ବୋରିଗୁମ୍ମା,୧୧/୧୨: ରଣସପୁର ଗ୍ରାମର ପର୍ଶୁରାମ ନାୟକଙ୍କ ଧାନଖଳାରୁ ଏକ ବଜ୍ରକାପ୍ତା ଉଦ୍ଧାର କରାଯାଇଛି । ବଜ୍ରକାପ୍ତାଟିର ସ୍ୱାସ୍ଥ୍ୟ ପରୀକ୍ଷା ପରେ ଜଙ୍ଗଲରେ ଛଡ଼ାଯିବ ବୋଲି ବନ ବିଭାଗ ତରଫରୁ ସୂଚନା ମିଳିଛି । ଖାଦ୍ୟ ଅନ୍ୱେଷଣରେ ବଜ୍ରକାପ୍ତାଟି ଗାଁକୁ ଚାଲି ଆସିଥିବା ଅନୁମାନ କରାଯାଉଛି । କୋରାପୁଟ ଜିଲ୍ଲା ବୋରିଗୁମ୍ମା ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ମଙ୍ଗଳବାର ସନ୍ଧ୍ୟା ସମୟରେ ପର୍ଶୁରାମ ଧାନ ଅମଳ କରୁଥିଲେ । ଏହି ସମୟରେ ଧାନ ଗଦା ଭିତରେ ଏକ ବଜ୍ରକାପ୍ତା ଦେଖିବାକୁ ପାଇଥିଲେ । ଏହା ଦେଖି ସଙ୍ଗେ ସଙ୍ଗେ ବଜ୍ରକାପ୍ତାକୁ ଉଦ୍ଧାର କରି ବନବିଭାଗକୁ ଖବର ଦେଇଥିଲେ । ଖବର ପାଇ ବନ ବିଭାଗର କର୍ମଚାରୀ ରଣସପୁର ଗାଁରେ ପହଞ୍ଚିଥିଲେ । ସେଠାରେ ପହଞ୍ଚି ବଜ୍ରକାପ୍ତାକୁ ଉଦ୍ଧାର କରି ବୋରିଗୁମ୍ମା ବନ କାର୍ଯ୍ୟାଳୟକୁ ଆଣିଛନ୍ତି । ବଜ୍ରକାପ୍ତାଟିର ସ୍ବାସ୍ଥ୍ୟ ପରୀକ୍ଷା ପରେ ଜଙ୍ଗଲରେ ଛଡ଼ାଯିବ। ତେବେ ଖାଦ୍ୟ ଅନ୍ୱେଷଣରେ ବଜ୍ରକାପ୍ତାଟି ଗାଁ ଭିତରକୁ ଚାଲି ଆସିଥିବା ଅନୁମାନ କରାଯାଉଛି।
