ନୂଆଦିଲ୍ଲୀ ,୧୪/୧୨: ବ୍ରିସବେନର ଗାବା ଗଡରେ ଆରମ୍ଭ ହୋଇଛି ଭାରତ-ଅଷ୍ଟ୍ରେଲିଆ ତୃତୀୟ ଟେଷ୍ଟ ମ୍ୟାଚ । ବର୍ଡର ଗାଭାସ୍କର ଟ୍ରଫି ଟେଷ୍ଟ ସିରିଜରେ ଏହା ତୃତୀୟ ଟେଷ୍ଟ । ପ୍ରଥମେ ଟସ୍ ଜିତି ଫିଲ୍ଡିଂ ନିଷ୍ପତ୍ତି ନେଇଛି ଭାରତ । ଘରୋଇ ଅଷ୍ଟ୍ରେଲିଆକୁ ବ୍ୟାଟିଂ ଆମନ୍ତ୍ରଣ ଦେଇଛି ଟିମ୍ ଇଣ୍ଡିଆ । ରିପୋର୍ଟ ଲେଖାହେବା ସୁଦ୍ଧା ଅଷ୍ଟ୍ରେଲିଆ ୨୮ ରନ କରିଛି । ଏହାପରେ ବର୍ଷା ବାଧକ ସାଜିବାରୁ ଖେଳ ବନ୍ଦ ରହିଛି । ଉସମାନ ଖ୍ବାଜା ୧୯ ରନ ଓ ନାଥନ ମ୍ୟାକସ୍ବିନି ୪ ରନ କରି କ୍ରିଜରେ ରହିଛନ୍ତି ।
ବ୍ରିସବେନର ଗାବା ଗ୍ରାଉଣ୍ଡରେ ତୃତୀୟ ଫାଇଟ ଆରମ୍ଭ ହୋଇଛି । ଭାରତୀୟ ଏକାଦଶରେ ପରିବର୍ତ୍ତନ ହୋଇଛି । ଆର ଅଶ୍ବିନୀ ଓ ହର୍ଷିତ ରାଣା ତୃତୀୟ ଟେଷ୍ଟ ଖେଳୁନାହାନ୍ତି । ଆକାଶ ଦୀପ ତୃତୀୟ ଟେଷ୍ଟ ଖେଳିବା ଆକଳନ କରଯାଉଥିଲା । ତାହା ହିଁ ହେଲା । ଭାରତୀୟ ଚୂଡାନ୍ତ ଏକାଦଶରେ ଆକାଶ ଦୀପ ସ୍ଥାନ ପାଇଛନ୍ତି । ବର୍ଡର ଗାଭାସ୍କର ଟ୍ରଫି ଟେଷ୍ଟ ସିରିଜରେ ଦୁଇଟି ଟେଷ୍ଟ ଖେଳା ସରିଛି । ଉଭୟ ଦଳ ଗୋଟିଏ ଲେଖାଏଁ ମ୍ୟାଚ ଜିତିଛନ୍ତି । ବର୍ତ୍ତମାନ ୧-୧ ସ୍ଥିତିରେ ରହିଛି ସିରିଜ । ଭାରତ ପର୍ଥ ଟେଷ୍ଟ ଜିତିଥିବା ବେଳେ ଅଷ୍ଟ୍ରେଲିଆ ଆ଼ଡିଲେଡ ଟେଷ୍ଟ ଜିତିଥିଲା । ଉଭୟ ଦଳ ଗୋଟିଏ ଲେଖାଏଁ ମ୍ୟାଚ ଜିତିଥିବାରୁ ତୃତୀୟ ଟେଷ୍ଟ ଫଳାଫଳ ସିରିଜ ପାଇଁ ନିର୍ଣ୍ଣାୟକ ହେବ ବୋଲି ଆକଳନ କରାଯାଉଛି । ଗାବା ଟେଷ୍ଟ ଜିତି ଭାରତ ସିରିଜରେ ଆଗୁଆ ରହିବ ବୋଲି ଆଶା ରଖିଛନ୍ତି ଫ୍ୟାନ୍ସ । ଗାବା ଗଡରେ ବ୍ୟାଟରଙ୍କ ପାଇଁ ଅଗ୍ନିପରୀକ୍ଷା ହେବ । ଆଡିଲେଡରେ ପରାଜୟ ପରେ ଭାରତ ଗାବାରେ କମବ୍ୟାକ କରିବ ବୋଲି ଫ୍ୟାନ୍ସ ଆଶାବାଦୀ ଅଛନ୍ତି ।
ଭାରତୀୟ ଚୂଡାନ୍ତ ଏକାଦଶ- ଯଶସ୍ବୀ ଜୈସ୍ବାଲ, କେଏଲ ରାହୁଲ, ଶୁଭମନ ଗିଲ୍, ବିରାଟ କୋହଲି, ଋଷବ ପନ୍ତ,(ୱିକେଟ କିପର), ରୋହିତ ଶର୍ମା(ଅଧିନାୟକ), ନିତୀଶ ରେଡ୍ଡୀ, ରବୀନ୍ଦ୍ର ଜାଡେଜା, ଆକାଶ ଦୀପ, ଯଶପ୍ରୀତ ବୁମରା, ମହମ୍ମଦ ସିରାଜ ।
ଅଷ୍ଟ୍ରେଲିଆ ଚୂଡାନ୍ତ ଏକାଦଶ- ଉସମାନ ଖ୍ବାଜା, ନାଥନ ମ୍ୟାକସ୍ବିନି, ମାର୍ନସ ଲାବୁସାନ, ଷ୍ଟିଭେନ ସ୍ମିଥ, ଟ୍ରେଭିସ ହେଡ୍, ମିଚେଲ ମାର୍ଶ, ଆଲେକ୍ସ କ୍ୟାରୀ, ପ୍ୟାଟ କମିନ୍ସ(ଅଧିନାୟକ), ମିଚେଲ ଷ୍ଟାର୍କ, ନାଥାନ ଲାୟନ, ଜୋଶ ହାଜେଲଉଡ ।
