ବେଙ୍ଗାଲୁରୁ,୧୨/୧୨: ବେଙ୍ଗାଲୁରୁରେ ଏଆଇ ଇଞ୍ଜିନିୟର ଅତୁଲ ସୁଭାଷଙ୍କ ଆତ୍ମହତ୍ୟା ମାମଲାରେ ୪ ଜଣଙ୍କ ବିରୋଧରେ ଏଫ୍ଆଇଆର୍ ରୁଜୁ ହୋଇଛି । ଏଫ୍ଆଇଆର୍ରେ ଅତୁଲଙ୍କ ପତ୍ନୀ ନିକିତା ସିଂଘାଣିଆ, ଶାଶୁ ନିଶା ସିଂଘାଣିଆ, ଶାଳକ ଅନୁରାଗ ସିଂଘାଣିଆ ଏବଂ ଦାଦାଶ୍ୱଶୁର ସୁଶୀଲ ସିଂଘାଣିଆଙ୍କ ନାମ ରହିଛି । ମୃତ ଏଆଇ ଇଞ୍ଜିନିୟରଙ୍କ ଭାଇ ବିକାଶ କୁମାର ବେଙ୍ଗାଲୁରୁର ମରାଠାହଲ୍ଲୀ ଥାନାରେ ଅଭିଯୋଗ କରିଥିଲେ । ଏହି ଆଧାରରେ ପୁଲିସ ଭାରତୀୟ ନ୍ୟାୟ ସଂହିତା (ବିଏନ୍ଏସ୍) ଧାରା ୧୦୮ (ଆତ୍ମହତ୍ୟା ପାଇଁ ଉସୁକାଇବା), ଧାରା ୩(୫)ରେ ମାମଲା ରୁଜୁ କରିଛି । ଆତ୍ମହତ୍ୟା ପୂର୍ବରୁ ଅତୁଲ ୧ ଘଣ୍ଟା ୨୦ ମିନିଟ୍ର ଭିଡିଓ ଜାରି କରିଥିଲେ । ଏଥିରେ ସେ ନିଜ ନିର୍ଯାତନାର କାହାଣୀ ବଖାଣିଥିଲେ ।
ପତ୍ନୀ ଓ ତାଙ୍କ ବାପଘର ଲୋକମାନେ ତାଙ୍କୁ କିଭଳି ହଇରାଣ କରୁଥିଲେ, ସେ ନେଇ ଗୋଟି ଗୋଟି କରି କହିଥିଲେ । ଏମିତି କି ଏକ ଏନ୍ଜିଓକୁ ୨୪ ପୃଷ୍ଠାର ଚିଠି ଲେଖି ସବୁ ଘଟଣା ଖୋଲିକରି କହିଥିଲେ ।
