କୁଜଙ୍ଗ,୭/୬ : ଜଗତସିଂହପୁର ଜିଲ୍ଲା ତିର୍ତୋଲ ଥାନା ଇଭିରିସିଂ ଅଞ୍ଚଳରେ ଆଜି ଏକ ଅଭାବନୀୟ ଘଟଣା ଘଟିଛି । କିଛି ଲୋକ ଗୋମାତାମାନଙ୍କୁ ନିର୍ମମ ଭାବେ ହତ୍ୟା କରି ଗୋ ମାଂସ ପ୍ରସ୍ତୁତ କରୁଥିଲେ । ତେବେ ଏହି ଖବର ଏରସମା ଓ କୁଜଙ୍ଗ ପ୍ରଖଣ୍ଡ ବଜରଙ୍ଗ ଦଳର କାର୍ଯ୍ୟକର୍ତ୍ତା ପାଇବା ପରେ ଘଟଣାସ୍ଥଳରେ ପହଞ୍ଚି ବିରୋଧ ପ୍ରଦର୍ଶନ କରିବାରୁ ସେମାନେ ଧମକ ଚମକ୍ ଦେବା ସହ ସେଠାରୁ ପଳାଇ ଯାଇଥିଲେ ।
ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳର ମୁଖ୍ୟ ରାସ୍ତା ଅବରୋଧ କରାଯିବା ସହ ଉତ୍ତେଜନା ପରିସ୍ଥିତି ଉପୁଜିଥିବା ଦେଖିବାକୁ ମିଳିଥିଲା। ପରେ ସ୍ଥାନୀୟ ପୋଲିସ ଖବରପାଇ ସେଠାରେ ପହଞ୍ଚି ବଜରଙ୍ଗ ଦଳର କାର୍ଯ୍ୟକର୍ତ୍ତାଙ୍କ ସହ ଆଲୋଚନା କରିବା ସହ ୩ଜଣ ଲୋକଙ୍କୁ ପୋଲିସ ଉଠାଇ ନେବା ପରେ ରାସ୍ତା ଅବରୋଧ ପ୍ରତ୍ୟାହୃତ ହୋଇଥିଲା । ଏ ସମ୍ପର୍କରେ ତିର୍ତୋଲ ଥାନାରେ ବଜରଙ୍ଗ ଦଳର କାର୍ଯ୍ୟକର୍ତ୍ତା ସିଦ୍ଧାନ୍ତ ମଲ୍ଲିକ ଲିଖିତ ଅଭିଯୋଗ କରିଛନ୍ତି । ଶ୍ରୀ ମଲ୍ଲିକ ଅଭିଯୋଗ ଆଣିଛନ୍ତି ଯେ, ଆଜି ଅପରାହ୍ନ ସମୟରେ ଇଭିରିସିଂ ଗ୍ରାମର ଏକ ପଡ଼ିଆରେ ସହ ସାଥୀମାନଙ୍କ ସହ କ୍ରିକେଟ ଖେଳୁଥିଲେ। ହଠାତ୍ ପଡ଼ିଆ ପାର୍ଶ୍ବରେ କିଛି ଶବ୍ଦ ଶୁଣି ବାକୁ ମିଳିଥିଲା ।
ଫଳରେ ଶ୍ରୀ ମଲ୍ଲିକ ସେଠାକୁ ଯାଇ ଦେଖିବାବେଳକୁ କିଛି ଲୋକ ଗୋମାଂସ କାଟୁ ଥିଲେ। ଏହା ଦେଖିବା ପରେ ସେ ଭିଡ଼ିଓ ଉତ୍ତୋଳନ କରିବା ସହ ସାଥୀମାନଙ୍କୁ ସୂଚନା ଦେଇଥିଲେ । ସେଠାରେ ସାଥୀମାନେ ପହଞ୍ଚିବା ମାତ୍ରେ ସେମାନେ କାଟୁଥିବା ଗୋ ମାଂସ ନେଇ ଚମ୍ପଟ ମାରିଥିଲେ । ପରେ କିଛି ଯୁବକ ପହଞ୍ଚି ଶ୍ରୀ ମଲ୍ଲିକଙ୍କ ସମେତ ବଜରଙ୍ଗ ଦଳର କାର୍ଯ୍ୟକର୍ତ୍ତାମାନଙ୍କୁ ଧମକ ଚମକ୍ ଦେଇଥିଲେ । ଏହାକୁ କେନ୍ଦ୍ର କରି ସ୍ଥାନୀୟ ଅଞ୍ଚଳରେ ଉତ୍ତେଜନା ପରିସ୍ଥିତି ଉପୁଜିଥିବାବେଳେ ସ୍ଵେଚ୍ଛାସେବୀ ଯୁବକମାନେ ମୁଖ୍ୟ ରାସ୍ତାକୁ ଅବରୋଧ କରିଥିଲେ । ଖବରପାଇ ତିର୍ତୋଲ ଥାନା ପୋଲିସ ଘଟଣାସ୍ଥଳରେ ପହଞ୍ଚି ଆନ୍ଦୋଳନକାରୀଙ୍କୁ ବୁଝାସୁଝା କରିବା ସହ ଗୋମାଂସର କିଛି ଅଂଶ ଜବତ କରିବା ସହ ଏହି ବେଆଇନ କାରବାର ସନ୍ଦେହରେ ୩ଜଣଙ୍କୁ ଉଠାଇ ନେବା ପରେ ରାସ୍ତା ଅବରୋଧ ପ୍ରତ୍ୟାହୃତ ହୋଇଥିଲା ।
