ପୁରୀ, ୦୮/୦୨: ଶନିବାର ଭୌମ ଏକାଦଶୀ । ଶ୍ରୀମନ୍ଦିରରେ ବିଶେଷ ନୀତି ଥିବାରୁ ଗୋଟିଏ ଦିନ ପାଇଁ ରତ୍ନଭଣ୍ଡାର ମରାମତି ବନ୍ଦ ରହିବ। ଏନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।
ଏବେ ଭିତର ଓ ବାହାର ରତ୍ନଭଣ୍ଡାର ଭିତର ପାଶ୍ୱର୍ ମରାମତି କାମ ଚାଲିଥିବା ବେଳେ ବାହାର ପାଶ୍ୱର୍ରୁ ମଧ୍ୟ ପ୍ଲାଷ୍ଟର ଛଡ଼ାଇବା କାମ ଆରମ୍ଭ ହୋଇଛି । ଭିତର ରତ୍ନଭଣ୍ଡାର ଭିତର ପାଶ୍ୱର୍ କାନ୍ଥ ଓ ଛାତରୁ ପ୍ଲାଷ୍ଟର ଛଡ଼ା ଯାଇ କେମିକାଲ ଟ୍ରିଟମେଣ୍ଟ କରାଯାଉଛି । ନଷ୍ଟ ପଥର ବଦଳ କରାଯାଇଛି । ପଥର ଜଏଣ୍ଟଗୁଡ଼ିକୁ ପୁନଃ ସ୍ୱତନ୍ତ୍ର ସିମେଣ୍ଟ ପ୍ରଲେପ ଦେଇ ଯୋଡେଇ କରାଯାଇଛି। ମୂଷା ଗାତଗୁଡ଼ିକୁ ବୁଜା ଯାଇଛି । କାମକୁ ଜୋର୍ଦାର୍ କରି ନିର୍ଦ୍ଧାରିତ ସମୟରେ ଶେଷ କରାଯିବ ବୋଲି ଏଏସ୍ଆଇର ଜଣେ ଅଧିକାରୀ କହିଛନ୍ତି ।
୩ ମାସ ଭିତରେ ରତ୍ନଭଣ୍ଡାର ମରାମତି ସାରିବାକୁ ଏଏସ୍ଆଇ ସମୟ ନେଇଛି । ଡିସେମ୍ବର ୧୭ରେ ରତ୍ନଭଣ୍ଡାର ମରାମତି ଆରମ୍ଭ ହୋଇଥିଲା । ଏହା ଭିତରେ ପ୍ରାୟ ଦେଢ଼ ମାସରୁ ଅଧିକ ସମୟ ଅତିକ୍ରାନ୍ତ ହୋଇଯାଇଛି । ତେଣୁ ରତ୍ନଭଣ୍ଡାର ମରାମତି ଲାଗି ଆଉ ଦେଢ଼ ମାସ ସମୟ ରହିଛି ।
