କଟକ,୦୭/୦୯: କେଉଁଠି ଚାଳିଆଟିଏ ଛିଡ଼ା ହୋଇଛି, ଆଉ କେଉଁଠି ମାଟିରେ ମୁହଁ ମାଡ଼ି ପଡ଼ିଛି । କେଉଁଠି ଗାଁ ଲୋକେ ମିଶି ପୁନରୁଦ୍ଧାର କରିବାକୁ ଉଦ୍ୟମ କରୁଛନ୍ତି । ଆଉ କେଉଁଠି ସମ୍ବଳ ଅଭାବରୁ ତାହା ସମ୍ଭବ ହୋଇପାରି ନାହିଁ । କଟକ ଜିଲ୍ଲା ସମେତ ରାଜ୍ୟର କୋଣ ଅନୁକୋଣରେ ଭାଗବତ ଟୁଙ୍ଗିର ଏବେ ଏଭଳି ଅବସ୍ଥା । ଯେଉଁ ଭାଗବତ ଟୁଙ୍ଗିରୁ ଦିନେ ଭାଗବତ କଥା ଭାସି ଆସୁଥିଲା ଆଜି ସେହି ଭାଗବତ ଟୁଙ୍ଗିଗୁଡ଼ିକ ମୁହଁ ମାଡ଼ି ପଡ଼ିଛନ୍ତି । କିଛି ବର୍ଷ ରାଜ୍ୟ ସରକାରଙ୍କ ଆର୍ଥିକ ସହାୟତା ଟୁଙ୍ଗି ପରମ୍ପରାକୁ ଉଜ୍ଜୀବିତ କରିଥିଲା । କିନ୍ତୁ ଗତ ଚାରି ବର୍ଷ ହେଲା ସହାୟତାକୁ ବନ୍ଦ କରି ଦିଆଯାଇଛି । ଫଳରେ ଅନେକ ଭାଗବତ ଟୁଙ୍ଗି ଏବେ ଦୟନୀୟ ଅବସ୍ଥାରେ, ଏଠାରୁ ଆଉ ଭାଗବତ କଥା ଭାସିଆସୁନି ।
ଓଡ଼ିଶାରେ ହଜି ଯାଉଥିବା ଭାଗବତ ଟୁଙ୍ଗି ପରମ୍ପରାକୁ ପୁନରୁଜ୍ଜୀବିତ କରିବା ଲାଗି ରାଜ୍ୟ ସରକାର ଟୁଙ୍ଗି ଖୋଜିବା ଆରମ୍ଭ କରିଥିଲେ । ୨୦୨୪-୧୫ ମସିହାରୁ ଟୁଙ୍ଗିଗୁଡ଼ିକୁ ଆର୍ଥିକ ସହାୟତା ଯୋଗାଇ ଦେବାକୁ ଯୋଜନା ଆରମ୍ଭ ହୋଇଥିଲା । ଏଥିପାଇଁ ପ୍ରତି ଜିଲ୍ଲା ପ୍ରଶାସନକୁ ଟୁଙ୍ଗି ଖୋଜିବାକୁ କୁହାଯାଇଥିଲା । ପ୍ରତିବର୍ଷ ଟୁଙ୍ଗି ପୁନରୁଦ୍ଧାର ପାଇଁ କିଛି ଆର୍ଥିକ ସହାୟତା ପ୍ରଶାସନକୁ ଯୋଗାଇ ଦିଆଯାଉଥିଲା । ଯେଉଁମାନେ ଟୁଙ୍ଗି ପୁନରୁଦ୍ଧାର ପାଇଁ ପ୍ରଶାସନ ନିକଟରେ ଆବେଦନ କରିଥାନ୍ତି ସେମାନଙ୍କୁ ଏହି ଆର୍ଥିକ ସହାୟତା ପ୍ରଦାନ କରାଯାଉଥିଲା । ପ୍ରତି ଟୁଙ୍ଗି ପିଛା ୫୦ ହଜାର ଟଙ୍କା ଦିଆଯାଉଥିଲା । ଯୋଜନା ହୋଇଥିଲା, ୫୦ ହଜାର ଟଙ୍କାରୁ ୪୦ ହଜାର ଟଙ୍କା ଏକ ଜାତୀୟକରଣ ବ୍ୟାଙ୍କ୍ରେ ଦୀର୍ଘମିଆଦି ଜମା(ଫିକ୍ସଡ୍ ଡିପୋଜିଟ୍) କରାଯିବ । ଏଥିପାଇଁ ଏକ ଯୁଗ୍ମ ଆକାଉଣ୍ଟ୍ ଖୋଲାଯିବ । ସମ୍ପୃକ୍ତ ଟୁଙ୍ଗିର ମୁଖ୍ୟ, ସ୍ଥାନୀୟ ବିଡିଓ, ପଞ୍ଚାୟତ ଏକ୍ଜିକ୍ୟୁଟିଭ୍ ଅଫିସର କିମ୍ବା ମ୍ୟୁନିସ୍ପାଲିଟିର ବିଭାଗୀୟ ଅଧିକାରୀଙ୍କ ନାମରେ ଏହି ଯୁଗ୍ମ ଆକାଉଣ୍ଟ୍ ଖୋଲାଯିବ । ଏହି ୪୦ ହଜାର ଟଙ୍କାରୁ ଯେଉଁ ସୁଧ ମିଳିବ ସେହି ଅର୍ଥରେ ଟୁଙ୍ଗିର ବିଭିନ୍ନ ପୂଜା, ପାର୍ବଣ ପାଇଁ ଆବଶ୍ୟକ ଅର୍ଥ ଖର୍ଚ୍ଚ କରାଯିବ । ବାକି ୧୦ ହଜାର ଟଙ୍କା ମାଇକ୍ କିଣାଯିବାରେ ଖର୍ଚ୍ଚ କରାଯିବ । କଟକ ଜିଲ୍ଲାରେ ୨୦୨୪-୧୫ରୁ ୨୦୧୯-୨୦ ମଧ୍ୟରେ ପ୍ରାୟ ୬ ଶହରୁ ଅଧିକ ଭାଗବତ ଟୁଙ୍ଗି ପାଇଁ ଆର୍ଥିକ ସହାୟତା ଯୋଗାଇ ଦିଆଯାଇଛି । କିନ୍ତୁ ଭାଗବତ ଟୁଙ୍ଗି ପୁନରୁଦ୍ଧାର ପାଇଁ ଆହୁରି ପ୍ରାୟ ହଜାରେରୁ ଅଧିକ ଆବେଦନପତ୍ର କଟକ ଜିଲ୍ଲା ସଂସ୍କୃତି ବିଭାଗକୁ ଆସି ପଡି ରହିଥିଲା । ହଠାତ୍ ୨୦୨୦ ପରଠୁ ରାଜ୍ୟ ସରକାର ଭାଗବତ ଟୁଙ୍ଗି ପୁନରୁଦ୍ଧାର ପାଇଁ ଆର୍ଥିକ ସହାୟତା ବନ୍ଦ କରିଦେଲେ ।
ଜିଲ୍ଲା ପ୍ରଶାସନର ଜଣେ ଅଧିକାରୀଙ୍କ କହିବା ଅନୁଯାୟୀ, ଭାଗବତ ଟୁଙ୍ଗିର ପୁନରୁଦ୍ଧାର ପାଇଁ ରାଜ୍ୟ ସରକାରଙ୍କ ଏହି ସ୍ପଳ୍ପ ସହାୟତା ଅମ୍ଳଜାନ ଭଳି କାର୍ଯ୍ୟ କରିଥିଲା । ଏହି ସହାୟତାରେ ପୁଣିଥରେ ଭାଗବତ ଟୁଙ୍ଗି ନୂଆ ରୂପ ପାଇଥିଲା । ଗାଁ ପରିବେଶରୁ ହଜି ଯାଉଥିବା ଟୁଙ୍ଗିରୁ ଭାଗବତ କଥା ଭାସି ଆସିଥିଲା । ଯେତିକି ଭାଗବତ ଟୁଙ୍ଗି ଅନୁଦାନ ପାଇଥିଲେ ସେମାନେ ତ’ ନିଜକୁ ଟିକେ ଛିଡ଼ା କରିପାରିଥିଲେ । ହେଲେ ଯେତିକି ପାଇଛନ୍ତି ତାଠାରୁ ବହୁ ଅଧିକ ଟୁଙ୍ଗି ଆର୍ଥିକ ଅନୁଦାନ ପାଇନପାରି ମୁହଁ ମାଡ଼ି ପଡ଼ି ରହିଛନ୍ତି । ସରକାର ଯଦି ପୁଣି ଟୁଙ୍ଗି ପୁନରୁଦ୍ଧାର ପାଇଁ ସହାୟତା ଯୋଗାଇ ଦିଅନ୍ତେ ତେବେ ଗାଁ ପରିବେଶ ଭାଗବତ ଟୁଙ୍ଗିକୁ ନେଇ ପୁଣିଥରେ ହସି ଉଠନ୍ତା ।
