାଲରେ ସ୍ଥାନ ପକ୍କା କରିଛି ମହିଳା ହକି ଦଳ । ଆୟୋଜକ ଭାରତ ୪ଟି ମ୍ୟାଚରେ ବିଜୟ ସହ ୧୨ ପଏଣ୍ଟ ପାଇ ପଏଣ୍ଟ ଟେବୁଲ ଶୀର୍ଷରେ ରହିଛି । ଚୀନ ୯ ପଏଣ୍ଟ ସହ ଦ୍ବିତୀୟ ସ୍ଥାନରେ ରହିଛି । ଶେଷ ଗ୍ରୁପ ମ୍ୟାଚରେ ଆଜି ଜାପାନକୁ ଭେଟିବ ଭାରତ ।
ଭାରତ ଓ ଚୀନ ମ୍ୟାଚ ସଂଘର୍ଷପୂର୍ଣ୍ଣ ରହିଥିଲା । ପ୍ରଥମ ୩୦ ସେକେଣ୍ଡରେ ଭାରତକୁ ପେନାଲ୍ଟି କର୍ଣ୍ଣର ମିଳିଥିଲା । ମାତ୍ର ଭାରତ ବିଫଳ ହୋଇଥିଲା । ପ୍ରଥମ ଓ ଦ୍ବିତୀୟ କ୍ବାର୍ଟର ଗୋଲଶୂନ୍ୟ ରହିଥିଲା । ଦ୍ବିତୀୟ କ୍ବାର୍ଟରରେ ସଙ୍ଗୀତାଙ୍କ ଗୋଲରେ ଭାରତ ଖାତା ଖୋଲିଥିଲା । ଏହାର ୫ ମିନିଟ ପରେ ଦଳର ଅଧିନାୟିକା ସଲିମା ଟେଟେ ଦ୍ବିତୀୟ ଗୋଲ ସ୍କୋର କରିଥିଲେ ।
ଗୋଲ କରିବାକୁ ସୁଯୋଗ ଖୋଜୁଥିବା ଚୀନ ବିଫଳ ହୋଇଥିଲା । ମ୍ୟାଚରେ ଖାତା ଖୋଲି ପାରିନଥିଲା । ଅନ୍ତିମ କ୍ବାର୍ଟରରେ ଭାରତ ଆଧିପତ୍ୟ ଜାରି ରଖିଥିଲା । ଦ୍ବିତୀୟ ପେନାଲ୍ଟିକୁ ଗୋଲ ରୂପ ଦେଇଥିଲେ ଦୀପିକା । ୩-୦ ଗୋଲରେ ବାଜି ମାରି ନେଇଥିଲା ଭାରତ । ଲିଗ ପର୍ଯ୍ୟାୟର ଶେଷ ମ୍ୟାଚ ଜାପାନ ବିପକ୍ଷରେ ଖେଳିବ ଭାରତ । ଏହି ମୁକାବିଲା ଜିତି ଲିଗ ପର୍ଯ୍ୟାୟରେ ଅପରାଜେୟ ରହିବାକୁ ଲକ୍ଷ୍ୟ ରଖିଛି ଦଳ ।
