ବ୍ରହ୍ମପୁର: ପ୍ରଥମେ ଲୋଭ ଦେଖେଇଲେ, ବିଶ୍ୱାସ ଜନ୍ମାଇଲେ ଓ ପରେ ଲକ୍ଷାଧିକ ଟଙ୍କା କଳା କନା ବୁଲାଇଦେଲେ। ଏ ଘଟଣା ବିହାର କି ଜମତାରାର ନୁହେଁ। ଖୋଦ୍ ଗଞ୍ଜାମ ଜିଲ୍ଲାରୁ ସାମ୍ନାକୁ ଆସିଛି। ଯେଉଁଠି ଜଣେ ଯୁବକ ଭାରତୀୟ ରେଳବାଇରେ ଚାକିରୀ କରେଇଦେବାର ଲୋଭ ଦେଖାଇ ଏକାଧିକ ଯୁବକ ଯୁବତୀଙ୍କଠୁ ଲାକ୍ଷାଧିକ ଟଙ୍କା ଆତ୍ମସାତ କରିଦେଇଛନ୍ତି।
ସୂଚନା ମୁତାବକ, ସଦର ଥାନା କୁକୁଡାଖଣ୍ଡି ଶାନ୍ତିନଗର ଅଞ୍ଚଳର ବସବାସ କରୁଥିବା ଏ. ବିଘ୍ନେଶ୍ୱର ରାଓ ଚାକିରିର ପ୍ରଲୋଭନ ଦେଖାଇ ଏକାଧିକ ଲୋକଙ୍କ ନିକଟରୁ ଲାକ୍ଷାଧିକ ଟଙ୍କା ଆତ୍ମସାତ କରିନେଇଥିଲେ। ଖାଲି ଏତିକି ନୁହେଁ ସବୁଠୁ ଆଶ୍ଚର୍ଯ୍ୟ କଥା ହେଉଛି ଟଙ୍କା ନେବା ପରେ ବା ପୂର୍ବରୁ ସେ ଆଶାୟୀମାନଙ୍କୁ ନିଯୁକ୍ତି ପତ୍ର ମଧ୍ୟ ପ୍ରଦାନ କରୁଥିଲେ। ଯେଉଁଥିପାଇଁ ଲୋକମାନେ ବିଶ୍ୱାସ କରିବାକୁ ବାଧ୍ୟ ହେଉଥିଲେ।
ହେଲେ ଦୀର୍ଘଦିନ ଧରି ଅପେକ୍ଷା କରିବା ପରେ ମଧ୍ୟ ନିଯୁକ୍ତି ନେଇ ସ୍ପଷ୍ଟ ସୂଚନା ନମିଳିବାପରେ ଆଶାୟୀମାନେ ଅବିଯୁକ୍ତଙ୍କ ସହ ଯୋଗାଯୋଗ କରିବାକୁ ଚାହିଁବାରୁ ବିଘ୍ନେଶ୍ୱର ସେମାନଙ୍କୁ ଆଉ ଧରାଛୁଆଁ ଦେଇନଥିଲା। ଏଣୁ ବାଧ୍ୟ ହେଇ ଆଶାୟୀମାନେ ପୁଲିସ ନିକଟରେ ଏନେଇ ଅଭିଯୋଗ କରିଥିଲେ। ପୁଲିସ ଏ ବାବଦରେ ସୂଚନା ପାଇବା ପରେ ଜାଲ ବିଛାଇ ଅଭିଯୁକ୍ତକୁ ଗିରଫ କରିବାରେ ସଫଳ ହୋଇଥିଲା।
ଗିରଫ କରିବା ପରେ ପୁଲିସ ଅଭିଯୁକ୍ତ ନିକଟରୁ ନକଲି ଡକ୍ୟୁମେଣ୍ଟସ, ନିଯୁକ୍ତିପତ୍ର, ମୋବାଇଲଫୋନ ଆଦି ଜବତ କରିଥିବା ନେଇ ବ୍ରହ୍ମପୁର ଏସ.ପି. ସୂଚନା ଦେଇଛନ୍ତି।
