ଲଣ୍ଡନ, ୧୮/୦୪: ଏକ ସୁଦୂର ଗ୍ରହରେ ଜୀବସତ୍ତାର ମିଳିଛି ପ୍ରମାଣ । କେମ୍ବ୍ରିଜ ବିଶ୍ୱବିଦ୍ୟାଳୟର ବୈଜ୍ଞାନିକ ଟିମ୍ ‘କେ୨-୧୮ବି’ ନାମକ ଏକ ଗ୍ରହର ବାୟୁମଣ୍ଡଳକୁ ଅଧ୍ୟୟନ କରୁଛନ୍ତି । ଅଧ୍ୟୟନରୁ ସେମାନେ ଏକ ଅଣୁର ସଙ୍କେତ ଚିହ୍ନଟ କରିଛନ୍ତି, ଯାହା ପୃଥିବୀରେ କେବଳ ସରଳ ଜୀବଙ୍କ ଦ୍ୱାରା ଉତ୍ପନ୍ନ ହୋଇଥାଏ ।
ନାସାର ଜେମ୍ସ ୱେବ୍ ସ୍ପେସ୍ ଟେଲିସ୍କୋପ୍ ଦ୍ୱାରା ଗ୍ରହର ବାୟୁମଣ୍ଡଳରେ ଜୀବନ ସହ ଜଡ଼ିତ ରସାୟନ ଚିହ୍ନଟ ହେବାର ଏହା ଦ୍ୱିତୀୟ ତଥା ଅଧିକ ଆଶାଜନକ ଘଟଣା । କିନ୍ତୁ ଏହାର ନିଷ୍କର୍ଷରେ ପହଞ୍ଚିବା ପାଇଁ ଅଧିକ ତଥ୍ୟ ଆବଶ୍ୟକ ବୋଲି ବୈଜ୍ଞାନିକ ଟିମ୍ ଓ ଅନ୍ୟ ନକ୍ଷତ୍ରବିଜ୍ଞାନୀ ଜୋର ଦେଇଛନ୍ତି ।
ଅଧ୍ୟୟନର ମୁଖ୍ୟ ଗବେଷକ ପ୍ରଫେସର ନିକ୍କୁ ମଧୁସୂଦନ କହିଛନ୍ତି, ଆମେ ଖୁବ୍ଶୀଘ୍ର ଏ ନେଇ ଠୋସ୍ ପ୍ରମାଣ ହାସଲ କରିବୁ । ବାହ୍ୟ ଗ୍ରହରେ ଜୀବନ ସମ୍ଭାବନାର ଏହା ଏ ପର୍ଯ୍ୟନ୍ତର ସବୁଠୁ ଠୋସ୍ ପ୍ରମାଣ । ବର୍ଷେ- ଦୁଇ ବର୍ଷ ମଧ୍ୟରେ ଏହି ସଙ୍କେତକୁ ଆମେ ସ୍ପଷ୍ଟ କରିପାରିବୁ।
କେ୨-୧୮ବି ପୃଥିବୀ ଆକାରଠୁ ଅଢ଼େଇ ଗୁଣ ବଡ଼ ଏବଂ ଆମଠୁ ୭୦୦ ଟ୍ରିଲିଅନ୍ ମାଇଲ ବା ୧୨୪ ଆଲୋକ ବର୍ଷ ଦୂରରେ ଅବସ୍ଥିତ । ମନୁଷ୍ୟ ନିଜର ଜୀବନକାଳ ମଧ୍ୟରେ ଏହି ଦୂରତା ଅତିକ୍ରମ କରିବା ସମ୍ଭବ ନୁହେଁ । ଅର୍ଥାତ୍ ଏହି ଗ୍ରହରେ ପହଞ୍ଚିବା ମନୁଷ୍ୟ ପାଇଁ ଅସମ୍ଭବ । ଜେମ୍ସ ୱେବ୍ ସ୍ପେସ୍ ଟେଲିସ୍କୋପ୍ ଏତେ ଶକ୍ତିଶାଳୀ ଯେ କେ୨-୧୮ବି ପରିକ୍ରମା କରୁଥିବା ଏକ ଛୋଟ ଲାଲ୍ ସୂର୍ଯ୍ୟ (ନକ୍ଷତ୍ର) ଜରିଆରେ ଅତିକ୍ରମ କରୁଥିବା ଆଲୋକରୁ ବାୟୁମଣ୍ଡଳର ରାସାୟନିକ ମିଶ୍ରଣକୁ ବିଶ୍ଳେଷଣ କରିପାରେ ।
