ବେଙ୍ଗାଲୁରୁ: କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧାରାମୟା ବେଙ୍ଗାଲୁରୁର ଚିନ୍ନାସ୍ୱାମୀ ଷ୍ଟାଡିୟମ୍ ନିକଟରେ ହୋଇଥିବା ଭିଡ଼ ଦୁର୍ଘଟଣାରେ ମୃତକଙ୍କ ପରିବାର ପାଇଁ କ୍ଷତିପୂରଣ ରାଶି ୧୦ ଲକ୍ଷ ଟଙ୍କାରୁ ୨୫ ଲକ୍ଷ ଟଙ୍କାକୁ ବୃଦ୍ଧି କରିବାକୁ ନିର୍ଦ୍ଦେଶ ଦେଇଛନ୍ତି। ଏହି ଦୁଃଖଦ ଘଟଣା ଗତ ଜୁନ୍ ୪ ତାରିଖରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି)ର ଆଇପିଏଲ୍ ବିଜୟ ଉତ୍ସବ ସମୟରେ ଘଟିଥିଲା। ଯେଉଁଥିରେ ୧୧ ଜଣଙ୍କର ମୃତ୍ୟୁ ହୋଇଥିଲା ଏବଂ ୫୦ରୁ ଅଧିକ ଲୋକ ଆହତ ହୋଇଥିଲେ।
କର୍ଣ୍ଣାଟକ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଜାରି ଏକ ବିବୃତି ଅନୁଯାୟୀ, ଏହି ନିଷ୍ପତ୍ତି ଜାତୀୟ ସ୍ତରରେ ଉତ୍ତେଜନା ଏବଂ ଜନସାଧାରଣଙ୍କ ଅସନ୍ତୋଷ ପରେ ନିଆଯାଇଛି। ଏହ ବ୍ୟତୀତ, ସରକାର ଆହତମାନଙ୍କ ପାଇଁ ମାଗଣା ଚିକିତ୍ସା ଯୋଗାଇ ଦେବାକୁ ପ୍ରତିଶ୍ରୁତି ଦେଇଛନ୍ତି ଏବଂ ଘଟଣାର ତଦନ୍ତ ପାଇଁ ଜଣେ ମାଜିଷ୍ଟ୍ରେଟ୍ ନେତୃତ୍ୱାଧୀନ କମିଟି ତଦନ୍ତ ଆରମ୍ଭ କରିଛନ୍ତି।
ସୂଚନା ମୁତାବକ,ଦୀର୍ଘ ୧୮ ବର୍ଷର ଅପେକ୍ଷା ପରେ ଚଳିତ ଆଇପିଏଲ ସିଜିନର ଆରସିବି ଟାଇଟଲ ଜିତିଥିଲା। ଏହି ପରିପ୍ରେକ୍ଷିରେ କର୍ଣ୍ଣାଟକ ରାଜ୍ୟ କ୍ରିକେଟ୍ ଆସୋସିଏସନ୍ (କେଏସସିଏ) ଆରସିବି ପାଇଁ ଚିନ୍ନାସ୍ୱାମୀ ଷ୍ଟାଡିୟମରେ ଏକ ବିଜୟତ୍ସୋବର ଆୟୋଜନ କରିଥିଲେ। ଷ୍ଟାଡିୟମରେ ୩୫,୦୦୦ ଆସନ ଧାରଣ କ୍ଷମତା ଥିବା ସତ୍ତ୍ୱେ ହଠାତ୍ ୨ ରୁ ୩ ଲକ୍ଷ ପ୍ରଶସଙ୍କ ଭିଡ଼ ଜମାଇଥିଲେ। କେଏସସିଏ ଦ୍ୱାରା ଆୟୋଜିତ ଏହି ଉତ୍ସବରେ ଭିଡ଼ ନିୟନ୍ତ୍ରଣ ଅଭାବ ଯୋଗୁଁ ଏହି ଦୁର୍ଘଟଣା ଘଟିଥିଲା ବୋଲି ରିପୋର୍ଟରୁ ଜଣାପଡ଼ିଛି। ଆରସିବି ମଧ୍ୟ ମୃତକଙ୍କ ପରିବାର ପାଇଁ ୧୦ ଲକ୍ଷ ଟଙ୍କା କ୍ଷତିପୂରଣ ଏବଂ ଆହତମାନଙ୍କ ଚିକିତ୍ସା ପାଇଁ ‘ଆରସିବି କେୟାର୍ସ’ ନାମକ ଏକ ରିଲିଫ୍ ଫଣ୍ଡ ଘୋଷଣା କରିଛି।
ଏହି ଘଟଣା ସମ୍ପର୍କରେ ମୁଖ୍ୟମନ୍ତ୍ରୀ ସିଦ୍ଧାରାମୟା କହିଛନ୍ତି, “ଏହା ଏକ ଅପ୍ରତ୍ୟାଶିତ ଦୁର୍ଘଟଣା ଥିଲା। ଆମେ ଏତେ ବଡ଼ ଭିଡ଼ର ଆଶା କରିନଥିଲୁ। ଆମେ ପୀଡ଼ିତଙ୍କ ସହ ଅଛୁ ଏବଂ ସମସ୍ତ ଆବଶ୍ୟକ ସହାୟତା ଯୋଗାଇ ଦେବୁ।” ସେ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ ସରକାର ଏହି ଘଟଣାକୁ ରାଜନୀତିକରଣ କରିବେ ନାହିଁ ଏବଂ ତଦନ୍ତ ଜରିଆରେ ଏହି ଦୁର୍ଘଟଣାର ମୂଳ କାରଣ ଉଦ୍ଘାଟନ କରାଯିବ।
ଏହି ଦୁର୍ଘଟଣା ବେଙ୍ଗାଲୁରୁରେ ବଡ଼ ଧରଣର ଜନସମାଗମ ପାଇଁ କଡ଼ା ସୁରକ୍ଷା ଓ ଭିଡ଼ ନିୟନ୍ତ୍ରଣ ପ୍ରୋଟୋକଲ୍ ଆବଶ୍ୟକତା ଉପରେ ଆଲୋକପାତ କରିଛି।
