ପୁରୀ/ବଳଙ୍ଗା,୧୮/୦୮: ସାଙ୍ଗ ଘରୁ ବହି ଧରି ନିଜ ଘରକୁ ଯାଉଥିଲି । ବାଇକରେ କିଛି ଜଣ ଆସିଲେ । ସେମାନେ ମୁହଁରେ ରୁମାଲ ବାନ୍ଧିଥିଲେ ଓ ମୋ ମୁହଁରେ ମଧ୍ୟ ରୁମାଲ ପକେଇ ବଡ଼ବନ୍ଧ ନିକଟ ଜଙ୍ଗଲକୁ ଉଠେଇ ନେଲେ । ଦେହରେ କିରାସିନି ଢାଳି ନିଆଁ ଲଗେଇ ପଳେଇଲେ । ହୋସ ଆସିବାରୁ.. ଏତିକିରେ ଭିଡିଓଟି ଶେଷ ହୋଇଯାଉଛି । ୧ ମିନିଟ ୩୦ ସେକେଣ୍ଡର ଭିଡିଓକୁ ନେଇ ପୁଣି ଚର୍ଚ୍ଚାକୁ ଫେରିଲା ବଳଙ୍ଗା ନାବାଳିକା ପୋଡ଼ି ମୃତ୍ୟୁ ଘଟଣା । ବଳଙ୍ଗା ପୀଡ଼ିତା ଡାକ୍ତରଖାନାରେ ଚିକିତ୍ସିତ ଥିବା ସମୟରେ ପୁଲିସ କରିଥିବା ବୟାନ ରେକର୍ଡ ସମୟର ଭିଡିଓ ସୋସିଆଲ ମିଡିଆରେ ଭାଇରାଲ୍ ହୋଇଛି । ଏହି ଘଟଣାକୁ ଆଉ ମାତ୍ର ୨ ଦିନ ପରେ ମାସେ ପୂରିବାକୁ ଯାଉଛି। ପୁଲିସ ଘଟଣାର ତଦନ୍ତ ଶେଷରେ କ’ଣ ପାଇଲା ଏପର୍ଯ୍ୟନ୍ତ କହିନି । ତେବେ ଆଇସିୟୁରେ ଚିକିତ୍ସାଧୀନ ଥିବା ବେଳର ପୀଡ଼ିତାଙ୍କ ବୟାନ ସୋସିଆଲ ମିଡିଆରେ ଦ୍ରୁତ ଗତିରେ ଭାଇରାଲ ହେଉଛି । କିଏ ଓ କେଉଁ ଉଦ୍ଦେଶ୍ୟରେ ଏହା ଭାଇରଲ କରିଛି ଜଣାପଡିନି । ତେବେ ଭିଡିଓଟି ଡାକ୍ତରଖାନା ଭିତରେ ରେକର୍ଡିଂ ହୋଇଛି ।
ଉକ୍ତ ଭିଡିଓଟି ତଦନ୍ତ ସମୟର ବୋଲି ଜଣାପଡୁଛି । ଭୁବନେଶ୍ୱର କିମ୍ବା ଦିଲ୍ଲୀ ଏମ୍ସରେ ପୀଡ଼ିତା ଚିକିତ୍ସିତ ହେଉଥିବା ସମୟରେ ଏହି ଭିଡିଓ ରେକର୍ଡିଂ ହୋଇଛି । ଏଥିରେ ଜଣେ ମହିଳା ଅଧିକାରୀ ପୀଡ଼ିତାଙ୍କଠାରୁ ବୟାନ ରେକର୍ଡ କରୁଛନ୍ତି । ସେ ପୀଡ଼ିତାଙ୍କୁ ବିଭିନ୍ନ ପ୍ରଶ୍ନ କରୁଛନ୍ତି । ଘଟଣା ଘଟିବା ସମୟରେ ପୀଡ଼ିତା କେଉଁଠି ଥିଲେ ପ୍ରଶ୍ନରେ ପୀଡ଼ିତା କହୁଛନ୍ତି, ସେ ସାଙ୍ଗ ଘରୁ ବହି ଧରି ନିଜ ଘରକୁ ଯାଉଥିଲେ । ବାଇକରେ କିଛି ଜଣ ଆସି ତାଙ୍କ ପାଖେ ପହଞ୍ଚିଲେ । ସେମାନେ ମୁହଁରେ ରୁମାଲ ବାନ୍ଧିଥିଲେ ଓ ପୀଡ଼ିତାଙ୍କ ମୁହଁରେ ମଧ୍ୟ ରୁମାଲ ପକେଇ ବଡ଼ବନ୍ଧ ନିକଟ ଜଙ୍ଗଲକୁ ଉଠେଇ ନେଲେ । ତାଙ୍କ ଦେହରେ କିରାସିନି ଢାଳି ନିଆଁ ଲଗେଇ ପଳେଇଲେ । ହୋସ ଆସିବାରୁ.. ଏତିକିରେ ଭିଡିଓଟି ଶେଷ ହୋଇଯାଉଛି । ୧ ମିନିଟ ୩୦ ସେକେଣ୍ଡର ଏହି ଭିଡିଓ ସୋସିଆଲ ମିଡିଆରେ ଘୁରି ବୁଲୁଛି । ତେବେ ସୂତ୍ର ଅନୁସାରେ ଏହି ଭିଡିଓ ଭୁବନେଶ୍ୱର ଏମ୍ସରେ କ୍ରାଇମବ୍ରାଞ୍ଚ ତଦନ୍ତ ସମୟର । ପୀଡ଼ିତାଙ୍କୁ ମହିଳା ଅଧିକାରୀ ହିନ୍ଦୀରେ ପ୍ରଶ୍ନ କରୁଥିଲା ବେଳେ ପୀଡ଼ିତା ମଧ୍ୟ ହିନ୍ଦୀରେ ଉତ୍ତର ଦେଉଛନ୍ତି । ଭିଡିଓ ସମ୍ପର୍କରେ ଏସ୍ପି ପିନାକ ମିଶ୍ର କହିଛନ୍ତି, ଏହାକୁ କିଏ ଭାଇରାଲ୍ କଲା ଓ ଏହା ସତ୍ୟକି ନୁହେଁ ଜଣାନାହିଁ । ତେବେ ଏହା ଫେକ୍ ଭଳି ଲାଗୁଛି । ପୀଡ଼ିତା ବୟାନ ଦେବା ବେଳେ ବାରମ୍ବାର ମତ ବଦଳାଉ ଥିଲେ । ତେବେ ଘଟଣାର ନିଷ୍କର୍ସ ୨୦ ତାରିଖ ସୁଦ୍ଧା ଜଣାଇ ଦିଆଯିବ ବୋଲି ଏସ୍ପି କହିଛନ୍ତି।