କେମ୍ବ୍ରିଜ ବୈଜ୍ଞାନିକ ଟିମ୍ ଗ୍ରହର ବାୟୁମଣ୍ଡଳରେ ଜୀବନ ସହ ସଂଶ୍ଳିଷ୍ଟ ଦୁଇଟି ଅଣୁ: ଡାଇମିଥାଇଲ ସଲ୍ଫାଇଡ୍ (ଡିଏମ୍ଏସ୍) ଓ ଡାଇମିଥାଇଲ ଡାଇସଲ୍ଫାଇଡ୍ (ଡିଏମ୍ଡିଏସ୍)ରୁ ଅତିକମ୍ରେ ଗୋଟିଏ ଅଣୁର ରାସାୟନିକ ସଙ୍କେତ ପାଇଛନ୍ତି । ପୃଥିବୀରେ ଏହି ଗ୍ୟାସ୍ ସାମୁଦ୍ରିକ ଫାଇଟୋପ୍ଲାଙ୍କ୍ଟନ୍ ଓ ବ୍ୟାକ୍ଟେରିଆ ଦ୍ୱାରା ଉତ୍ପନ୍ନ ହୁଏ ।
ପ୍ରଫେସର ମଧୁସୂଦନ କହିଛନ୍ତି, ଯେତିକି ଗ୍ୟାସ୍ ଗୋଟିଏ ଅବଲୋକନରେ ଚିହ୍ନଟ ହେଲା, ତାହା ତାଙ୍କୁ ଚକିତ କରିଦେଲା । ଗ୍ରହର ବାୟୁମଣ୍ଡଳରେ ଏହି ଗ୍ୟାସ୍ର ମାତ୍ରା ପୃଥିବୀ ତୁଳନାରେ ହଜାର ହଜାର ଗୁଣ ଅଧିକ । ତେଣୁ ଜୀବନ ସହ ଏହାର ସମ୍ପର୍କ ଯଦି ବାସ୍ତବ, ତେବେ ଏହି ଗ୍ରହ ଜୀବଜଗତରେ ପରିପୂର୍ଣ୍ଣ ହେବ । କେ୨-୧୮ବି ଗ୍ରହରେ ଯଦି ଜୀବନର ପ୍ରମାଣ ସ୍ପଷ୍ଟ ହୁଏ, ତେବେ ଏଥିରୁ ସ୍ପଷ୍ଟ ହେବ ଯେ ଆକାଶଗଙ୍ଗାରେ ଜୀବନ ଖୁବ୍ ସାଧାରଣ କଥା ।
ମଧୁସୂଦନ ଗଣମାଧ୍ୟମକୁ କହିଛନ୍ତି, ବିଜ୍ଞାନରେ ଏହା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ମୁହୂର୍ତ୍ତ । ଯଦି ଏହା ଜୀବଜଗତର ଏକ ଉଦାହରଣ ହୁଏ ଏବଂ ବ୍ରହ୍ମାଣ୍ଡ ଅନନ୍ତ³ ତେବେ ଆହୁରି ଅନେକ ଗ୍ରହରେ ଜୀବନର ସମ୍ଭାବନା ରହିଛି । ଅଧ୍ୟୟନ ଟିମ୍ର ସଦସ୍ୟ କାର୍ଡିଫ୍ ବିଶ୍ୱବିଦ୍ୟାଳୟର ନକ୍ଷତ୍ରବିଜ୍ଞାନ ପ୍ରାଧ୍ୟାପକ ସୁବୀର ସରକାର କହିଛନ୍ତି, କେ୨-୧୮ବି ଗ୍ରହରେ ଏକ ମହାସାଗର ଥାଇପାରେ, ଯାହା ଜୀବନରେ ପରିପୂର୍ଣ୍ଣ ହୋଇପାରେ । ତେବେ ବୈଜ୍ଞାନିକମାନେ ଅଦ୍ୟାବଧି ଏ ନେଇ ସ୍ପଷ୍ଟ ନୁହନ୍ତି । ଏହି ଗ୍ରହ ଉପରେ ନଜର ରଖିବା ସହିତ ଅନ୍ୟ ଗ୍ରହରେ ଜୀବନର ସନ୍ଧାନ ଉପରେ ବୈଜ୍ଞାନିକଙ୍କ କାମ ଜାରି ରହିବ ବୋଲି ସେ କହିଛନ୍ତି ।
