ଭୁବନେଶ୍ୱର, ୦୭/୦୮: ଅକ୍ଟୋବର ୧୧ରୁ ୧୫ ତାରିଖ ପର୍ଯ୍ୟନ୍ତ କଳିଙ୍ଗ ଷ୍ଟାଡିୟମରେ ଆୟୋଜିତ ହେବ ୨୮ତମ ଆଇଟିଟିଏଫ୍-ଏଟିଟିୟୁ ଏସିଆନ ଟେବୁଲ ଟେନିସ ଟିମ୍ ଚାମ୍ପିଅନସିପ୍ । ଟେବୁଲ ଟେନିସ ଫେଡେରେସନ୍ ଅଫ୍ ଇଣ୍ଡିଆ (ଟିଟିଏଫ୍ଆଇ) ପକ୍ଷରୁ ଏ ବିଷୟରେ ଘୋଷଣା ହୋଇଛି ।
ରାଜ୍ୟ କ୍ରୀଡ଼ା ଓ ଯୁବସେବା ବିଭାଗର ପୂର୍ଣ୍ଣ ସହଯୋଗ ଏବଂ ଟିଟିଏଫ୍ଆଇ ଓ ଓଡ଼ିଶା ସଂଘର ମିଳିତ ଆନୁକୂଲ୍ୟରେ ଏହି ଚାମ୍ପିଅନସିପ୍ ଆୟୋଜିତ ହେବ । ଏସିଆର ପ୍ରମୁଖ ଦେଶର ପୁରୁଷ ଓ ମହିଳା ଦଳ ଏଥିରେ ଅଂଶ ଗ୍ରହଣ କରିବେ ।
୨୦୨୪ରେ କାଜାଖସ୍ତାନରେ ଟୁର୍ଣ୍ଣାମେଣ୍ଟର ୨୭ତମ ସଂସ୍କରଣ ଆୟୋଜିତ ହୋଇଥିଲା । ଅକ୍ଟୋବର ୭ରୁ ୧୩ ତାରିଖ ପର୍ଯ୍ୟନ୍ତ ଆୟୋଜିତ ଏହି ଚାମ୍ପିଅନସିପ୍ରେ ସିଙ୍ଗଲ୍ସ, ଡବଲ୍ସ ଓ ଟିମ୍ ଇଭେଣ୍ଟରେ ପ୍ରତିଯୋଗିତା ହୋଇଥିଲା । କିନ୍ତୁ ଭୁବନେଶ୍ୱରରେ କେବଳ ଦଳଗତ ଇଭେଣ୍ଟର ଆୟୋଜନ କରାଯିବ । ଗତ ସଂସ୍କରଣରେ ଭାରତକୁ ୩ଟି ବ୍ରୋଞ୍ଜ ପଦକ ମିଳିଥିଲା । ପୁରୁଷ ଓ ମହିଳା ଦଳଗତ ଏବଂ ମହିଳା ଡବଲ୍ସରେ ବ୍ରୋଞ୍ଜ ପଦକ ମିଳିଥିଲା ।
ଦ୍ୱିତୀୟ ଥର ପାଇଁ ଓଡ଼ିଶାରେ ଅନ୍ତର୍ଜାତୀୟ ଟେବୁଲ ଟେନିସ ପ୍ରତିଯୋଗିତା ଆୟୋଜିତ ହେଉଛି । ୨୦୧୯ରେ କଟକ ଜବହାରଲାଲ ନେହରୁ ଷ୍ଟାଡିୟମରେ ୨୧ତମ ରାଜ୍ୟଗୋଷ୍ଠୀ ଟେବୁଲ ଟେନିସ ଚାମ୍ପିଅନସିପ୍ ବେଶ ସଫଳତା ସହ ଆୟୋଜିତ ହୋଇଥିଲା । ଫଳରେ ଓଡ଼ିଶାକୁ ପ୍ରଥମ ଥର ଏସିଆନ ଟେବୁଲ ଟେନିସ ଟିମ୍ ଚାମ୍ପିଅନସିପ୍ ଆୟୋଜନର ସୁଯୋଗ ମିଳିଛି ।
ପୂର୍ବରୁ କଳିଙ୍ଗ ଷ୍ଟାଡିୟମରେ ଏସିଆନ ଆଥଲେଟିକ୍ସ ଚାମ୍ପିଅନସିପ୍-୨୦୧୭, ପୁରୁଷ ହକି ବିଶ୍ୱକପ୍ ୨୦୧୮ ଓ ୨୦୨୩, ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପ୍ ଏବଂ ଚଳିତ ବର୍ଷ ଅଗଷ୍ଟ ୧୦ ତାରିଖରେ ବିଶ୍ୱ ଆଥଲେଟିକ୍ସ କଣ୍ଟିନେଣ୍ଟାଲ ଟୁର (ବ୍ରୋଞ୍ଜ) ପ୍ରଭୃତି ପ୍ରତିଯୋଗିତା ବେଶ ସଫଳତାର ସହ ଆୟୋଜିତ ହୋଇଥିଲା ।
