ଢାକା: ବାଂଲାଦେଶର ଅନ୍ତରୀଣ ସରକାର ଭାରତ ସହିତ ସୀମାନ୍ତରେ ଥିବା ତିନୋଟି ସ୍ଥଳବନ୍ଦରକୁ ସମ୍ପୂର୍ଣ୍ଣ ବନ୍ଦ କରିବା ଏବଂ ଅନ୍ୟ ଏକ ବନ୍ଦରରେ କାର୍ଯ୍ୟକଳାପକୁ ସ୍ଥଗିତ ରଖିବା ପାଇଁ ନିଷ୍ପତ୍ତି ନେଇଛନ୍ତି। ଏହି ନିଷ୍ପତ୍ତି ବାଂଲାଦେଶର ଅନ୍ତରୀଣ ସରକାରର ମୁଖ୍ୟ ଉପଦେଷ୍ଟା ମହମ୍ମଦ ଯୁନୁସଙ୍କ ଅଧ୍ୟକ୍ଷତାରେ ଅନୁଷ୍ଠିତ ପରାମର୍ଶଦାତା ପରିଷଦର ଏକ ବୈଠକରେ ନିଆଯାଇଛି। ବନ୍ଦ ହେଉଥିବା ବନ୍ଦରଗୁଡ଼ିକ ହେଉଛି ନିଲଫାମାରୀର ଚିଲାହାଟି, ଚୁଆଡାଙ୍ଗାର ଦୌଲତଗଞ୍ଜ ଏବଂ ରାଙ୍ଗାମାଟିର ତେଗାମୁଖ ସ୍ଥଳବନ୍ଦର। ଏହା ସହିତ ହବିଗଞ୍ଜର ବଲ୍ଲା ସ୍ଥଳବନ୍ଦରରେ କାର୍ଯ୍ୟକୁ ଅନିର୍ଦ୍ଧିଷ୍ଟ କାଳ ଯାଏ ସ୍ଥଗିତ ରଖାଯାଇଛି।
ମୁଖ୍ୟ ଉପଦେଷ୍ଟାଙ୍କ ପ୍ରେସ ସେକ୍ରେଟାରୀ ସଫିକୁଲ ଆଲମ ଢାକାର ଫରେନ ସର୍ଭିସ ଏକାଡେମୀରେ ଏକ ସାମ୍ବାଦିକ ସମ୍ମିଳନୀରେ ଏହି ଘୋଷଣା କରିଛନ୍ତି। ସେ କହିଛନ୍ତି ଯେ ଏହି ବନ୍ଦରଗୁଡ଼ିକ ଦୀର୍ଘ ସମୟ ଧରି ନିଷ୍କ୍ରିୟ ରହିଥିଲା ଏବଂ ଏଗୁଡ଼ିକରେ କୌଣସି ବାଣିଜ୍ୟିକ କାର୍ଯ୍ୟ ହେଉନଥିଲା। ଏହା ସତ୍ତ୍ୱେ ଏହି ବନ୍ଦରଗୁଡ଼ିକରେ ଅଧିକାରୀ ନିଯୁକ୍ତି ଏବଂ ରକ୍ଷଣାବେକ୍ଷଣ ପାଇଁ ଅନାବଶ୍ୟକ ଖର୍ଚ୍ଚ ହେଉଥିଲା, ଯାହା ସରକାରୀ ସମ୍ପଦ ଉପରେ ଆର୍ଥିକ ଚାପ ସୃଷ୍ଟି କରୁଥିଲା।
ଆପଣଙ୍କୁ ଜଣାଇରଖୁ ଯେ, ଏହି ନିଷ୍ପତ୍ତି ଭାରତର ସ୍ଥଳମାର୍ଗ ଦେଇ ବାଂଲାଦେଶକୁ ରପ୍ତାନୀ ଉପରେ ଲଗାଯାଇଥିବା ପ୍ରତିବନ୍ଧକ ପରେ ସାମ୍ନାକୁ ଆସିଛି। ବାଂଲାଦେଶର ଭାରତ ବିରୋଧି କାର୍ଯ୍ୟ ବୃଦ୍ଧି ହେବା ପରେ ସରକାର ବାଂଲାଦେଶ ସହ ସ୍ଥଳବନ୍ଧର ଦେଇ ହେୁଥିବା ବାଣିଜ୍ୟକୁ ବନ୍ଦ କରିଥିଲେ। ଏଣୁ ସୀମାନ୍ତ ଦେଇ ହେଉଥିବା ବାଣିଜ୍ୟ କାର୍ଯ୍ୟ ନାଟକୀୟ ଭାବେ ହ୍ରାସ ପାଇଥିଲା। ଯାହାଫଳରେ ବାଂଲାଦେଶର ସମସ୍ତ ସ୍ଥଳବନ୍ଦର ଗୁଡିକ ଅକାମୀ ହୋଇଯାଇଥିଲା। ଆଲମଙ୍କ କହିବା ଅନୁସାରେ, ବାଂଲାଦେଶରେ ଅନେକ ସ୍ଥଳବନ୍ଦରକୁ ଅନୁମୋଦନ ମିଳିଥିଲେ ମଧ୍ୟ, ଅପର୍ଯ୍ୟାପ୍ତ ଭିତ୍ତିଭୂମି ଏବଂ ବାଣିଜ୍ୟିକ କାର୍ଯ୍ୟର ଅଭାବ ହେତୁ ସେଗୁଡ଼ିକ ଅକାର୍ଯ୍ୟକାରୀ ହୋଇ ରହିଛି।
ବାଂଲାଦେଶର ଜାହାଜ ମନ୍ତ୍ରଣାଳୟ ଗତ ମାର୍ଚ୍ଚରେ ଭିତ୍ତିଭୂମିର ଅଭାବ ଏବଂ ପରିଚାଳନାଗତ ଚ୍ୟାଲେଞ୍ଜକୁ ଦୃଷ୍ଟିରେ ରଖି ଏହି ବନ୍ଦରଗୁଡ଼ିକୁ ବନ୍ଦ କରିବାକୁ ସୁପାରିଶ କରିଥିଲା। ବିଶେଷତଃ ବଲ୍ଲା ସ୍ଥଳବନ୍ଦରରେ ବାଂଲାଦେଶ ପଟେ ଭିତ୍ତିଭୂମି ନିର୍ମାଣ କରାଯାଇଥିଲେ ମଧ୍ୟ, ଭାରତ ପଟେ ପର୍ଯ୍ୟାପ୍ତ ସୁବିଧା ଏବଂ ରାସ୍ତା ସଂଯୋଗର ଅଭାବ ହେତୁ କାର୍ଯ୍ୟକଳାପ ସ୍ଥଗିତ ରହିଛି।
ଏହି ପଦକ୍ଷେପ ଟିକସ ଦାତାଙ୍କ ଅର୍ଥ ସଞ୍ଚୟ କରିବା ଏବଂ ସରକାରୀ ଖରଚର ବୋଝ ହ୍ରାସ କରିବା ପାଇଁ ନିଆଯାଇଛି ବୋଲି ସରକାର କହିଛନ୍ତି।