ସଦ୍ୟତମ ତଥ୍ୟ କୌଣସି ଏକ ଆବିଷ୍କାରକୁ ଦାବି କରିବା ପାଇଁ ଆବଶ୍ୟକ ମାନକ ପୂରଣ କରୁନାହିଁ । ଏଥିପାଇଁ ବୈଜ୍ଞାନିକଙ୍କୁ ୯୯.୯୯୯୯୯ ପ୍ରତିଶତ ନିଶ୍ଚିତ ହେବାକୁ ପଡ଼ିବ, ଯାହା ସ୍ପଷ୍ଟ କରିବ ଯେ ସେମାନଙ୍କ ଫଳାଫଳ ଠିକ୍ ଏବଂ ଏହା କୌଣସି ସଂଯୋଗ ନୁହେଁ । ବୈଜ୍ଞାନିକ ଭାଷାରେ ଏହାକୁ ‘ଫାଇଭ୍ ସିଗ୍ମା’ ପରିଣାମ କୁହାଯାଏ । କିନ୍ତୁ ସଦ୍ୟତମ ଅଧ୍ୟୟନର ପରିଣାମ ‘ଥ୍ରୀ ସିଗ୍ମା’ ବା ୯୯.୭ ପ୍ରତିଶତ ଠିକ୍ । ଏହା ବହୁତ ଅଧିକ ହୋଇଥିଲେ ହେଁ ବୈଜ୍ଞାନିକ ସମୁଦାୟ ବିଶ୍ୱାସ କରିବା ପାଇଁ ପର୍ଯ୍ୟାପ୍ତ ନୁହେଁ ।
ଏଡିନ୍ବର୍ଗ ବିଶ୍ୱବିଦ୍ୟାଳୟ ଓ ସ୍କଟ୍ଲାଣ୍ଡର ଆଷ୍ଟ୍ରୋନୋମର ରୟାଲ୍ର ପ୍ରଫେସର କ୍ୟାଥରିନ୍ ହେମନ୍ସ କହିଛନ୍ତି, କେମ୍ବ୍ରିଜ ଟିମ୍ ଫାଇଭ୍ ସିଗ୍ମା ପରିଣାମ ହାସଲ କଲେ ମଧ୍ୟ ଗ୍ରହରେ ଜୀବଜଗତ ଅଛି ବୋଲି ତାହା ନିର୍ଣ୍ଣାୟକ ପ୍ରମାଣ ହେବ ନାହିଁ । ଉକ୍ତ ନିଶ୍ଚିତତା ସତ୍ତେ୍ୱ ଗ୍ୟାସ୍ର ଉତ୍ପତ୍ତିକୁ ନେଇ ପ୍ରଶ୍ନବାଚୀ ରହିଛି ବୋଲି ସେ କହିଛନ୍ତି ।
କ୍ୟାଥରିନ୍ ଆହୁରି କହିଛନ୍ତି, ପୃଥିବୀରେ ଏହି ଗ୍ୟାସ୍ ସମୁଦ୍ରରେ ସୂକ୍ଷ୍ମଜୀବଙ୍କ ଦ୍ୱାରା ଉତ୍ପନ୍ନ ହୁଏ । ଉପଯୁକ୍ତ ତଥ୍ୟ ଥାଇ ମଧ୍ୟ ଆମେ ନିଶ୍ଚିତ ଭାବେ କହିପାରିବା ନାହିଁ ଯେ ଏହା କୌଣସି ବାହ୍ୟ ଗ୍ରହରେ ଜୈବିକ ଉତ୍ପତ୍ତିର ତତ୍ତ୍ୱ । କାରଣ ବ୍ରହ୍ମାଣ୍ଡରେ ଅସଂଖ୍ୟ ଅଦ୍ଭୁତ ଘଟଣା ଘଟୁଛି । ତେଣୁ ନୂଆ ଗ୍ରହରେ ଆଉ କ’ଣ ଭୂବୈଜ୍ଞାନିକ ଗତିବିଧି ଘଟୁଛି, ଯାହା ଜୀବନ ସହ ସଂଶ୍ଳିଷ୍ଟ ଉକ୍ତ ଅଣୁକୁ ଉତ୍ପନ୍ନ କରୁଥାଇପାରେ, ସେ ବିଷୟରେ ଆମର ଧାରଣା ନାହିଁ ।
ସନ୍ତାନଙ୍କ ଆର୍ମି ଗଢ଼ିବେ ଏଲନ ମସ୍କ, ଜାପାନୀ ମହିଳାଙ୍କୁ ପଠାଇଲେ ଶୂକ୍ରାଣୁ
