ରାଞ୍ଚି: ଋଣ କରାଇ ଦେବାକୁ ୧୦ ପ୍ରତିଶତ କମିଶନ୍ ମାଗିଥିଲେ ବ୍ୟାଙ୍କ ମ୍ୟାନେଜର । କମିଶନ୍ ତ ନେଲେ, ଆଉ ତା ସହ ୩୯ ହଜାର ଟଙ୍କାର ଦେଶୀ କୁକୁଡ଼ା ବି ଖାଇଗଲେ । ଛତିଶଗଡ଼ର ବିଳାସପୁର ଜିଲ୍ଲାରେ ଜଣେ ଚାଷୀ ଏଭଳି ଠକାମୀର ଶିକାର ହୋଇଛନ୍ତି । ଚାଷୀ ଜଣଙ୍କ ୧୨ ଲକ୍ଷ ଟଙ୍କା ଋଣ କରିବାକୁ ବ୍ୟାଙ୍କକୁ ଯାଇଥିଲେ । ସେଠାରେ ମ୍ୟାନେଜର ତାଙ୍କୁ ୧୦ ପ୍ରତିଶତ କମିଶନ୍ ମାଗିଥିଲେ । ଚାଷୀ ଏଥିରେ ରାଜି ହୋଇ ବ୍ୟାଙ୍କ ମ୍ୟାନେଜରଙ୍କୁ କମିଶନ୍ ଦେଇଥିଲେ । ଏହା ବ୍ୟତୀତ ମ୍ୟାନେଜର ତାଙ୍କ ପାଖରୁ ୩୯ ହଜାର ଟଙ୍କାର ଦେଶୀ କୁକୁଡ଼ା ନେଇଛନ୍ତି ବୋଲି ଚାଷୀ ଏସଡିଏମ୍ଙ୍କ ନିକଟରେ ଅଭିଯୋଗ କରିଛନ୍ତି ।
ସବୁଠୁ ବଡ଼ କଥା ହେଉଛି, ଚାଷୀଙ୍କୁ ଏଯାଏଁ ଋଣ ମିଳିପାରି ନାହିଁ । ଜିଲ୍ଲାର ମସ୍ତୁରୀ ଅଞ୍ଚଳର ବାସିନ୍ଦା ରୂପଚନ୍ଦ ମନୋହରଙ୍କ ପାଖରୁ ସ୍ଥାନୀୟ ବ୍ୟାଙ୍କର ମ୍ୟାନେଜ୍ର କମିଶନ୍ ବାବାଦକୁ ଅର୍ଥ ନେବା ସହ ଦେଶୀ କୁକୁଡ଼ା ନେଇଛନ୍ତି । ସେପଟେ ପ୍ରଶାସନ ତାଙ୍କ ଅଭିଯୋଗ ନଶୁଣିଲେ ଜୀବନ ହାରିଦେବେ ବୋଲି ଚେତାବନୀ ଦେଇଛନ୍ତି ରୂପଚନ୍ଦ । ଚାଷୀ ରୂପଚନ୍ଦଙ୍କ ଅନୁସାରେ, ପୋଲଟ୍ରି ବ୍ୟବସାୟକୁ ବଢ଼ାଇବା ଲାଗି ମସ୍ତୁରୀରେ ଥିବା ଏକ ରାଷ୍ଟ୍ରାୟତ୍ତ ବ୍ୟାଙ୍କରୁ ଋଷ ଆଣିବାକୁ ଯାଇଥିଲେ । ସେଠାରେ ବ୍ୟାଙ୍କର ମ୍ୟାନେଜର ସୁମନ କୁମାର ଚୌଧୁରୀ ଋଣ ମଞ୍ଜୁର କରିବା ଲାଗି ପ୍ରତି ଶନିବାର ଗୋଟିଏ ଲେଖାଏଁ ଦେଶୀ କୁକୁଡ଼ା ଦେବାକୁ କହିଥିଲେ । କେବଳ ସେତିକି ନୁହେଁ, ୧୨ ଲକ୍ଷ ଟଙ୍କା ଲୋନ୍ ପାଇଁ ୧୦ ପ୍ରତିଶତ କମିଶନ୍ ମଧ୍ୟ ମାଗିଥିଲେ ।
ରୂପଚନ୍ଦ କୁକୁଡ଼ା ବିକ୍ରି କରି ମ୍ୟାନେଜରଙ୍କୁ କମିଶନ ଦେଇଥିଲେ ଏବଂ ପ୍ରତ୍ୟେକ ଶନିବାର ଦେଶୀ କୁକୁଡ଼ା ଦେଉଥିଲେ । କୁକୁଡ଼ା କିଣିବା ବେଳର ରସିଦ୍ ମଧ୍ୟ ରୂପଚନ୍ଦଙ୍କ ପାଖରେ ରହିଛି । ରୂପଚନ୍ଦଙ୍କୁ ସୁନା ଅଣ୍ଡା ଦିଆ କୁକୁଡ଼ା ଭାବରେ ବ୍ୟବହାର କରୁଥିବା ମ୍ୟାନେଜର ଋଣ ମଞ୍ଜୁର କରିନାହାନ୍ତି । ଆଉ ଏହାକୁ ନେଇ ଏସଡିଏମଙ୍କ କାର୍ଯ୍ୟାଳୟରେ ଫେରାଦ ହୋଇଛନ୍ତି ରୂପଚନ୍ଦ । ବ୍ୟାଙ୍କ ମ୍ୟାନେଜରଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିବା ସହ ସେ ନେଇଥିବା ଟଙ୍କା ଫେରସ୍ତ ଲାଗି ଏସଡିଏମଙ୍କ ନିକଟରେ ଗୁହାରି କରିଛନ୍ତି । ଗୁହାରି ନଶୁଣିଲେ ଆମରଣ ଅନସନ କରିବେ ଏବଂ ଦରକାର ପଡ଼ିଲେ ଆହ୍ମହତ୍ୟା କରିବେ ବୋଲି ଏସଡିଏମଙ୍କୁ ଚେତାବନୀ ଦେଇଛନ୍ତି ରୂପଚନ୍ଦ ।
