ଇସଲାମାବାଦ: ବଲୁଚ ଲିବରେସନ ଆର୍ମୀ (ବିଏଲଏ) ପାକିସ୍ତାନର ବାଲୋଚିସ୍ତାନ ପ୍ରଦେଶର ସୁରାବ ସହରରେ ପୂର୍ଣ୍ଣ ନିୟନ୍ତ୍ରଣ ହାସଲ କରିଥିବା ନେଇ ଦାବି କରିଛି। ଏହି ସଂଗଠନ ଏକ ସମନ୍ୱିତ ସଶସ୍ତ୍ର ଅପରେସନ ଜରିଆରେ ସହରର ପ୍ରମୁଖ ସରକାରୀ ଅନୁଷ୍ଠାନଗୁଡ଼ିକୁ ଟାର୍ଗେଟ କରିଥିବା ଘୋଷଣା କରିଛି। ବିଏଲଏ ଏକ ବିବୃତ୍ତି ଜାରି କରି କହିଛି ଯେ, ତାଙ୍କ ସେନା ବ୍ୟାଙ୍କ, ଲେଭିସ୍ ଷ୍ଟେସନ ଏବଂ ପୋଲିସ ଷ୍ଟେସନ ସମେତ ଗୁରୁତ୍ୱପୂର୍ଣ୍ଣ ଅନୁଷ୍ଠାନଗୁଡ଼ିକୁ ନିଜ ଅକ୍ତିଆରକୁ ଆଣିଛନ୍ତି।
ଏହି ସଂଗଠନ ଆହୁରି ମଧ୍ୟ କହିଛି ଯେ, ସେମାନେ କ୍ୱେଟା-କରାଚୀ ଏବଂ ସୁରାବ-ଗ୍ୱାଦର ହାଇୱେରେ ଚେକପଏଣ୍ଟ ସ୍ଥାପନ କରି ସରକାରୀ ଗତିବିଧି ଉପରେ ନିଜ ନିୟନ୍ତ୍ରଣ ଆଣିଛନ୍ତି। ସୁରାବ, ଯାହା ବାଲୋଚିସ୍ତାନର କାଲାଟ ଡିଭିଜନରେ ଅବସ୍ଥିତ, ଏକ ରଣନୈତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ସହର ଅଟେ। କାରଣ ଏହା ପ୍ରାଦେଶିକ ରାଜଧାନୀ କ୍ୱେଟାଠାରୁ ମାତ୍ର ୧୫୦ କିଲୋମିଟର ଦୂରରେ ଅବସ୍ଥିତ। ୨୦୨୩ ମସିହାର ଆକଳନ ଅନୁଯାୟୀ, ଏହି ସହରର ଜନସଂଖ୍ୟା ୩୫,୦୦୦ ରୁ ୪୫,୦୦୦ ମଧ୍ୟରେ ରହିଛି।
ଏହି ଘଟଣା ପାକିସ୍ତାନ ସେନା ମୁଖ୍ୟ ଫିଲ୍ଡ ମାର୍ଶାଲ ଆସିମ ମୁନୀରଙ୍କ କ୍ୱେଟା ଗସ୍ତ ସମୟରେ ଘଟିଥିବା ବେଳେ ଏହା ପାକିସ୍ତାନ ସେନା ପାଇଁ ଏକ ବଡ଼ ଅପମାନ ଭାବେ ଦେଖାଯାଉଛି। ସୁରାବର ଆସିଷ୍ଟାଣ୍ଟ କମିସନର ଏହି କାର୍ଯ୍ୟାନୁଷ୍ଠାନରେ ନିହତ ହୋଇଥିବ ସୂଚନା ରହିଛି।
ବଲୋଚ ଲିବରେସନ ଆର୍ମୀକୁ ପାକିସ୍ତାନ ଏବଂ ଆମେରିକା ସମେତ ଅନେକ ପାଶ୍ଚାତ୍ୟ ଦେଶ ଆତଙ୍କବାଦୀ ସଂଗଠନ ଭାବେ ଘୋଷଣା କରିଛନ୍ତି। ଏହି ଦଳ ଦଶନ୍ଧି ଦଶନ୍ଧି ଧରି ବଲୋଚିସ୍ତାନରେ ସ୍ୱାଧୀନତା ପାଇଁ ନିଜ ଲଢେଇ ଜାରି ରଖିଛି। ସେମାନେ ପାକିସ୍ତାନୀ ଶାସନ ଏବଂ ଚୀନର ଉପସ୍ଥିତିକୁ ଆରମ୍ଭରୁ ବିରୋଧ କରି ଆସୁଛନ୍ତି। ବିଶେଷକରି ଚାଇନା-ପାକିସ୍ତାନ ଇକୋନୋମିକ କରିଡର (ସିପିଇସି) ସହ ଜଡ଼ିତ ପ୍ରକଳ୍ପଗୁଡ଼ିକୁ ବଲୋଚ ସେନା ଜୋରଦାର ବିରୋଧ କରୁଛି।
ଏହି ଘଟଣା ବଲୋଚିସ୍ତାନରେ ଚାଲିଥିବା ଦୀର୍ଘଦିନୀଆ ବିଦ୍ରୋହର ଏକ ଅଂଶ ଭାବେ ଦେଖାଯାଉଛି। ଯେଉଁଠାରେ ବିଏଲଏ ପୂର୍ବରୁ ରେଳ ଅପହରଣ ଏବଂ ଆତ୍ମଘାତୀ ଆକ୍ରମଣ ସମେତ ଅନେକ ହିଂସାତ୍ମକ କାର୍ଯ୍ୟ ଜାରି ରଖିଛି। ପାକିସ୍ତାନୀ ଅଧିକାରୀମାନେ ଏହି ଘଟଣାରେ ଭାରତର ସମ୍ପୃକ୍ତି ଥିବା ଅଭିଯୋଗ କରିଛନ୍ତି, ତେବେ ଏହି ଭିତ୍ତିହିନ ଦାବିକୁ ଭାରତ ସମ୍ପୂର୍ଣ୍ଣ ରୂପେ ଖଣ୍ଡନ କରିଛି। ଭାରତୀୟ ବୈଦେଶିକ ମନ୍ତ୍ରଣାଳୟ କହିଛି ଯେ, ପାକିସ୍ତାନ ନିଜର ଅଭ୍ୟନ୍ତରୀଣ ବିଫଳତାକୁ ଲୁଚାଇବା ପାଇଁ ଭାରତକୁ ଦାୟୀ କରୁଛି।
ଏହି ଘଟଣା ବଲୋଚିସ୍ତାନରେ ଚାଲିଥିବା ଅଶାନ୍ତିକୁ ଆହୁରି ତୀବ୍ର କରିଛି। ଯେଉଁଠାରେ ମାନବାଧିକାର ଉଲ୍ଲଂଘନ ଏବଂ ସୁରକ୍ଷା ବାହିନୀ ବିରୁଦ୍ଧରେ ଅଭିଯୋଗ ସାମ୍ନାକୁ ଆସୁଛି। ବିଏଲଏର ଏହି ପଦକ୍ଷେପ ଅଞ୍ଚଳରେ ଅସ୍ଥିରତା ଏବଂ ଜଟିଳ ଭୂ-ରାଜନୈତିକ ପରିସ୍ଥିତିକୁ ଆହୁରି ଜଟିଳ କରିବ ବୋଲି ଅନୁମାନ କରାଯାଉଛି।
