ଯାଜପୁର,୨୩/୧୧: ବିରଜା ହାଟକୁ ନେଇ ରାସ୍ତାରୋକ ବେଳେ ଧର୍ମଶାଳା ବିଧାୟକଙ୍କୁ ଆକ୍ରମଣ ଘଟଣାରେ ଗିରଫ ସଂଖ୍ୟା ୧୪କୁ ବୃଦ୍ଧି ପାଇଛି । ଗୁରୁବାର ୧୦ଜଣଙ୍କୁ ପୁଲିସ ଗିରଫ କରିଥିଲା । ଶୁକ୍ରବାର ଆଉ ୮ଜଣଙ୍କୁ ସଦର ପୁଲିସ ଉଠାଇ ନେଇଥିଲା । ପଚରାଉଚରା ପରେ ୪ଜଣଙ୍କୁ ଗିରଫ ଦର୍ଶା ଯାଇଥିବା ବେଳେ ଅନ୍ୟ ୪ଜଣ ଅଟକ ରହିଛନ୍ତି । ଗିରଫ ଅଭିଯୁକ୍ତମାନେ ହେଲେ ସଦର ଥାନା ଅନ୍ତର୍ଗତ ଶଙ୍ଖନାଳିର ବିରଞ୍ଚି ନାରାୟଣ ଆଚାର୍ଯ୍ୟଙ୍କ ପୁଅ ପ୍ରକାଶ କୁମାର ଆଚାର୍ଯ୍ୟ (୩୪), କୃଷ୍ଣଚନ୍ଦ୍ର ରାଉତଙ୍କ ପୁଅ ସୁଶୀଲ ରାଉତ(୨୮), ଜାହାନପୁରର ଗୟାଧର ଓଝାଙ୍କ ପୁଅ ସୁଦର୍ଶନ ଓଝା(୩୫) ଏବଂ ବାଣପୁର ଗ୍ରାମର ଚୈତନ୍ୟ ନାୟକଙ୍କ ପୁଅ ଅଚ୍ୟୁତାନନ୍ଦ ନାୟକ(୪୪) ।
ଶୁକ୍ରବାର ଡିଆଇଜି ଡ. ସତ୍ୟଜିତ ନାୟକ ଯାଜପୁରରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଏହି ଘଟଣାରେ ୫୦ରୁ ଅଧିକ ଜଣଙ୍କ ନାମରେ ଅଭିଯୋଗ ହୋଇଛି । ଯେଉଁମାନଙ୍କର ସଂପୃକ୍ତି ଥିବାର ପ୍ରମାଣ ମିଳିବ, ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ । ପୁଲିସ ସଂପୂର୍ଣ୍ଣ ନିରପେକ୍ଷ ଭାବେ ତଦନ୍ତ କରୁଥିବା ଡ. ନାୟକ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ସେହିପରି ଯାଜପୁର ସହରରେ ଆଇନ୍ ଶୃଙ୍ଖଳା ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ମୋଟ୍ ୨୮ ପ୍ଲାଟୁନ୍ ପୁଲିସ ଫୋର୍ସ ନିୟୋଜିତ କରାଯାଇଛି ବୋଲି ଡ. ନାୟକ ପ୍ରକାଶ କରିଛନ୍ତି । ବିରଜା ହାଟ ସ୍ଥାନାନ୍ତର ପାଇଁ କାହିଁକି ଯାଜପୁର ସଦର ଥାନା ଅନ୍ତର୍ଗତ ବୁଢ଼ାଘାଟ ନିକଟରେ ରାସ୍ତାରୋକ କରାଯାଇଥିଲା, ସେ ସଂପର୍କରେ ତଦନ୍ତ କରାଯାଉଛି ।
ସେହିପରି ଧର୍ମଶାଳା ବିଧାୟକ ହିମାଂଶୁ ସାହୁ ଖଣି ବିଭାଗର ଉପ ନିର୍ଦ୍ଦେଶକଙ୍କ ସହ ଆଲୋଚନା କରିବାକୁ ଯାଉଥିବା ନେଇ ସୂଚନା ଦେଇଛନ୍ତି । ବିଧାୟକଙ୍କ ଆସିବା ସମୟ ଓ ଅନ୍ୟ ଦିଗ ସଂପର୍କରେ ମଧ୍ୟ ତଦନ୍ତ କରାଯାଉଥିବା ସେ କହିଛନ୍ତି । ଅପରାହ୍ଣରେ ବିରଜା ହାଟ ବ୍ୟବସାୟୀଙ୍କ ମଧ୍ୟରେ ଏକ ବୈଠକ ଅନୁଷ୍ଠିତ ହୋଇଥିଲା । ଆଗାମୀ ଦିନରେ ସେ କ’ଣ ପଦକ୍ଷେପ ନେବେ ସେ ସଂପର୍କରେ ଆଲୋଚନା କରିଥିବା ସୂଚନା ମିଳିଛି ।
