ନୂଆଦିଲ୍ଲୀ,୨୬।୪: ପହଲଗାମ୍ ଆତଙ୍କୀ ହମଲା ପରେ ପୁରା ଦେଶରେ ପାକିସ୍ତାନ ବିରୋଧରେ ଆକ୍ରୋଶ ବଢିବାରେ ଲାଗିଛି। ଆଉ ଏହି ସମୟରେ ବିଜେପି ସାଂସଦ ନିଶିକାନ୍ତ ଦୁବେ ବାଂଲାଦେଶକୁ ମଧ୍ୟ ଟାର୍ଗେଟ କରିଛନ୍ତି। ସେ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଲେଖିଛନ୍ତି ବାଂଲାଦେଶ ମଧ୍ୟ ଖୁବ୍ ଛଟପଟ ହେଉଛି। ତାଙ୍କୁ ବି ଗଙ୍ଗା ନଦୀର ପାଣି ବନ୍ଦ କରି ଦେବାର ସମୟ ଆସିଯାଇଛି। ଆମ ଦେଶର ପାଣି ପିଇକି ବଞ୍ଚିବେ, ହେଲେ ପାକିସ୍ତାନର ଗୀତ ଗାଇବେ।’
ଏହା ସହ ଦୁବେ ଇଂରାଜୀ ଓ୍ବେବସାଇଟର ଏକ ନ୍ୟୁଜର ସ୍କ୍ରିନସଟ୍ ମଧ୍ୟ ସେୟାର କରିଛନ୍ତି। ଯେଉଁଥିରେ ଲେଖା ହୋଇଛି ‘ଗଙ୍ଗାଜଳ ଏହି ପାପୀଙ୍କୁ ? ନିଶିକାନ୍ତ ଦୁବେ ଯେଉଁ ରିପୋର୍ଟର ସ୍କ୍ରିନସଟ୍ ସେୟାର କରିଛନ୍ତି, ତାହା ଅନୁସାରେ, ବାଂଲାଦେଶ ଅନ୍ତରୀଣ ସରକାରଙ୍କ ଜଣେ ପରାମର୍ଶଦାତା ନିକଟରେ ଆତଙ୍କୀ ସଂଗଠନ ଲସ୍କର-ଇ-ତୋଇବାର ସଦସ୍ୟକୁ ଭେଟିଥିଲେ।
ରିପୋର୍ଟ ଅନୁସାରେ, ବାଂଲାଦେଶର ଅନ୍ତରୀଣ ସରକାରଙ୍କ ଆଇନ ପରାମର୍ଶଦାତା ଡକ୍ଟର ଆସିଫ ନଜରୁଲାଙ୍କ ଲସ୍କର ସହ ସମ୍ପର୍କ ରହିଛି। ପହଲଗାମ୍ ଆତଙ୍କୀ ହମଲାର ଦିନକ ପରେ ଢାକାରେ ଲସ୍କର ସିନିର ଅପରେଟିଭ ଇଜହାରକୁ ସେ ସାକ୍ଷାତ କରିଥିଲେ। ଏହାଦ୍ବାରା ଭାରତ ବିରୋଧରେ ଆତଙ୍କବାଦକୁ ପ୍ରୋତ୍ସାହନ ଦେବା ପାଇଁ ଢାକାର ବର୍ତ୍ତମାନର ସରକାରଙ୍କ ଭୂମିକାକୁ ନେଇ ସନ୍ଦେହ ସୃଷ୍ଟି କରୁଛି। ନିକଟରେ ମୋଦି ସରକାର ପାକିସ୍ତାନ ସହ ୧୯୬୦ ସିନ୍ଧୁ ଚୁକ୍ତିକୁ ରଦ୍ଦ କରିବାର ଘୋଷଣା କରିଥିଲେ। ଏହାକୁ ନେଇ ଦୁବେ ଖୁବ୍ ପ୍ରଶଂସା କରିଛନ୍ତି। ସେ କହିଛନ୍ତି, ଏବେ ପାକିସ୍ତାନ ବିନା ପାଣିରେ ମରିବ।
