ନୂଆଦିଲ୍ଲୀ: IPL (ଇଣ୍ଡିଆନ୍ ପ୍ରିମିୟର ଲିଗ୍) ୨୦୨୫ ପୂର୍ବରୁ ବିସିସିଆଇ ଏକ ବଡ଼ ଘୋଷଣା କରିଛି । ବଲ୍ରେ ସାଲିଭା ବା ଲାଳ ଲଗାଇବା ଉପରେ ଯେଉଁ କଟକଣା ଲାଗିଥିଲା ତାକୁ ହଟାଇ ଦେଇଛି ବିସିସିଆଇ । ଖେଳାଳିମାନଙ୍କୁ ବଲ୍ରେ ଲାଳ ପ୍ରୟୋଗ କରିବା ଉପରେ ଲାଗିଥିବା ପ୍ରତିବନ୍ଧକକୁ ହଟାଇ ଦିଆଯାଇଛି । ନୂତନ ସିଜିନ୍ ଆରମ୍ଭ ହେବା ପୂର୍ବରୁ IPL ଅଧିନାୟକଙ୍କ ବୈଠକରେ ଏହି ଆଲୋଚନା ହୋଇଛି । ବୈଠକରେ ଆଇପିଏଲ ସିଜିନ୍ ଆରମ୍ଭ ହେବା ପୂର୍ବରୁ ୧୦ ଜଣ ଅଧିନାୟକଙ୍କୁ ନିୟମାବଳୀ ଏବଂ ଗଣମାଧ୍ୟମ ପ୍ରସାରଣ ସଂପର୍କରେ ଅବଗତ କରାଯାଇଛି ।
କୋଭିଡ୍-୧୯ ମହାମାରୀ ପରଠାରୁ, ICC ବଲ୍ରେ ଲାଳ ବ୍ୟବହାର ଉପରେ ପ୍ରତିବନ୍ଧକ ଲଗାଇଥିଲା । ଏହି ନିଷ୍ପତ୍ତି ପେସରମାନଙ୍କ ବଲ୍କୁ ରିଭର୍ସ ସ୍ୱିଙ୍ଗ୍ କରିବାର କ୍ଷମତାକୁ ବାଧା ଦେଇଥିଲା । ଏହି ନିୟମ IPL ଏବଂ ବିଭିନ୍ନ T20 ଟୁର୍ଣ୍ଣାମେଣ୍ଟରେ ମଧ୍ୟ ଲାଗୁ କରାଯାଇଥିଲା।
IPL ୨୦୨୫ ସିଜିନ୍ ପୂର୍ବରୁ ଲାଳ ଲଗାଇବା ଉପରେ ଲାଗିଥିବା ପ୍ରତିବନ୍ଧକ ଉଠାଇ ଦିଆଯାଇଛି । କରୋନା ମହାମାରୀ ପରେ ଆଇପିଏଲ ୨୦୨୫ରେ ପ୍ରଥମ ଥର ଖେଳାଳିମାନେ ବଲ୍ରେ ଲାଳ ବ୍ୟବହାର କରିପାରିବେ । ଏହି ନିଷ୍ପତ୍ତି ବୋଲରମାନଙ୍କୁ ବେଶ ସହାୟକ ହୋଇପାରେ ବୋଲି କୁହାଯାଉଛି । IPL 2025ରେ କିଛି ଗୁରୁତ୍ୱପୂର୍ଣ୍ଣ ନିୟମର ପରିବର୍ତ୍ତନ ଖେଳରେ ସନ୍ତୁଳନ ଆଣିବାରେ ପ୍ରଭାବୀ ସାବ୍ୟସ୍ତ ହୋଇପାରେ ।
ଟିମ୍ ଇଣ୍ଡିଆର ଷ୍ଟାର ପେସର ମହମ୍ମଦ ଶାମି କହିଥିଲେ ଯେ, ବୋଲରମାନଙ୍କୁ ବଲରେ ଲାଳ ବ୍ୟବହାର କରିବାକୁ ଅନୁମତି ମିଳିବା ସଂପର୍କରେ ଆଲୋଚନା ହୋଇଥିଲା। ଚାମ୍ପିଅନ୍ସ ଟ୍ରଫି ପରେ ଶାମି କହିଥିଲେ, ‘ଆମେ ସର୍ବଦା କର୍ତ୍ତୃପକ୍ଷଙ୍କୁ ଅନୁରୋଧ କରିଥାଉ ଯେ ଆମକୁ ଲାଳ ବ୍ୟବହାର କରିବାକୁ ଅନୁମତି ଦିଅନ୍ତୁ । ଫଳରେ ମ୍ୟାଚ୍ ସମୟରେ ସ୍ୱିଙ୍ଗ୍ ଏବଂ ରିଭର୍ସ ସ୍ୱିଙ୍ଗ୍ କରିବାକୁ ସହଜ ହେବ।’
