କଟକ,୦୭/୦୬: ନୂଆ ରୂପ ନେବ ବାରବାଟୀ ଦୁର୍ଗ । ପର୍ଯ୍ୟଟକଙ୍କୁ ଆକର୍ଷଣ କରିବା ପାଇଁ ରହିବ ଅନେକ ସୁବିଧା । ଐତିହ୍ୟକୁ ସୁରକ୍ଷା ଦେଇ କରାଯିବ ସମସ୍ତ ଉନ୍ନତିକରଣ । ଯାହାଦ୍ୱାରା ପର୍ଯ୍ୟଟନ ସ୍ଥଳ କ୍ଷେତ୍ର ମଧ୍ୟରେ ମୁଖ୍ୟ କେନ୍ଦ୍ର ବିନ୍ଦୁ ପାଲଟିବ ବାରବାଟୀ ଦୁର୍ଗ । ଏଭଳି କିଛି ଯୋଜନା ସହ ୫୦ କୋଟି ବ୍ୟୟବରାଦ କରିବାକୁ ଯୋଜନା କରିଛି ରାଜ୍ୟ ପର୍ଯ୍ୟଟନ ବିଭାଗ । ଉନ୍ନତିକରଣ ତଥା ନୂଆ ରୂପରେଖ ପାଇଁ ଖୁବ୍ ଶୀଘ୍ର ଡିପିଆର୍ ପ୍ରସ୍ତୁତ କରାଯିବ । ଏନେଇ ବିଭାଗ ପକ୍ଷରୁ ସ୍ୱତନ୍ତ୍ର ଆର୍କିଟେକ୍ଙ୍କ ଦ୍ୱାରା ଡିପିଆର୍ ପ୍ରସ୍ତୁତ କରିବା ପାଇଁ ଆଜି ଟେଣ୍ଡର୍ ଡକାଯାଇଛି । ତେବେ ଗୋଟିଏ ପଟେ ଏହାକୁ ନେଇ ଚାରିଆଡ଼େ ପ୍ରଶଂସା କରାଯାଉଥିଲାବେଳେ ଅନ୍ୟପଟେ ଏଥିରେ ଏଏସ୍ଆଇର ଅନୁମତି କେଁ ଏଯାବତ୍ ଦୂର ହୋଇପାରିନାହିଁ ।
କଟକ ପରିଚୟ ହେଉଛି ବାରବାଟୀ ଦୁର୍ଗ । ରୌପ୍ୟନଗରୀର ଇତିହାସକୁ ଆଜି ବି ବଖାଣୁଛି ଏହି ଦୁର୍ଗ । ଭାରତୀୟ ପ୍ରତ୍ନତତ୍ତ୍ୱ ବିଭାଗ ଦ୍ୱାରା ପରିଚାଳିତ ହେଉଥିବା ଏହି ଦୁର୍ଗ ଦିନକୁ ଦିନ ଅବହେଳିତ ଅବସ୍ଥାରେ ରହିଛି । ଯଦିଓ ଏହାକୁ ଦେଖିବାକୁ ବିଭିନ୍ନ ସ୍ଥାନରୁ ପର୍ଯ୍ୟଟନ ଆସୁଛନ୍ତି କିନ୍ତୁ ବିପର୍ଯ୍ୟସ୍ତ କାରଣରୁ ଏଥିରୁ ଧୀରେ ଧୀରେ ମୁହଁ ମୋଡୁଛନ୍ତି । ଗୋଟିଏ ପଟେ ଗଡ଼ଖାଇ ପଙ୍କରେ ପୋତି ହେଉଥିଲାବେଳେ ଅନ୍ୟ ପଟେ ବାରବାଟୀ ବ୍ୟାଖ୍ୟାନ କେନ୍ଦ୍ର ମଧ୍ୟ ଖୋଲିପାରୁନି । ଏଭଳି ସ୍ଥିତିରେ ସିଏମ୍ସିରୁ ନେଇ ଜିଲ୍ଲା ପ୍ରଶାସନ ସମସ୍ତେ ଅନେକ ଥର ଏହାର ଉନ୍ନତିକରଣ ପାଇଁ ଘୋଷଣା କରୁଥିଲେ ମଧ୍ୟ ତାହା ଏଏସ୍ଆଇ ଅନୁମତି କେଁ ପାଇଁ କେବଳ କାଗଜକଲମରେ ସୀମିତ ରହିଛି । ଏହା ମଧ୍ୟରେ ପୁଣି ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ ବାରବାଟୀ ଦୁର୍ଗର ଉନ୍ନତିକରଣ ପାଇଁ ନୂଆ ଯୋଜନା କରାଯାଇଛି । ଏହାକୁ ନୂଆ ରୂପ ଦେବାକୁ ପର୍ଯ୍ୟଟନ ବିଭାଗ ୫୦କୋଟି ଖର୍ଚ୍ଚ କରିବାକୁ ପ୍ରସ୍ତାବ ଦେଇଛି । ଏଥିପାଇଁ ସ୍ୱତନ୍ତ୍ର ଡିପିଆର୍ ପ୍ରସ୍ତୁତ କରାଯିବ । ଏନେଇ ଡକାଯାଇଥିବା ଟେଣ୍ଡର୍ ଆସନ୍ତା ୧୭ ତାରିଖରେ ଖୋଲାଯିବ । ପରେ ଏ ଦିଗରେ କାର୍ଯ୍ୟ ଆରମ୍ଭ ହେବ ।
ଏହାମଧ୍ୟରେ ପୂର୍ବରୁ ଅନେକ ଥର ଏଭଳି କାର୍ଯ୍ୟ ହୋଇଥିଲାବେଳେ ଶେଷ ସମୟରେ ଏଏସ୍ଆଇ ବିଭିନ୍ନ ଆଳରେ କାର୍ଯ୍ୟ କରିବାକୁ ମନା କରିଦେଇଛି । ବର୍ତ୍ତମାନ ୫୦କୋଟିର ରୂପରେଖ ପ୍ରସ୍ତୁତ ପାଇଁ ପ୍ରସ୍ତାବ ହୋଇଛି, ତାହାପରେ ଏଏସ୍ଆଇରୁ ଅନୁମତି ଅଣାଯିବ । ଯଦି ଅନୁମତି ମିଳେ ତେବେ ସୁନିଶ୍ଚିତ କଟକର ପର୍ଯ୍ୟଟନ ସ୍ଥଳ କ୍ଷେତ୍ରର ବାରବାଟୀ ଦୁର୍ଗ ମୁଖ୍ୟ କେନ୍ଦ୍ର ବିନ୍ଦୁ ପାଲଟିବ ବୋଲି ଜଣେ ବରିଷ୍ଠ ଅଧିକାରୀ ମତ ଦେଇଛନ୍ତି ।
