ନୂଆଦିଲ୍ଲୀ,୦୫/୦୮: ଥମିବନି ବନ୍ଧୁକ । ବର୍ଷିବ ବୋମା । ଆହୁରି ବୋହିବ ରକ୍ତର ନଦୀ । ଚରମ ସ୍ଥିତିରେ ଇସ୍ରାଏଲ ଓ ହମାସ ଲଢେଇ । ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଇସ୍ରାଏଲ ସୁରକ୍ଷା ବଳରୁ ସମ୍ପୂର୍ଣ୍ଣ ଗାଜାପଟ୍ଟି ଦଖଲ କରିବାକୁ ଆଦେଶ ଦେଇଛନ୍ତି । ଇସ୍ରାଏଲ ମିଡିଆ ରିପୋର୍ଟ ଅନୁସାରେ ଏହି ଆଦେଶ ହମାସ ଉପରେ ଚାପ ପକାଇବା ଉଦ୍ଦେଶ୍ୟରେ ଦିଆଯାଇଛି । ଯାହାଦ୍ୱାରା ହମାସ କବଜାରେ ଥିବା ଇସ୍ରାଏଲ ବନ୍ଧକଙ୍କ ମୁକ୍ତି ସୁନିଶ୍ଚିନ୍ତ ହେବ । ନେତାନ୍ୟାହୁଙ୍କ ଏହି ଆଦେଶ ପଛରେ ପ୍ରାୟ ୨ ବର୍ଷ ଧରି ଚାଲିଥିଲା ଯୁଦ୍ଧ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ମୋଡ଼ ନେବା ଅନୁମାନ କରାଯାଉଛି । କାରଣ ଏହା ପୂର୍ବରୁ ଇସ୍ରାଏଲ ସେନା ଗାଜାପଟ୍ଟିର ପ୍ରାୟ ୭୫ ପ୍ରତିଶତ ଅଂଶ କବଜା କରିଛି ।
ଏବେ ଇସ୍ରାଏଲ ସୁରକ୍ଷାବଳ ବାକି ୨୫ ପ୍ରତିଶତ ଅଞ୍ଚଳ କବଜା କରିବାକୁ ପ୍ରସ୍ତୁତ ହେଉଛି । ଗୁଇନ୍ଦା ସୂଚନା ଅନୁସାରେ ଉକ୍ତ ସ୍ଥାନରେ ହମାସ ଇସ୍ରାଏଲ ବନ୍ଧକଙ୍କୁ ଲୁଚାଇ ରଖିଛି । ଜେରୁଜେଲମ ପୋଷ୍ଟ ଅନୁସାରେ ପ୍ରଧାନମନ୍ତ୍ରୀ କାର୍ଯ୍ୟାଳୟ ପକ୍ଷରୁ ଆଇଡିଏଫ୍ ଚିଫ୍ ଅଫ୍ ଷ୍ଟାଫଙ୍କୁ ନିର୍ଦ୍ଦେଶ ପାଳନ ନେଇ ସିଧା ସିଧା କୁହାଯାଇଛି । କବଜା କର ନଚେତ୍ ଇସ୍ତଫା ଦିଅ ବୋଲି ଆଦେଶ ଦିଆଯାଇଛି । ହମାସ ଇସ୍ରାଏଲ ବନ୍ଧକଙ୍କର ଏକ ଭୟଙ୍କର ଭିଡିଓ ଜାରି କରିବା ପରେ ନେତାନ୍ୟୁାହ ଭଡକିଛନ୍ତି । ଭିଡିଓରେ ଜଣେ ବନ୍ଧକ ନିଜ ପାଇଁ କବର ଖୋଳୁଥିବା ଦେଖିବାକୁ ମିଳିଥିଲା । ସେ ଅତ୍ୟନ୍ତ ଦୁର୍ବଳ ଶରୀରର ଥିବା ଦେଖିବାକୁ ମିଳିଥିଲା । ଦୀର୍ଘ ଦିନ ହେବ ସେମାନଙ୍କୁ ଖାଇବାକୁ ଦିଆଯାଇନଥିଲା । ଶରୀର କେବଳ ଏକ କଙ୍ଗାଳ ପରି ଦେଖାଯାଉଥିଲା ।
ଇସ୍ରାଏଲ ସେନା ହମାସ୍କୁ ଚେତାବନୀ ଦେଇଥିଲେ । ତୁରନ୍ତ ଇସ୍ରାଏଲ ବନ୍ଧକଙ୍କୁ ମୁକ୍ତ ନ କଲେ ଗାଜାରେ ଅବିରତ ଆକ୍ରମଣ ହେବ ବୋଲି ସେନା ପକ୍ଷରୁ କୁହାଯାଇଥିଲା । ଇସ୍ରାଏଲ ସେନା ଅନୁସାରେ, ହମାସ ୨୫୧ ଜଣଙ୍କୁ ଅପହରଣ କରିଛି । ବନ୍ଦୀ ଅଦଳବଦଳ ପରେ ଆଉ ୪୯ ଇସ୍ରାଏଲ ନାଗରିକ ହମାସ୍ କବଳରେ ଥିଲେ । ସେମାନଙ୍କ ମଧ୍ୟରୁ ୨୭ ଜଣଙ୍କ ମୃତ୍ୟୁ ହୋଇଛି ।
